1 Kua̱r 20 - RUAC KUƆTH IN RƐL RƆ

Ko̱r kɛ ji̱ Thi-ri-ya

¹ Kä cu kuäär Thi-ri-ya ni Bɛn-a-dad rɛmdɛ mat kɛɛliw. Kä te kua̱r ti jiɛn diɔ̱k kɛɛl kɛ jɛ, kɛ jiöŋkööri kɛnɛ thurbiɛɛli. Kä cuɛ Tha-mɛ-ria wä go̱l kä cuɛ nyiëëny kɛ jɛ.

² Kä cuɛ naath jäk kä Ɛ̈-ɣab kuäär I-thɛ-rɛl wi̱c, kä jiökɛ jɛ i̱, “Nɛmɛ ɛ min laar Bɛn-a-dad ɛ i̱,

³ ‘Da̱a̱pdu kɛnɛ ciɛk in bo̱r kɛ nyinkä. Kä mänku tin gɔw kɛnɛ gaatku kɛ nyinkä.’ ”

⁴ Kä cu kuäär I-thɛ-rɛl ɛ loc i̱, “Ce̱tnikɛ mɔ ciɛ larɔ lö kuäärä, Ɛ ɣän duŋdu nikɛ nyinkä diaal.”

⁵ Kä cu ja̱a̱k rɔ nyɔk kɛ ben i̱, “Nɛmɛ ɛ min laar Bɛn-a-dad i̱ ‘ɣän ja̱k kä ji̱ kä naath, kɛ ɣöö bi ɣä ka̱m da̱a̱pdu, kɛnɛ ciɛk in bo̱r, kɛ mänku, kɛnɛ gaatku.

⁶ Kä ciɛ jɛn kärɔa, bä ji̱ jäk kä ji̱ kɔaarä i̱ ruun kɛn gua̱th ɛmɛ, ba dhɔru kɛnɛ dho̱r ji̱ kɔaaru wä go̱r, kä ba min nhɔki ka̱n.’ ”

⁷ Kä cu kuäär I-thɛ-rɛl bööth wec diaal cɔl, kä cuɛ wëë, “Nɛ̈nɛ jɛ täämɛ wut ɛ mi go̱o̱rɛ riɛk. Cɛ ɣä jäk kä raan go̱rɛ mänkä kɛnɛ gaatkä, kä go̱o̱rɛ da̱a̱pdä kɛnɛ ciɛk in bo̱r, kä /ka̱n kɛ pen jɛ.”

⁸ Kä cu bööth diaal kɛ nɛy diaal ɛ jiök i̱, “/Cu jɛ liŋ kä cu riɛk kɛ jɛ.”

⁹ Kä cuɛ ja̱a̱k Bɛn-a-dad jiök i̱, “La̱rɛ jɛ kuäärä ni kuäär i̱ ‘Tin diaal tin ci thiec kɛ nhiam kä kuanydu bäkɛ la̱t. Duundɛ ɣöö ti̱ti̱ /cä kɛ bi la̱t.’ ” Kä cu ja̱a̱k ruac luɔ̱c Bɛn-a-dad.

¹⁰ Kä cu Bɛn-a-dad jɛ jäk kä raan wëë i̱, “Dëë Kuɔth ɣä näk, mi wëë tekɛ tup mi bi duɔth tetni nɛɛnikä diaal tin guɔ̱ɔ̱rkɛ ɣä.”

¹¹ Kä cu kuäär I-thɛ-rɛl ɛ loc i̱, “Jiökɛ jɛ i̱, ‘Ci raan rɔɔdɛ a liak a /kenɛ duɔ̱ɔ̱r ni la̱t, la jɛ a latdi a cɛ thuɔ̱k.’ ”

¹² Kä min ci Bɛn-a-dad ruac ɛmɔ liŋ guäth in mäthɛ kɛ kɔaŋ kɛnɛ kua̱r rɛy ka̱a̱t, cuɛ nɛɛkɛ jiök i̱, “Kuanyɛ tuɔ̱ŋ.” Kä cukɛ wec kuëny tuɔ̱ŋ.

¹³ Kä nɛnɛ cu gök ben thieekä Ɛ̈-ɣab kuäär I-thɛ-rɛl, kä cuɛ jiök i̱, “Nɛmɛ ɛ min laar Kuoth Nhialɛ nɛni nɛy ti ŋuan ti̱ti̱? Ɛn walɛ bäkɛ ka̱m ji̱. Kä biɛ cu ŋa̱c ɛn ɣöö ɛ ɣän Kuoth Nhial.”

¹⁴ Kä cu Ɛ̈-ɣab wëë, “Kä ɛ ɣän bi jɛ la̱t ɔ?” Kä cu gök ɛ loc i̱, “Nɛmɛ ɛ min laar Kuoth Nhial ɛ bi ŋuɛ̈tni kɔaar bo̱o̱thä wec ɛ la̱t.” Kä cuɛ wëë, “Kä ɛŋa bi ko̱r tok ɔ?” Kä cu gök ɛ loc i̱ “Ɛ ji̱n.”

¹⁵ Cuɛ ji̱ kɔaari bööthni wi̱i̱ni ma̱a̱t kä cukɛ a kur rɛw wi̱cdɛ jiɛn da̱ŋ diɔ̱k wi̱cdɛ rɛw. Kä cuɛ ji̱ I-thɛ-rɛl diaal ti bathdɔɔri bärɔw car kɔɔriɛn.

¹⁶ Kä cukɛ wä raar kɛ bua̱k ca̱ŋ, guäth in mäth Bɛn-a-dad kɛ kɔaŋ rɛy bi̱lɛkä, kɛnɛ kua̱r ti jiɛn da̱ŋ diɔ̱k tin lua̱kɛ jɛ.

¹⁷ Kä cu ji̱ kɔaari bööthni wec wä raar kɛ nhiam. Kä cu Bɛn-a-dad naath ja̱k, kä cua jɛ ben jiök i̱, “Bä naath raar kä Tha-mɛ-ria.”

¹⁸ Kä cuɛ wëë, “Mi bäkɛ raar kɛ mal ka̱pɛ kɛ a tëk, kä mi bäkɛ raar kɛ ko̱r ka̱pɛ kɛ a tëk.”

¹⁹ Cu ŋuɛ̈tni kɔaari bööthni wi̱i̱ni wä raar rɛy wec kɛ nɛy tëë guɔ̱ɔ̱rkɛ kɛ.

²⁰ Kä cu ramɔ ram in lot ni jɛ näk. Kä cu ji̱ Thi-ri-ya rɔ bar kä cu I-thɛ-rɛl kɛ guɔ̱ɔ̱r, duundɛ ɣöö cu Bɛn-a-dad kuäär Thi-ri-ya rɔ bar kɛ jiök tuɔ̱ruɔ̱k kɛnɛ ji̱ jiöŋkööri.

²¹ Kä cu kuäär I-thɛ-rɛl jio̱o̱k tuɔ̱ruɔ̱k kɛnɛ thurbiɛɛli käp, kä cuɛ ji̱ Thi-ri-ya näk ɛlɔ̱ŋ.

²² Kä cu gök ben kä kuäär I-thɛ-rɛl, kä cuɛ jiök i̱, “Bër bum rɔ, kä ŋäcni min bi la̱t agɔaa. Kɛ ɣöö i̱ ruel bi kuäär Thi-ri-ya ben nyiëëny kɛ ji̱.”

Mäk Thi-ri-ya in rɛwdɛ

²³ Kä cu ji̱ kɔaar kua̱r Thi-ri-ya kuäär jiök i̱, “Kuthkiɛn kɛ kuth päämni, kɛ kui̱c ɛmɔ bum ni kɛn kä kɔn. Duundɛ ɣöö mi nyiëëny kɔn kɛ kɛ dɛɛkä, kɛ thuɔ̱k dëë buɔ̱m ni kɔn kä kɛ.

²⁴ Kä lätni nɛmɛ. Woc kua̱r, kä läthni bööth rɛ̈m gua̱thnikiɛn.

²⁵ Kä kuany rɛm mi ce̱tkɛ mëë ci bath, jio̱k tuɔ̱ruɔ̱k kɛ jio̱k tuɔ̱ruɔ̱k, thurbil kɛ thurbil. Inɔ banɛ cu nyieenykɛ kɛ dɛɛkä kɛ thuɔ̱k bi buɔ̱m ni kɔn kä kɛ.” Kä cu kuäär ni Bɛn-a-dad ruacdiɛn liŋ, cuɛ la̱t ni̱nɔ.

²⁶ Kä kɛ ruel cu Bɛn-a-dad ji̱ Thi-ri-ya mat, kä cuɛ wä kä Ä-pek wëë nyiëëny kɛ I-thɛ-rɛl.

²⁷ Kä cu ji̱ I-thɛ-rɛl rɔ̱ mat kä cukɛ rɔ̱ rialikä, kä cukɛ wä kä kɛ. Kä cu ji̱ I-thɛ-rɛl pua̱t nhiamdiɛn ce̱tkɛ buɔ̱n deet böwni ti tɔt, kä ji̱ Thi-ri-ya ca thiäŋ ni dɔr.

²⁸ Kä cu raan Kuɔth ben thiekä kä cuɛ kuäär I-thɛ-rɛl jiök i̱, “Nɛmɛ ɛ min laar Kuoth Nhialɛ i̱, ‘Kɛ ɣöö caar ji̱ Thi-ri-ya jɛ Kuoth Nhial ɛ Kuoth päämni /ciɛ Kuoth löli, kɛ kui̱c ɛmɔ ɣän bä ji̱ ka̱m kɛn nɛy ti ŋuan ɛlɔ̱ŋ inɛ ti, kä biɛ cu ŋa̱c ɛn ɣöö ɛ ɣän Kuoth Nhial.’ ”

²⁹ Kä cukɛ pua̱t a lot kɛn ni rɔ̱ kɛ ni̱n bärɔw. Kɛ bärɔw ni̱ni cu ko̱r röm. Kä cu ji̱ I-thɛ-rɛl ji̱ Thi-ri-ya näk nɛy ti bathdɔɔri ti kuɔ̱r kɛl kɛ cäŋ kɛl.

³⁰ Kä cu duɔthkiɛn rɔ̱ bar kä Ä-pek. Kä cu päny nɛy ti bathdɔɔri ti jiɛn da̱ŋ rɛw wi̱cdɛ bärɔw tëë ci duɔth tethikä. Kä Bɛn-a-dad cuɛ rɔ bar bä, kä cuɛ rɔ wä tɛ̱̈ɛ̱̈ duëël rɛci kä duël wec.

³¹ Kä cu ji̱ kɔaarɛ jɛ jiök i̱, “Nɛnɛ täämɛ, ca̱kɔ liŋ ɛn ɣöö kua̱r I-thɛ-rɛl kɛ kua̱r ti tekɛ pälikä. Yianɛ bieyni cuali lɛtdan kä banɛ wuɔ̱th kɔn kum, kä banɛ wä kä kuäär I-thɛ-rɛl. Dɔ̱ŋ bɛ ji̱ päl a tëk.”

³² Kä cukɛ lɛtkiɛn yiɛn kɛ bieyni cuali. Kä cukɛ wuɔ̱thkiɛn rith, kä cukɛ ben kä kuäär I-thɛ-rɛl kä cukɛ wëë, “Ci kuanydu ni Bɛn-a-dad wëë, ‘La̱ŋä ni ji̱ jak ni ɣä kä tëk.’ ” Kä cu Ɛ̈-ɣab wëë “Ŋotdɛ kɛ tëk? Ɛ dämaar.”

³³ Kä täämɛ cu ji̱ kɔaar Bɛn-a-dad ɛ käp ala nyuuth mi gɔaa, kä cukɛ jɛ yuɔ̱th thi̱n kɛ pɛ̈th i̱, “Ɣɔ̱ɔ̱n, dämuɔɔr ni Bɛn-a-dad.” Kä cuɛ wëë, “Wiaa nööŋɛ jɛ.” Kä cu Bɛn-a-dad ben kä jɛ. Kä cuɛ Bɛn-a-dad jak kä ko̱tdɛ rɛy thurbiɛɛl.

³⁴ Kä cu Bɛn-a-dad jɛ jiök i̱, “Wi̱i̱ tëë ci gua̱a̱r kɛ ka̱n kä guur bäkɛ luɔ̱c ji̱. Kä deri rɔ cu la̱t duka̱ni kä Da-math-kɛth, ce̱tkɛ mëë ci gua̱a̱r ɛ la̱t kä Tha-mɛ-ria.” Kä cu Ɛ̈-ɣab wëë, “Ɣän bä ji̱ jak kä wä kɛ kui̱ rieetni ti̱ti̱.” Inɔ cuɛ ruac mat kɛ jɛ kä cuɛ jak kä wä.

Luk go̱kä kɛ Ɛ̈-ɣab

³⁵ Tëë kɛ wut kä gaat göökni cuɛ däman jiök kɛ ruac Kuɔth Nhial i̱, “Yɔ̱t ɣä la̱ŋä ni ji̱.” Duundɛ ɣöö cu wut yɔ̱a̱tdɛ lo̱k.

³⁶ Kä cuɛ jɛ jiök i̱, “Kɛ ɣöö /keni ruac Kuɔth Nhial luɔ̱th, niɛ mɔ bi jiɛɛnɔ ɛn wa̱nɛ, bi lony ji̱ cam.” Kä niɛ min däkɛ piny cuɛ röm kɛ lony kä cuɛ jɛ cam.

³⁷ Kä cuɛ wut mi dɔ̱ŋ jek, kä cuɛ wëë, “Yɔ̱t ɣä la̱ŋä ni ji̱.” Kä cu wut ɛ yɔ̱t, kä cuɛ jɛ moc buɔ̱t.

³⁸ Kä cu gök jiɛn cuɛ kuäär wä lip dup, kä cɛ rɔ jay kɛ ɣöö cɛ waŋdɛ yiɛn.

³⁹ Kä min wä kuäär, cuɛ cɔl wëë i̱, “Kuanydu cɛ wä däär köör. Kä nɛnɛ, cu raan rɛ̈m ɣä nöŋ raan kä cuɛ ɣä jiök i̱, ‘Tit wut ɛ mi. Mi wëë wä bath, bi li̱w kɛ gua̱a̱thdɛ, kiɛ bi bathdɔɔri diɔ̱k kä ciɛk in bo̱r mi ko̱k ko̱k ŋun.’

⁴⁰ Kä min lät kuanydu wa̱nɛ mɛ kɛnɛ wi̱ni ɛ mi cɛ wä ɛn raan.” Kä cu kuäär I-thɛ-rɛl ɛ jiök i̱, “Nɔmɔ ɛ ruacdu. Ciɛ lat niɛ ji̱n puɔ̱nydu.”

⁴¹ Kä cuɛ pɛ̈th kɛ käm yieenä raar waaŋdɛ. Kä cu kuäär I-thɛ-rɛl ɛ ŋic ɛn ɣöö ɛ ram kɛl kä go̱o̱k.

⁴² Kä cuɛ jiök i̱, “Nɛmɛ ɛ min laar Kuoth Nhial ɛ i̱, ‘Kɛ ɣöö ci ram in cä lar i̱ bi li̱w jak kä wä baaŋ, kɛ kui̱c ɛmɔ bi li̱w kɛ gua̱a̱thdɛ, kä bi nɛɛku li̱w kɛ gua̱a̱th nɛɛnikɛ.’ ”

⁴³ Kä cu kuäär I-thɛ-rɛl wä dhɔrɛ kɛ kɛ̈c kɛnɛ jiath lɔaac, kä cuɛ ben kä Tha-mɛ-ria.