1 Kua̱r 17 - RUAC KUƆTH IN RƐL RƆ

Lär E-li-yaa kɛ rɛ̈ɛ̈th mi bi ben

¹ Täämɛ cu E-li-yaa raan Tic-be mi cieŋ kä Gil-yad Ɛ̈-ɣab jiök i̱, “Ce̱tnikɛ ciöt Kuɔth Nhial Kuoth I-thɛ-rɛl, mi ta̱a̱ cuŋä nhiamdɛ mi, /cɛ bi tekɛ thäc kiɛ nhiaal ɛn runi ti̱ti̱, ɛ ni mi cä lar.”

² Kä cu riet Kuɔth Nhial ben kä jɛ i̱,

³ “Jiɛyni ɛn wa̱nɛ mi, kä wër tɔ̱w rɔ thiekä waŋ Kɛ-rith nhiam cieŋ, min la nhiam kiɛɛr Jɔr-dɛn.

⁴ Kä bi maath rɛy waŋ, kä bä jakɔa̱a̱k jak kä mi̱eeth kɛ ji̱.”

⁵ Kä cuɛ wä la̱t ce̱tnikɛ riet Kuɔth Nhial. Kä cuɛ wä ciɛŋ ni waŋ Kɛ-rith nhiam kiɛɛr Jɔr-dɛn.

⁶ Kä la jakɔa̱a̱k jɛ a no̱ŋ juray kɛnɛ ri̱ŋ kɛ thiaŋ kɛnɛ runwaŋ. Kä la mäthɛ rɛy waŋ.

⁷ Kɛ kɔr kä mi tɔt cu waŋ kööt, kɛ ɣöö thilɛ nhiaal muun.

E-li-yaa kɛnɛ ciek jɔkä kä Dhar-pɛ̈th

⁸ Kä cu riet Kuɔth Nhial ben kä E-li-yaa i̱,

⁹ “Jiɛc rɔ, wër kä Dhar-pɛ̈th wec Dhi-don, wër cieŋni thi̱n. Kä nɛnɛ ɣän cä ciek jɔkä jiök i̱ bɛ ji̱ mi̱eeth.”

¹⁰ Kä cuɛ wä kä Dhar-pɛ̈th. Kä min cɛ cop thok wec, nɛnɛ ciek jɔkä kuanyɛ tɛy, kä cuɛ jɛ cɔl jiökɛ Jɛ i̱, “Nöŋ ni ɣä pi̱ ti tɔt kɛ liɛɛr, ti bä ben math.”

¹¹ Kä min wä ciek pi̱ nööŋ cuɛ jiök i̱, “Nöŋ ni ɣä dhuɔn kua̱n kɛ tetdu bä.”

¹² Kä cuɛ loc i̱, “Ce̱tnikɛ ciöt Kuɔth Nhial Kuothdu, thilɛ ɣä mi̱eth mi ci tuak, te ni tet wacä rɛy thaak, kɛnɛ liɛɛth mi tɔt thaar ɣo̱kä. Ɛn täämɛ kuanyɛ ni tɛy, kɛ ɣöö dëë wä tha̱l rɔ kɔnɛ gatdä, ba̱kɔ cam kä ba̱kɔ cu cuc amäni lia̱a̱da.”

¹³ Kä cu E-li-yaa jɛ jiök i̱, “/Cu dual. Wër lätni jɛ ce̱tkɛ mɔ ci larɔ. Duundɛ ɣöö kɛ nhiam lätni ɣä pat pat mi tɔt thi̱n, kä biɛ nöŋ ɣä, bi rɔ ku lɛ thätikä yɛnɛ gatdu.

¹⁴ Kɛ ɣöö bɛ cua̱ min ci Kuoth Nhial Kuoth I-thɛ-rɛl ɛ lar i̱, ‘/Ci thak wacä bi gääm, kä /ci ɣök liɛth bi thuɔ̱k, amäni cäŋ in bi Kuoth Nhial piny jäk kä nhiaal.’ ”

¹⁵ Kä cu ciek wä la̱t ni min ci E-li-yaa jɛ lar. Kä cu E-li-yaa kɛnɛ ciek kɛ ji̱ dhɔaarɛ diaal mi̱th kɛ ni̱n ti ŋuan.

¹⁶ /Ken thak wacä gääm, kä /ken ɣök liɛth thuɔ̱k, ce̱tnikɛ riet Kuɔth Nhial mëë cɛ lat kɛ E-li-yaa.

¹⁷ Kɛ kɔrɛ cu gat ciek in la man cieŋ tekɛ juey. Kä cua juey mi bɛc mi cu jɛ näk.

¹⁸ Kä cuɛ E-li-yaa jiök i̱, “Ɛŋu tɛɛri mɔ kɛ ɣä, lö raan Kuɔth? Ji̱n bi̱i̱ kɛ ɣöö bi duerä ben tim kä bi gatdä näk!”

¹⁹ Kä cu E-li-yaa jɛ loc, “Käm ni ɣä gatdu.” Kä cuɛ jɛ ka̱n buɔ̱ɔ̱rɛ, kä cuɛ jɛ naŋ duëël nhial, guäth tɔ̱ɔ̱cädɛ, kä cuɛ jɛ tɔa̱a̱c rɛy kölikɛ.

²⁰ Kä cuɛ Kuoth Nhial pal, “Kuoth Nhial Kuothdä, ɛŋu ci ciek jɔkä nɛmɛ mi cieŋä dhɔrɛ mi, lɛ moc riɛkɔ, kɛ lia̱a̱ gatdɛ?”

²¹ Ɛ jɛn cuɛ rɔ riny wi̱i̱ dhöl kä diɔ̱ɔ̱k, kä palɛ Kuoth Nhial i̱, “Aɣ Kuoth Nhial Kuothdä, jak ni yiëë gatdä nɛmɛ kä luny kä jɛ.”

²² Kä cu Kuoth Nhial E-li-yaa liŋ. Kä cu yiëë gatdä luny kä jɛ, kä cuɛ rɔ nyɔk kɛ tëk.

²³ Kä cu E-li-yaa gat nööŋ piny duëël in te nhial cuɛ naŋ duëël piɛny. Kä cuɛ jɛ Ka̱m man kä cuɛ wëë, “Nɛnɛ gatdu cɛ tëk.”

²⁴ Kä cu ciek E-li-yaa jiök i̱, “Ɛn täämɛ cä ŋa̱c ɛn ɣöö ɛ ji̱n raan Kuɔth, kä ruac Kuɔth Nhial in te ji̱ ɛ thuɔ̱k.”