1 Kua̱r 18 - RUAC KUƆTH IN RƐL RƆ

E-li-yaa kɛnɛ gök kuɔth Baal

¹ Kɛ kɔr ni̱ni ti ŋuan kɛ diɔ̱ɔ̱k runi cu riet Kuɔth Nhial ben kä E-li-yaa wëë i̱, “Wër nyuthni rɔ Ɛ̈-ɣab, kä bä nhiaal cu jak kä dɛm.”

² Inɔ cu E-li-yaa rɔ wä nyuɔ̱th Ɛ̈-ɣab. Kä täämɛ rɛ̈ɛ̈th di̱tdɛ kä Tha-mɛ-ria.

³ Kä cu Ɛ̈-ɣab O-bad-yaa min guic dhɔr kua̱r cɔl. (Kä täämɛ O-bad-yaa ŋääth ɛ Kuoth Nhial ɛlɔ̱ŋ.

⁴ Kä mëë näk I-dhɛ-bɛl go̱o̱k Kuɔth Nhial, cu O-bad-yaa go̱o̱k ti kuɔ̱r ka̱n kä cuɛ jiɛn dhieec tɔ̱w kɛɛl kɔ̱k, kä cuɛ kɛ moc mi̱eth kɛnɛ pi̱.)

⁵ Kä cu Ɛ̈-ɣab O-bad-yaa jiök i̱, “Wër luk wäŋ pi̱i̱ni diaal kɛnɛ löli diaal. Dɔ̱ŋ banɛ wal jek ti bi tëk kɛ jiök tuɔ̱ruɔ̱k kɛnɛ muɔ̱li, kɛ ɣöö thilɛ mi dëë lɛ li̱w thi̱n.”

⁶ Inɔ cukɛ däk piny cu Ɛ̈-ɣab wä kɛ duɔ̱ɔ̱pdɛ, kä cu O-bad-yaa wä kɛ duɔ̱ɔ̱pdɛ.

⁷ Kä min te O-bad-yaa dup, nɛnɛ cukɛ röm kɛnɛ E-li-yaa. Kä cu O-bad-yaa jɛ ŋic, kä cuɛ nhiamdɛ guɔ̱l piny kä cuɛ wëë, “Ɛ jɛn ji̱n kuäärä ni E-li-yaa?”

⁸ Kä cuɛ jɛ loc i̱, “Ɛ jɛn ɣän. Wër läri jɛ kuääru i̱, ‘Nɛnɛ E-li-yaa a wa̱nɛ mi.’ ”

⁹ Kä cuɛ wëë, “Ɛŋu mi cä dui̱r, mɔ kämi kuanydu Ɛ̈-ɣab, kɛ ɣöö bɛ näk ɔ?

¹⁰ Ce̱tnikɛ ciöt Kuɔth Nhial, thilɛ do̱r kiɛ kuäär a /ken kuäärä jɛ jäk kä raan ɔ go̱o̱rɛ ji̱. Kä mɔ cikɛ wëë, ‘Thilɛ jɛ wa̱nɛ mi ɔ,’ la rɔ a yaacɛ kɛ döör kiɛ kuäär, i̱ /ken kɛn ji̱ jek.

¹¹ Kä täämɛ wi̱i̱ i̱, ‘Wër läri jɛ kuääru i̱, “E-li-yaa a wa̱nɛ mi.” ’

¹² Kä niɛ mɔ bä jiɛn kä ji̱ mɔ, bi yiëë Kuɔth Nhial ji̱ naŋ guäth mi /ca bi ŋa̱c. Kä mi wa̱a̱ jɛ wä la̱r Ɛ̈-ɣab, kä /cɛ ji̱ bi jek, bɛ ɣä cu näk. A cäŋ ni mɔ ŋa̱a̱thä Kuoth Nhial ɛ ni mëë ɛ ɣän ŋuɛ̈t.

¹³ A /keni jɛ ku liŋ kuäärä ɛn min cä la̱t, mëë näk I-dhɛ-bɛl go̱o̱k Kuɔth Nhial? Cä go̱o̱k Kuɔth Nhial ti kuɔ̱r tɔ̱w rɛy kɔ̱a̱kni da̱ŋ rɛw, jiɛn dhieec kɛɛl, kä cua̱ kɛ moc mi̱eth kɛnɛ pi̱.

¹⁴ Kä täämɛ jiök i̱ ɣä wër läri jɛ kuääru i̱, ‘E-li-yaa a wa̱nɛ mi’ kä bɛ ɣä cu näk.”

¹⁵ Kä cu E-li-yaa jɛ loc i̱, “Ce̱tkɛ ciöt Kuɔth Nhial ɛ ta̱a̱ cuŋä nhiamdɛ mi kɛ thuɔ̱k ɣän bä rɔ nyuɔ̱th jɛ ɛn walɛ.”

¹⁶ Kä cu O-bad-yaa wä jek kɛ Ɛ̈-ɣab, kä cuɛ la̱r jɛ. Kä cu Ɛ̈-ɣab wä jek kɛ E-li-yaa.

¹⁷ Kä min ci Ɛ̈-ɣab E-li-yaa nɛn, cuɛ jiök i̱, “Ɛ ji̱n dääk I-thɛ-rɛl?”

¹⁸ Kä cu E-li-yaa jɛ loc i̱, “Ɣän /ka̱n I-thɛ-rɛl däk, Ɛ ji̱n ci jɛ däk ɔ, yɛnɛ dhɔr guur, kɛ ɣöö ci guɔ̱ɔ̱r ni kuoth Baal kä ci luek Kuɔth Nhial lo̱k.

¹⁹ Kɛ kui̱c ɛ mɔ täämɛ wër mat ji̱ I-thɛ-rɛl diaal bä wä röm kɛ kɛ pääm Kar-mɛl. Kä no̱o̱ŋni go̱o̱k kuoth Baal tin kur ŋuaan wi̱cdɛ jiɛn dhieec, kɛ go̱o̱k Ä-ce-ra tin kur ŋuaan, tin mi̱th kɛɛl kɛ I-dhɛ-bɛl.”

²⁰ Kä cu Ɛ̈-ɣab ji̱ I-thɛ-rɛl diaal cɔl, kä cuɛ go̱o̱k mat pääm Kar-mɛl.

²¹ Kä cu E-li-yaa ben thiekä nɛɛni diaal kä cuɛ wëë, “A bi ku mäni nɛy bia ka̱c kam cäri da̱ŋ rɛw? Kä mi ɛ Kuoth Nhial la Kuoth ɔ, kä guɔ̱ɔ̱rɛ jɛ. Kä mi ɛ Baal, kä kua guɔ̱ɔ̱r.” Kä /ken naath ɛ loc kɛ riet.

²² Kä cu E-li-yaa kɛ jiök i̱, “Ɛ ɣän kärɔa la gök Kuɔth Nhial ɔ mi ci duɔth. Kä go̱o̱k kuɔth Baal kɛ nɛy ti kur ŋuaan wi̱cdɛ jiɛn dhieec.

²³ Muɔcɛ kɔn thääk da̱ŋ rɛw. Kä akɛ mëkɛ rɔ thäk kɛl, kä akɛ na̱kɛ jɛ kä ŋuɔ̱kɛ jɛ dhoon kä ba la̱th wi̱i̱ jiɛn, kä a jɛ /ca do̱p mac. Kä bä thäk in dɔ̱ŋ näk, kä bä la̱th wi̱i̱ jiɛn, kä /cä bi döp mac.

²⁴ Kä bia ciöl kuothdun, kä bä ciöl Kuɔth Nhial. Kä Kuoth ɛ bi jɛ loc kɛ mac ɔ, ɛ jɛn la Kuoth ɔ.” Kä cu nɛy diaal ɛ loc i̱, “Ɛ ruac mi gɔaa.”

²⁵ Kä cu E-li-yaa go̱o̱k kuɔth Baal jiök i̱, “Mëkɛ rɔ thäk kɛl kɛ nhiam. Kä na̱kɛ jɛ, kɛ ɣöö ŋuan ni yɛn. Kä cio̱lɛ jɛ ciöt kuɔthdun, duundɛ ɣöö /cuarɛ jɛ do̱p mac.”

²⁶ Kä cukɛ thäk in ca ka̱m kɛ ka̱n kä cukɛ jɛ näk, kä cukɛ jɛ cio̱l ciöt kuɔth Baal nikɛ runwaŋ cu mäni cäŋdäär, wäkɛ i̱, “Aɣ kuoth Baal loc nɛy!” Duundɛ ɣöö thilɛ jɔw, kä thilɛ ram mi ci kɛ loc. Kä cukɛ ka̱c wiɛl kɛ yi̱k in ci kɛn ɛ täth.

²⁷ Kɛ bua̱k ca̱ŋ cu E-li-yaa kɛ dɔl wëë i̱, “Rɔal ɛlɔ̱ŋ, kɛ ɣöö ɛn kuoth, dɔ̱ŋ jɛn a cärä, kiɛ cɛ wä thok ciek, kiɛ cɛ wä ja̱l, kiɛ dɔ̱ŋ jɛn a ni̱n a bɛ ku lɛ keer.”

²⁸ Kä cukɛ rɔal kɛ jɔw mi di̱i̱t, kä cukɛ rɔ tëm kɛ mutni kɛnɛ thɛpni ce̱tkɛ ta̱a̱diɛn in wen, amäni min ci riɛmdiɛn lo̱o̱ny.

²⁹ Kä min ci cäŋ däär wä, cukɛ te thi̱n amäni min ci cop ni gua̱a̱th mucni thiaŋ, duundɛ ɣöö cuɛ thil luɔc, cuɛ thil jɔw mi cua liŋ.

³⁰ Kä cu E-li-yaa nɛy diaal jiök i̱, “Bia thieekɛ rɔ kɛ ɣä.” Kä cu nɛy diaal ben thiekädɛ. Kä cuɛ yi̱k Kuɔth Nhial ëë ca da̱k piny nyɔk kɛ ta̱th.

³¹ Cuɛ pääm da̱ŋ wäl rɛw ka̱n ce̱tkɛ pek thuk duëli gan Je-kɔb, mëë ci riet Kuɔth Nhial ben kä jɛ i̱, “Ba ji̱ cɔl i̱ I-thɛ-rɛl.”

³² Kɛ pääm tɔ̱tɔ̱ cuɛ yi̱k täth kɛ kui̱ ciötdä Kuɔth Nhial. Kä cuɛ pul mi di̱i̱t mi dëë thiäŋ ɛ dha̱a̱ri pi̱i̱ni da̱ŋ ŋuaan tɛt wil ɛ jɛ ni yi̱k.

³³ Kä cuɛ jiɛn car thi̱n, kä cuɛ thäk ŋuɔ̱k dhoon kä cuɛ la̱th wi̱i̱ jiɛn. Kä cuɛ wëë, “Thia̱ŋɛ dha̱a̱ri pi̱i̱ni da̱ŋ ŋuaan kä wuɔcɛ kɛ kä muc in waŋkɛ, kɛnɛ jiɛn.”

³⁴ Kä cuɛ wëë, “Nyɔakɛ rɛwdɛ.” Kä cukɛ jɛ nyɔk kɛ lätni. Kä cuɛ wëë, “Nyɔakɛ diɔ̱ɔ̱kdiɛn.” Kä cukɛ diɔ̱ɔ̱kdiɛn nyɔk kɛ lätni.

³⁵ Kä cu pi̱ yi̱k wil, kä cukɛ pul thiäŋ bä.

³⁶ Kä kɛ gua̱a̱th mucä thiaŋ, cu gök ni E-li-yaa ben thiekä kä cuɛ wëë, “Aɣ Kuoth Nhial, Kuoth A-bɛ-ram, Kuoth Ay-dhɛk, Kuoth I-thɛ-rɛl, a jɛ ŋa̱ckɛ ɛn walɛ ɛn ɣöö ɛ ji̱n Kuoth kä I-thɛ-rɛl, kɛnɛ ɣöö ɛ ɣän kuanydu, kä la̱tdä ti diaal ti̱ti̱ kɛ ruacdu.

³⁷ Locä lö Kuoth Nhial, locä kɛ ɣöö bi nɛy ti̱ti̱ jɛ ŋa̱c i̱ Kuoth Nhial ɛ Kuoth, kä kɛ pɛ̈th luucni lo̱ckiɛn jɔk.”

³⁸ Kä cu mac Kuɔth Nhial ben, kä cuɛ muc in thöpkɛ kɛnɛ jiɛn pɛt, kɛ pääm, kɛ tup, kä cuɛ pi̱ tin te rɛy puɔ̱l ko̱t.

³⁹ Kä cu nɛy diaal ɛ nɛn, cukɛ wuɔ̱thkiɛn guɔ̱l piny, kä cukɛ wëë, “Kuoth Nhial ɛ Kuoth, Kuoth Nhial ɛ Kuoth.”

⁴⁰ Kä cu E-li-yaa kɛ jiök i̱, “Ka̱pɛ go̱o̱k kuɔth Baal. A thil ram kɛl mi leny.” Kä cukɛ kɛ käp, kä cu E-li-yaa kɛ nööŋ rɛy tɔ̱ɔ̱rä Ki-con, kä cuɛ kɛ näk thi̱n.

Thuɔ̱k rɛɛthä

⁴¹ Kä cu E-li-yaa Ɛ̈-ɣab jiök i̱, “Wër nhial mi̱thni kä mäthni, kɛ ɣöö liɛŋä wuɔ̱w nhial bëë kɛ.”

⁴² Kä cu Ɛ̈-ɣab wä nhial wëë mi̱th kä wëë maath. Kä cu E-li-yaa wä nhial biikä pa̱a̱m Kar-mɛl. Kä cuɛ rɔ goŋ kä cuɛ wi̱cdɛ la̱th kam ciöknikɛ.

⁴³ Kä cuɛ kuanydɛ jiök i̱, “Wër nhial ɛn täämɛ, wër guic yier.” Cuɛ jɛ wä guic kä cuɛ wëë, “Thilɛ ŋu.” Kä cuɛ jiök i̱, “Nyɔk rɔ kɛ wä ni kä bärɔw.”

⁴⁴ Kä kɛ bärɔwdiɛn cuɛ wëë, “Nɛnɛ, wuɔ̱n mi tɔt mi ce̱tkɛ tet ran a took rɔ ni wi̱i̱ yiëër.” Kä cu E-li-yaa jɛ jiök i̱, “Wër jio̱kni Ɛ̈-ɣab i̱, ‘Riali thurbiɛɛliku ikä, kä wër piny a ken nhiaal ji̱ ni ŋak.’ ”

⁴⁵ Kä kɛ kɔr kä mi tɔt cu nhial cual kɛ wuɔ̱n kɛnɛ jiɔam, kä cua nhiaal mi di̱i̱t. Kä cu Ɛ̈-ɣab wä kä Yidh-rɛɛl.

⁴⁶ Kä cu Kuoth Nhial te kɛɛl kɛ E-li-yaa cuɛ bieynikɛ yian lɛtdɛ kä cuɛ ri̱ŋ nhiam Ɛ̈-ɣab wëë kä Yidh-rɛɛl.