1 Kua̱r 21 - RUAC KUƆTH IN RƐL RƆ

Kak wal kɛ kui̱ kɔaŋ Na-both

¹ Täämɛ te Na-both raan Yidh-rɛɛl kɛ kak wal kɛ kui̱ kɔaŋ kä Yidh-rɛɛl thieekä duëël kuäärä kua̱r Tha-mɛ-ria ni Ɛ̈-ɣab.

² Kä cu Ɛ̈-ɣab Na-both jiök i̱, “Käm ni ɣä kak walku kɛ kui̱ kɔaŋ, dëë jɛ jak kä kak wal kɛ kui̱ kɔaŋ, kɛ ɣöö thieekɛ kɛ dhɔrä. Bä ji̱ moc kak wal kɛ kui̱ kɔaŋ mi gɔaa. Kiɛ bä ji̱ ka̱m pekdɛ kɛ yio̱w.”

³ Kä cu Na-both ɛ loc i̱, “Ci Kuoth Nhial ɛ yac i̱ /cä ji̱ bi ka̱m duŋ gua̱a̱ri mi di̱el.”

⁴ Kä cu Ɛ̈-ɣab loc dhɔrɛ kɛ ŋɛ̈ɛ̈ny kɛnɛ kuɔn kɛ min ci Na-both raan Yidh-rɛɛl ɛ la̱r jɛ i̱, “/Cä ji̱ bi ka̱m duŋ gua̱a̱ri mi di̱el.” Kä cuɛ tɔ̱ɔ̱c wi̱i̱ dhaŋädɛ, cuɛ wi̱cdɛ riet ni dɔɔr, kä thilɛ mi cuɛ cam.

⁵ Kä cu ciekdɛ ni I-dhɛ-bɛl ben kä jɛ, kä cuɛ jɛ jiök i̱, “Ɛŋu ci lɔcdu jiääk inɛ mi a /ci mi̱th?”

⁶ Kä cuɛ jɛ loc i̱, “Ɛ ɣöö cä ruac kɛ raan Yidh-rɛɛl ni Na-both, cä jiök i̱, ‘Käm ni ɣä kakdu wal kɛ kui̱ kɔaŋ kɛ yio̱w, kiɛ mi nhɔki jɛ bä ji̱ moc kɛ gua̱th mi dɔ̱ŋ.’ Kä cuɛ ɣä loc i̱, ‘/Cä ji̱ bi ka̱m kakdä wal kɛ kui̱ kɔaŋ.’ ”

⁷ Kä cu ciekdɛ ni I-dhɛ-bɛl ɛ jiök i̱, “/Ciɛ ji̱n la kuäär I-thɛ-rɛl ɔ? Jiɛc rɔ mi̱thni, a lɔcdu gɔaa. Ɣän bä ji̱ ka̱m kak wal kɛ kui̱ kɔaŋ bɛɛl Na-both raan Yidh-rɛɛl.”

⁸ Kä cuɛ warɛgakni gɔ̱r kɛ ciöt Ɛ̈-ɣab kä cuɛ kɛ pi̱m kɛ katimdɛ, kä cuɛ warɛgakni jäk kä bööth, kɛnɛ ruëëc tin cieŋ wi̱c kɛɛl kɛ Na-both.

⁹ Kä cɛ warɛgakni gɔ̱r i̱, “Larɛ cäŋ thëk, kä lathɛ Na-both nhiam wi̱i̱ nath.

¹⁰ Kä la̱thɛ nɛy da̱ŋ rɛw ti ji̱ luɔm lotädɛ kä akɛ latkɛ jɛ i̱ ‘Cɛ Kuoth kɛnɛ kuäär kuëth.’ Kä bia cu naŋ raar, kä bia bök amäni lia̱a̱dɛ.”

¹¹ Kä cu bööth, kɛnɛ ruëëc tin cieŋ wi̱c kɛɛl kɛ Na-both jɛ la̱t ce̱tkɛ min ci I-dhɛ-bɛl ɛ lat rɛy warɛgakni tin cɛ gɔ̱a̱r kɛ.

¹² Cukɛ cäŋ thëk lat, kä cukɛ Na-both lath nhiam wi̱i̱ nath.

¹³ Kä cu ji̱ luɔm da̱ŋ rɛw ben rɛc kä cukɛ nyuur lotädɛ. Kä cu ji̱ luɔm ruac lat kɛ kui̱ Na-both nhiam nath i̱, “Na-both cɛ Kuoth kuëth kɛnɛ kuäär.” Kä cukɛ jɛ naŋ raar rɛy wec kä cua jɛ bök kɛ pääm amäni min cɛ li̱w.

¹⁴ Kä cukɛ I-dhɛ-bɛl jäkä ruac i̱, “Ca Na-both bo̱k a cɛ li̱w.”

¹⁵ Kä niɛ min ci I-dhɛ-bɛl ɛ liŋ i̱ ca Na-both bo̱k a cɛ li̱w. Cuɛ Ɛ̈-ɣab jiök i̱, “Jiɛc rɔ wër käni kak wal kɛ kui̱ kɔaŋ Na-both raan Yidh-rɛɛl, mëë lo̱kɛ ɣöö bɛ kam ji̱ kɛ yio̱w. Na-both /cɛ ŋot kɛ tëk, cɛ li̱w.”

¹⁶ Kä niɛ min ci Ɛ̈-ɣab ɛ liŋ i̱ ci Na-both li̱w, cuɛ rɔ jiɛc wee kak wal kɛ kui̱ kɔaŋ Na-both raan Yidh-rɛɛl ka̱n.

¹⁷ Kä cu ruac Kuɔth Nhial ben kä E-li-yaa kä Tic-be i̱,

¹⁸ “Jiɛc rɔ wër ro̱mni kɛ Ɛ̈-ɣab kuäär I-thɛ-rɛl min te kä Tha-mɛ-ria. Jɛn a rɛy kakä wal Na-both kɛ kui̱ kɔaŋ wëë jɛ ka̱n.

¹⁹ Kä bi jɛ wä la̱r jɛ laar Kuoth Nhial ɛ i̱, ‘Ji̱n ci raan näk, kä käni nyinkɛ bä?’ Kä biɛ la̱r jɛ laar Kuoth Nhial jɛ i̱, ‘Ɛn guäth ɔ ci jio̱k riɛm Na-both lap thi̱n ɔ, bɛ riɛmdu lap thi̱n bä.’ ”

²⁰ Kä cu Ɛ̈-ɣab E-li-yaa jiök i̱, “Ci ɣä jëk thi̱n lö gua̱n tɛ̈rä?” Kä cuɛ loc i̱, “Ci jëk thi̱n, kɛ ɣöö ci rɔ kɔak a ci la̱t ni mi jiääk waaŋ Kuɔth Nhial.

²¹ Kä nɛnɛ ɣän bä ji̱ nöŋ jiääk. Kä bä ji̱ thum, kä bä tutku diaal woc, mi di̱eeth ji̱n kiɛ ja̱ŋ kä I-thɛ-rɛl.

²² Kä bä dhɔru jak kä ce̱tkɛ dhɔr Ya-rɔ-baam gat Nɛ-bat, kɛnɛ dhɔr Bɛ̈ca gat Ä-ɣi-yaa, kɛ ɣöö ci ɣä jak kä gak, kä ci I-thɛ-rɛl jak kä dui̱r.

²³ Kä kɛ kui̱ I-dhɛ-bɛl ci Kuoth Nhial wëë, ‘Bi jio̱k I-dhɛ-bɛl cam rɛy wec Yidh-rɛɛl.’

²⁴ Kä raan Ɛ̈-ɣab ɛ bi li̱w ɔ rɛy wec bi jio̱o̱k ɛ cam. Kä ram ɔ bi li̱w ɔ rɛy dɔaar bi diit ɛ cam.”

²⁵ (Kä cuɛ thil ram mi cu rɔ kɔak a bɛ mi jiääk la̱t waaŋ Kuɔth Nhial ce̱tkɛ Ɛ̈-ɣab, mëë ci ciekdɛ ni I-dhɛ-bɛl jɛ com.

²⁶ Cuɛ lät a jiäk kɛ ɣöö guurɛ ni kuth guäyni, ce̱tkɛ mëë ci ji̱ Ɛ-mor ɛ la̱t, tëë ci Kuoth Nhial kɛ juɔc raar nhiam ji̱ I-thɛ-rɛl.)

²⁷ Kä min ci Ɛ̈-ɣab rieet ti̱ti̱ liŋ, cuɛ bieynikɛ rɛ̈t, kä cuɛ bieyni cuali la̱th puɔ̱ɔ̱nydɛ kä cuɛ thɛɛk, kä cuɛ tɔ̱ɔ̱c kɛ bieyni cuali, kä cuɛ ja̱l ɛ luaŋ luaŋ.

²⁸ Kä cu ruac Kuɔth Nhial ben kä E-li-yaa kä Tic-be wëë i̱,

²⁹ “Ciɛ nɛn täämɛ ɛn ɣöö ci Ɛ̈-ɣab mua̱l nhiamdä i̱di? Kɛ ɣöö cɛ mua̱l nhiamdä, /cä jɛ bi nöŋ mi jiäk kɛ ni̱nkɛ. Duundɛ ɣöö kɛ ni̱n gankɛ bä da̱k nööŋ dhɔrɛ.”