1 Kua̱r 14 - RUAC KUƆTH IN RƐL RƆ

Lia̱a̱ gatdä Ya-rɔ-baam

¹ Niɛ guäth ɛmɔ cu Ä-ɣi-yaa gat Ya-rɔ-baam tekɛ juey.

² Kä cu Ya-rɔ-baam ciekdɛ jiök i̱, “Jiɛc rɔ, kä jay rɔ. Kɛ ɣöö ca bi ŋa̱c i̱ ɛ ji̱n ciekdä. Kä wër kä Cilo. Kä nɛnɛ gök ni Ä-ɣi-yaa a wi̱ni, mëë jiök ɣä i̱ bi ɣän a kuäär nɛɛni ti̱ti̱.

³ Naŋ pat patni da̱ŋ wäl kɛ cuk tuar kɛ ji̱ kɛɛl, kä wër kä jɛ. Bɛ ji̱ wä la̱r mɔ bi tuɔɔk ɔ kä gat.”

⁴ Kä cu ciekdɛ jɛ la̱t. Cuɛ rɔ jiɛc kä cuɛ wä kä Cilo, cuɛ ben dhɔr Ä-ɣi-yaa. Kä täämɛ Ä-ɣi-yaa /cɛ guic, cɛ wäŋkɛ yäm kɛ ɣöö cɛ dɔŋ.

⁵ Kä cu Kuoth Nhial Ä-ɣi-yaa jiök i̱, “Nɛnɛ, ciek Ya-rɔ-baam a bä ji̱ ben thiecni kɛ kui̱ gatdɛ, kɛ ɣöö tëë kɛ juey. Nɛmɛ kɛnɛ nɛmɛ bikɛ la̱r jɛ.” Kä min cɛ ben. Cuɛ rɔ cäp ala ciek mi dɔ̱ŋ.

⁶ Kä min ci Ä-ɣi-yaa ciökɛ liŋ, min bëë rɛc thok duëël, cuɛ wëë, “Bër rɛc ciek Ya-rɔ-baam. Ɛŋu jaki rɔ kä ram mi dɔ̱diɛn ɔ? Ɣän ta̱a̱ kɛ thok mi thiɛk kɛ kui̱du.

⁷ Wër jiök ni Ya-rɔ-baam i̱, ‘Ci Kuoth Nhial Kuoth I-thɛ-rɛl wëë, “Kɛ ɣöö cä ji̱ mɛk rɛy nath, kä cä ji̱ jak kä kuäär nɛɛnikä ni ji̱ I-thɛ-rɛl,

⁸ Kä cä kuäär woc dhɔr Dee-bid kä cä ka̱m ji̱. Kä ci ŋot /keni ce̱tkɛ kuanydä ni Dee-bid, mëë ci ŋuɔ̱tkä tit kä cɛ kɛ guɔ̱ɔ̱r kɛ lɔcdɛ kɛɛliw, kä lätdɛ ni mi gɔaa waaŋdä.

⁹ Kä ci la̱t ni ti jiäk kä nɛy diaal tëë te nhiamdu kä ci rɔ wä lät kä kuth ti guäy, kä ci ɣä jak kä gak, kɛ ɣöö ci ɣä yuɔr jɔɔkdu.

¹⁰ Kɛ kui̱c ɛmɔ ɣän bä jiäk naŋ dhɔr Ya-rɔ-baam, kä bä tut diaal woc dhɔrɛ, tin la kuany kɛnɛ tin dapkɛ kä I-thɛ-rɛl, kä bä dhɔrɛ thum ce̱tkɛ min la raan kuaar a waaŋ rɛy kakä wal Na-both kɛ kui̱ kɔaŋ amäni mi cikɛ thuɔ̱k.

¹¹ Kä duŋ Ya-rɔ-baam ɛ bi li̱w ɔ rɛy wec bi jio̱o̱k ɛ cam. Kä mɔ bi li̱w dɔɔr ɔ bi diit ɛ cam.” Ruac ni Kuoth Nhial.’

¹² Kɛ kui̱c ɛmɔ wër cieŋdu. Kä niɛ cuɔ̱pdu wi̱c, bi gat li̱w.

¹³ Kä ba par ɛ ji̱ I-thɛ-rɛl diaal, kä ba kony. Kä ba jɛn ni kärɔa kä Ya-rɔ-baam min ba kony, kɛ ɣöö ɛ ni jɛn kärɔa dhɔr Ya-rɔ-baam min ci Kuoth Nhial Kuoth I-thɛ-rɛl, mi gɔaa jek kä jɛ.

¹⁴ Kä bi Kuoth Nhial rɔ kuëny kuäär kä I-thɛ-rɛl, min bi dhɔr Ya-rɔ-baam däk ɛn walɛ, a wëë wä.

¹⁵ Kä bi Kuoth Nhial ji̱ I-thɛ-rɛl duäc, ce̱tkɛ min la guɔ̱t a lathɛ rɛy pi̱i̱ni, kä bɛ I-thɛ-rɛl jak kä thil thar ɛn muun ɛgɔaa ɛ cɛ ka̱m gua̱ni mi, kä bɛ kɛ däk kä Yu-pɛ-ree-tidh, kɛ ɣöö cikɛ kuthkiɛn la̱t, kua Kuoth Nhial lɛ jak kä gak.

¹⁶ Kä bɛ I-thɛ-rɛl päl kɛ kui̱ dui̱rä Ya-rɔ-baam min cɛ la̱t, kä cɛ I-thɛ-rɛl jak kä dui̱r.”

¹⁷ Kä cu ciek Ya-rɔ-baam jiɛn, kä cuɛ ben kä Ti̱r-dha. Kä min cupɛ do̱o̱r cieŋ cu gat li̱w.

¹⁸ Kä cua kony ɛ ji̱ I-thɛ-rɛl diaal, kä cua par, ce̱tnikɛ ruac Kuɔth Nhial mëë cɛ lat kɛ thok gök ni Ä-ɣi-yaa.

Lia̱a̱ Ya-rɔ-baam

¹⁹ Kä cua duɔth lätni Ya-rɔ-baam gɔ̱a̱r rɛy buɔk kuɛ̈ɛ̈ni kua̱ri I-thɛ-rɛl.

²⁰ Kä cu pek ëë ruec kɛ Ya-rɔ-baam a run ti jiɛn da̱ŋ rɛw wi̱cdɛ rɛw. Kä cuɛ li̱w, kä cu gatdɛ ni Na-dab ruëc kɛ gua̱a̱thdɛ.

Rɛ-ɣɛ̈-bɔm kuäär Juda

²¹ Kä täämɛ cu Rɛ-ɣɛ̈-bɔm gat Thɔ-lo-mon a kuäär kä Juda. Kä mëë tokɛ kuäär tëë kɛ run ti jiɛn ŋuaan wi̱cdɛ kɛl, kä cuɛ ruëc kä Jɛ-ru-tha-lɛm kɛ run wäl bärɔw, wec ëë ci Kuoth Nhial ɛ mɛk rɛy thuk duëli I-thɛ-rɛl diaal, kɛ ɣöö ba jɛ pal thi̱n. Kä cɔal kɛ man i̱ Naamaa kä ji̱ Am-on.

²² Kä cu Juda jiäk la̱t waaŋ Kuɔth Nhial, cukɛ jɛ jak kä tëë tiɛɛl kɛ kui̱ dueeri tin ci kɛn kɛ la̱t cu ŋuan ni kɛn kä dueer tëë ci gua̱ni kɛ la̱t.

²³ Kä cikɛ rɔ ta̱th gua̱th pali, kɛnɛ ri̱ek, kɛ Ä-ce-rim wuɔ̱thni päämni diaal kɛnɛ thär jiɛn tin tɔ̱ɔ̱c.

²⁴ Kä te wec kɛ wutni kɛnɛ män ti ria̱r. Kä cukɛ la̱t ni jiäk dööri diaal tëë ci Kuoth Nhial kɛ joc nhiam ji̱ I-thɛ-rɛl.

²⁵ Kɛ dhieec runi ruëc kua̱r ni Rɛ-ɣɛ̈-bɔm, cu Ci-cɛ̈k kuäär I-jëp kɛ Jɛ-ru-tha-lɛm mak.

²⁶ Kä cuɛ kuak luaak Kuɔth Nhial kɛnɛ kuak duëël kua̱r ben naŋ. Cuɛ ti diaal naŋ, cuɛ kɛ naŋ amäni köötni dääpä tëë ca täth ɛ Thɔ-lo-mon.

²⁷ Kä cu Rɛ-ɣɛ̈-bɔm köötni yieethä min yian ta̱th gua̱thnikiɛn. Kä cuɛ kɛ la̱th tetni bööthni ga̱a̱ŋni tin guɛckɛ thok duëël kua̱r.

²⁸ Ni ciaŋ mɔ wä kuäär luaak Kuɔth Nhial ɔ, la ga̱a̱ŋ kɛ a kän kä ba kɛ luɔc duëël ga̱a̱ŋni.

²⁹ Täämɛ cua duɔth lätni Rɛ-ɣɛ̈-bɔm gɔ̱a̱r rɛy buɔk kuɛ̈ɛ̈ni kua̱ri Juda.

³⁰ Kä la Rɛ-ɣɛ̈-bɔm kɛnɛ Ya-rɔ-baam a nyiëëny.

³¹ Kä cu Rɛ-ɣɛ̈-bɔm li̱w kä cua jɛ kony guäth ëë ca gua̱ni kony thi̱n därwec Dee-bid. Kä cɔalkɛ man i̱ Naamaa kä ji̱ Am-on. Kä cu gatdɛ ni Ä-bi-yam ruëc kɛ gua̱a̱thdɛ.