1 Kua̱r 15 - RUAC KUƆTH IN RƐL RƆ

Kuäär Juda ni Ä-bi-yam

¹ Kɛ wäl bädäk runi ruëc Ya-rɔ-baam gat Nɛ-bat, cu Ä-bi-yam a kuäär kä Juda.

² Cuɛ ruëc kɛ run diɔ̱k kä Jɛ-ru-tha-lɛm. Kä cɔalkɛ man Maakaa nyaa wutdä mi cɔal i̱ Ä-bi-ca-lom.

³ Kä cuɛ guɔ̱ɔ̱r ni dueer diaal tëë ci gua̱n kɛ la̱t nhiamdɛ. Kä /kenɛ lɔcdɛ kɛɛliw ka̱m Kuoth Nhial ni Kuothdɛ, ce̱tkɛ gua̱n ni Dee-bid.

⁴ Kä kɛ kui̱ Dee-bid cu Kuoth Nhial Kuothdɛ jɛ moc kuäär kä Jɛ-ru-tha-lɛm, cuɛ gatdɛ jak kä kuäär, mi cu Jɛ-ru-tha-lɛm jak kä bum.

⁵ Kɛ ɣöö Dee-bid cɛ la̱t ni cuŋ waaŋ Kuɔth Nhial, /kenɛ rɔ riet gekä kä tëë diaal te cɛ la̱t jɛ kɛ ni̱n teekädɛ diaal, ɛ ni duŋ U-ri-yaa raan Ɣɛ̈th.

⁶ Kä kɛ ni̱n teekä Ä-bi-yam diaal cuɛ tekɛ ko̱r kamdɛ kɛnɛ Ya-rɔ-baam.

⁷ Kä cua duɔth lätnikɛ diaal gɔ̱a̱r rɛy buɔk kuɛ̈ɛ̈ni kua̱ri Juda. Kä cuɛ tekɛ ko̱r kamdɛ kɛnɛ Ya-rɔ-baam.

⁸ Kä cu Ä-bi-yam li̱w. Kä cukɛ jɛ kony därwec Dee-bid. Kä cu gatdɛ ni Atha ruëc kɛ gua̱a̱thdɛ.

Kuäär Juda ni Atha

⁹ Kɛ jiɛn da̱ŋ rɛw runi ruëc Ya-rɔ-baam kuäär I-thɛ-rɛl, cu Atha a kuäär Juda.

¹⁰ Kä cuɛ ruëc kä Jɛ-ru-tha-lɛm kɛ run ti jiɛn ŋuaan wi̱cdɛ kɛl. Kä cɔalkɛ man i̱ Maakaa nya wutdä mi cɔal i̱ Ä-bi-ca-lom.

¹¹ Kä cu Atha la̱t ni cuŋ nhiam Kuɔth Nhial, ce̱tnikɛ mëë ci gua̱n ni Dee-bid ɛ la̱t.

¹² Kä cuɛ tut diaal kɛnɛ ŋut tin la̱tkɛ nyin riärä gua̱thni tin palkɛ guäy thi̱n woc wi̱c, kä cuɛ kuth diaal tin ci gua̱nikɛ la̱t woc.

¹³ Kä cuɛ mandɔŋdɛ ni Maakaa woc kä ɣöö ɛ ciek kua̱r, kɛ ɣöö cɛ kuth Ä-ce-ra täth. Kä cu Atha kuoth mandɔɔŋdɛ da̱k piny kä cuɛ jɛ waŋ rɛy tɔ̱ɔ̱rä Kid-ron.

¹⁴ Duundɛ ɣöö gua̱th pali kuthni baaŋ /ka̱n kɛ däk. Kä cu Atha lɔcdɛ ka̱m Kuoth Nhial kɛɛliw kɛ ni̱n teekädɛ diaal.

¹⁵ Kä cuɛ muc yäcä gua̱n kɛnɛ muc yäcädɛ nööŋ rɛy luak Kuɔth Nhial, da̱a̱p kɛnɛ ciɛk in bo̱r, kɛ kuak.

¹⁶ Kä cuɛ tekɛ ko̱r kam Atha kɛnɛ Bɛ̈ca kuäär I-thɛ-rɛl kɛ ni̱n kuäärädiɛn.

¹⁷ Cu Bɛ̈ca kuäär thuk duëli kuec caam Juda wä mak, kä cuɛ Rama täth, kɛ ɣöö bɛ thil ram mi bä raar kiɛ wä rɛc kä kuäär Juda ni Atha.

¹⁸ Kä cu Atha da̱a̱p kɛnɛ ciɛk in bo̱r min ci duɔ̱th guäth tɔ̱ɔ̱wä luaak Kuɔth Nhial kɛnɛ duel kua̱r ka̱n kɛɛliw. Kä cuɛ kɛ jäk kä Bɛn-a-dad gat Tɛ̈b-ri-mon, gat Ɣɛdh-ron kuäär Thi-ri-ya, min cieŋ kä Da-math-kɛth, kɛ tet ji̱ kɔaarɛ, wëë i̱,

¹⁹ “Ɛ mat te kamdan, ce̱tkɛ mëë te kam guur kɛnɛ gua̱a̱r. Kä nɛnɛ, ɣän ja̱kä ji̱ kä muc dääpä kɛnɛ ciɛk in bo̱r. Wër däk kamdu yɛnɛ Bɛ̈ca kuäär thuk duëli kuec caam, dɔ̱ŋ bɛ ɣä päl.”

²⁰ Kä cu Bɛn-a-dad ruac kua̱r ni Atha liŋ, kä cuɛ bo̱o̱th rɛ̈mdɛ ja̱k wëë wi̱i̱ thuk duëli kuec caam mak, kä cuɛ I-yon, kɛ Daan, kɛ A-bel-beth-mä-kaa, kɛ Ki-nä-rɔth kɛɛliw, kɛnɛ mun Nap-ta-li käp.

²¹ Kä mëë ci Bɛ̈ca jɛ liŋ, cuɛ ta̱th Rama ka̱p cuɔ̱ŋ, kä cuɛ ciɛŋ ni Ti̱r-dha.

²² Kä cu kuäär ni Atha ruac lat kä Juda, thilɛ ram mi cua päl, cua pääm Rama diaal kɛnɛ jiɛnkɛ kɛ tëë lätkɛ Bɛ̈ca ben deth. Kä cu kuäär ni Atha kɛ lät Gabä wec Ben-ya-min kɛnɛ Midh-pa.

²³ Kä cua duɔth lätnikɛ diaal, nikɛ buɔ̱mdɛ, nikɛ wec in cɛ täth, gɔ̱a̱r rɛy buɔk kuɛ̈ɛ̈ni kua̱ri Juda. Kä kɛ ni̱n dɔŋädɛ cuɛ tekɛ jiöör ciöknikɛ.

²⁴ Kä cuɛ li̱w, kä cua jɛ kony kɛɛl kɛ gua̱ni därwec gua̱n ni Dee-bid. Kä cu gatdɛ ni Yɛ-ɣo-ca-pat ruëc kɛ gua̱a̱thdɛ.

Kuäär I-thɛ-rɛl ni Na-dab

²⁵ Kɛ rɛw runä ruëc Atha kuäär Juda, cu Na-dab gat Ya-rɔ-baam a kuäär kä I-thɛ-rɛl. Kä cuɛ I-thɛ-rɛl ruac kɛ run rɛw.

²⁶ Kä cuɛ la̱t ni dueer waaŋ Kuɔth Nhial, guurɛ ni dueer gua̱n kɛnɛ dueerkɛ tin cɛ jak ni I-thɛ-rɛl kä dui̱r.

²⁷ Kä cu Bɛ̈ca gat Ä-ɣi-yaa raan thuɔk duëël Yi-tha-kar, Na-dab ca̱p mi jiäk. Kä cuɛ jɛ näk kä Gi-bɛ-thon wec ji̱ Pi-li-thɛt. Kɛ ɣöö Na-dab kɛnɛ ji̱ I-thɛ-rɛl diaal ca Gi-bɛ-thon go̱l.

²⁸ Inɔ cu Bɛ̈ca jɛ näk kɛ diɔ̱ɔ̱k runi ruëc Atha kuäär Juda, kä cuɛ ruëc kɛ gua̱a̱thdɛ.

²⁹ Kä niɛ min ca kuäär, cuɛ ji̱ dhɔaar Ya-rɔ-baam diaal näk. Cuɛ thil mi cuɛ päl a tëk, amäni mëë cɛ däk, ce̱tnikɛ riet Kuɔth Nhial ëë laarɛ kɛ thok jäŋädɛ ni Ä-ɣi-yaa raan Cilo.

³⁰ Kɛ kui̱ dui̱rä Ya-rɔ-baam mëë cɛ la̱t, kä cɛ ji̱ I-thɛ-rɛl jak kä dui̱r, kä cɛ Kuoth Nhial Kuoth I-thɛ-rɛl jak kä gak.

³¹ Kä cua duɔth lätnikɛ diaal gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

³² Kä cuɛ tekɛ ko̱r kam Atha kuäär Juda kɛnɛ Bɛ̈ca kuäär I-thɛ-rɛl kɛ ni̱n kuäärädiɛn diaal.

Kuäär I-thɛ-rɛl ni Bɛ̈ca

³³ Kɛ diɔ̱ɔ̱k runi ruëc Atha kuäär Juda, cu Bɛ̈ca a kuäär I-thɛ-rɛl kä Ti̱r-dha. Kä cuɛ ruëc kɛ run ti jiɛn da̱ŋ rɛw wi̱cdɛ ŋuaan.

³⁴ Kä cuɛ la̱t ni dueer waaŋ Kuɔth Nhial, kä cuɛ guɔ̱ɔ̱r ni duɔ̱ɔ̱p Ya-rɔ-baam kɛnɛ dueerkɛ tin cɛ I-thɛ-rɛl jak kä dui̱r.