1 Kua̱r 19 - RUAC KUƆTH IN RƐL RƆ

E-li-yaa Pääm Thi-nay

¹ Kä cu Ɛ̈-ɣab I-dhɛ-bɛl la̱t tin diaal tin ci E-li-yaa kɛ la̱t, kɛnɛ näk in cɛ näk go̱o̱k diaal.

² Kä cu I-dhɛ-bɛl E-li-yaa jäk kä raan wëë i̱, “Dëë Kuoth ɣä näk, mi /ka̱n tëkdu jak kä ce̱tkɛ tëk raam kɛl kä kɛ iruun kɛ pek mi ce̱tkɛ nɛ.”

³ Kä cu E-li-yaa dual, kä cuɛ rɔ bar kɛ kui̱ teekädɛ, kä cuɛ ben kä Ber-cɛ-ba, kä Juda, kä cuɛ kuanydɛ ba̱ny thi̱n.

⁴ Duundɛ ɣöö jɛn puɔ̱nydɛ cuɛ wä ja̱l rɛy dɔaar kɛ cäŋ kɛl, kä cuɛ ben nyuur thaar jiath, kä cuɛ pal kɛ ɣöö derɛ li̱w wëë i̱, “Cɛ ro̱ŋ lö Kuoth Nhial, ɛn täämɛ ku yiëëdä naŋ, /ci gɔaa ni ɣän kä gua̱a̱ri.”

⁵ Kä cuɛ niɛɛn thaar jiath. Kä nɛn ɛ, cu jääk Kuɔth Nhial ɛ thiap, kä cuɛ jɛ jiök i̱, “Jiɛc rɔ mi̱thni.”

⁶ Kä cuɛ guic, kä nɛn ɛ raŋädɛ tëë kɛ mi̱eth mi ca bul kɛ pääm ti lëth lëëth kɛnɛ cuk pi̱i̱ni. Kä cuɛ mi̱th kä cuɛ maath, kä cuɛ rɔ nyɔk kɛ tɔ̱ɔ̱c.

⁷ Kä cu jääk Kuɔth Nhial rɔ nyɔk kɛ ben, kä cuɛ jɛ thiap, kä cuɛ wëë, “Jiɛc rɔ mi̱thni, ja̱l bɛ di̱t kä ji̱ ɛlɔ̱ŋ.”

⁸ Kä cuɛ rɔ jiɛc, cuɛ mi̱th kä cuɛ maath, kä cuɛ wä ni kä Thi-nay pääm Kuɔth Nhial kɛ jɛn buɔ̱m mi̱eth ɛ mɔ kɛ ni̱n ti jiɛn ŋuaan.

⁹ Ɛn wi̱ni cuɛ ben cieŋ kɔ̱kä. Kä nɛnɛ, cu ruac Kuɔth Nhial ben kä jɛ, kä cuɛ jɛ jiök i̱, “Ɛŋu mi lätdi ɛn wa̱nɛ mi E-li-yaa?”

¹⁰ Kä cuɛ loc i̱, “Ɣän cä tekɛ tiɛɛl kɛ Kuoth Nhial, Kuoth in la Ruey Ɣɔaa. Kɛ ɣöö ci ji̱ I-thɛ-rɛl gukdɛ lo̱k, kä ca yi̱kdɛ däk, kä ca göökɛ näk kɛ thɛp. Kä ɛ ɣän kärɔa ci duɔth ɔ. Kä go̱r kɛn näkdä bä.”

¹¹ Kä cu Kuoth Nhial jɛ jiök i̱, “Wër nhiam, wër cuŋni wi̱i̱ pa̱a̱m nhiamdä.” Kä nɛnɛ, cu Kuoth wä kɛ ɛn wa̱nɛ mɔ, kä cu jiɔam mi di̱i̱t mi bum bum päm tiath, kä cuɛ guiy thor nhiam Kuɔth Nhial. Duundɛ ɣöö /ci Kuoth Nhial te rɛy jiɔam. Kä kɛ kɔr jiɔam cua lath piɛny. Duundɛ ɣöö /ci Kuoth Nhial te kä lath piɛny.

¹² Kä kɛ kɔr lathä piɛny, cua mac, duundɛ ɣöö /ci Kuoth Nhial te rɛy maac. Kä kɛ kɔr maac, cua luɔw.

¹³ Kä min ci E-li-yaa jɛ liŋ, cuɛ wi̱cdɛ kum kɛ bi̱i̱dɛ kä cuɛ ben cuɔ̱ŋ thok kɔ̱kä. Kä nɛnɛ ɛn wa̱nɔ cu jɔw ben kä jɛ wëë i̱, “Ɛŋu lätdi ɛn wa̱nɛ mi ɔ E-li-yaa?”

¹⁴ Kä cuɛ loc i̱, “Ɣän la̱tdä Kuoth Nhial, Kuoth in la Ruey Ɣɔaa ni ciaŋ. Duundɛ ɣöö ci ji̱ I-thɛ-rɛl gukdɛ lo̱k, kä ca yi̱kdɛ däk, kä ca göökɛ näk kɛ thɛp. Kä Ɛ ɣän kärɔa ci duɔth ɔ, kä go̱r kɛn näkdä bä.”

¹⁵ Kä cu Kuoth Nhial ɛ jiök i̱, “Wër locni jɔk dup in bi̱i̱ thi̱n, wër rɛy dɔaar Da-math-kɛth. Mi wi̱i̱ cop thi̱n, yi̱r Ɣä-dha-el ala kuäär kä Thi-ri-ya.

¹⁶ Kä bi Yeɣu gat Nim-ci yi̱r ala kuäär kä I-thɛ-rɛl. Kä bi Ɛ-li-cä gat Ca-pat kä A-bel-mɛ-ɣola yi̱r ala gök kɛ gua̱a̱thdu.

¹⁷ Kä min bi rɔ bar kä thɛp Ɣä-dha-el, ba näk ɛ Yeɣu. Kä mɔ bi kään kä Yeɣu ɔ, ba näk ɛ Ɛ-li-cä.

¹⁸ Kä ŋotdɛ ɣän bä bathdɔɔri bärɔw päl kä I-thɛ-rɛl tin /ken Kuoth Baal pal, kä /ken kɛnɛ cim kɛ thukiɛn.”

Ciöt Ɛ-li-cä

¹⁹ Kä cu E-li-yaa jiɛn ɛn wa̱nɛ mɔ, kä cuɛ Ɛ-li-cä gat Ca-pat jek. Purɛ kɛ thääk wäl rɛw ti te gäk, kä ɛ jɛn cuac kɛn da̱ŋ wäl rɛw ɔ. Kä cu E-li-yaa wä kä jɛ kä cɛ bi̱i̱dɛ la̱th wi̱i̱dɛ.

²⁰ Kä cuɛ thääk päl, kä cuɛ ri̱ŋ kɔɔr E-li-yaa, kä cuɛ wëë, “A ɣä ciɛmä gua̱a̱r kɛnɛ maar, kä bä ji̱ kulɛ guɔ̱ɔ̱r.” Kä cuɛ jɛ loc i̱, “Nyɔk rɔ kɛ loc jɔk. Ɛŋu mi cä lät kä ji̱?”

²¹ Kä cu Ɛ-li-cä rɔ riet kɔɔrɛ, kä cuɛ gäk thääkni ka̱n, kä cuɛ thääk näk, kä cuɛ ri̱ŋkiɛn thal kɛ gäkdiɛn. Kä cuɛ ka̱m naath, kä cukɛ mi̱th. Kä cuɛ rɔ jiɛc, cuɛ E-li-yaa guɔ̱ɔ̱r, kä cuɛ jɛ lätikä.