1 Kua̱r 13 - RUAC KUƆTH IN RƐL RƆ

Gak go̱kä kɛ Ya-rɔ-baam

¹ Kä nɛnɛ cu raan Kuɔth ben kä Juda kɛ ruac Kuɔth Nhial wëë kä Beth-ɛl. Kä Ya-rɔ-baam tëë cuŋä nhiam yi̱kä kɛ ɣöö bɛ wal tin kuɔ̱r kuɔ̱ɔ̱r waŋ.

² Kä cu raan Kuɔth wiee kɛ kui̱ yi̱kä kɛ ruac Kuɔth Nhial wëë i̱ “Aɣ yi̱k, yi̱k ci Kuoth Nhial ɛ lar i̱, ‘Nɛnɛ, tekɛ gat mi ba dap dhɔr Dee-bid, kä ba ciötdɛ cɔli Yo-ci-yaa. Kä bɛ muc thöp wi̱i̱du ala bo̱o̱th palä guäth palä mi bi wal waŋ wi̱i̱du, kä ba nɛy ti ba dap waŋ wi̱i̱du.’ ”

³ Kä cuɛ nyuuth ŋun ɛn cäŋ ɛmɔ wëë i̱, “Nɛmɛ ɛ nyuuth in ci Kuoth Nhial ɛ lar i̱, ‘Nɛnɛ yi̱k ba da̱k piny, kä ba ŋɛ̈th in te thi̱n wuɔc dɔɔr.’ ”

⁴ Kä min ci kuäär ruac ran Kuɔth liŋ, min cɛ lat kɛ kui̱ yi̱kä kä Beth-ɛl. Cu Ya-rɔ-baam jɛ nyoth wi̱i̱ yi̱kä wëë i̱, “Ka̱pɛ jɛ.” Kä cu tetdɛ min cɛ nyoth ni jɛ kööt, a /cɛ dëë nyɔk kɛ loc puɔ̱nydɛ.

⁵ Kä cu yi̱k tɛɛth bä, kä cu ŋɛ̈th rɔ wuɔc dɔɔr wi̱i̱ yi̱kä, ce̱tnikɛ nyuuth in ci raan Kuɔth ɛ ŋun ala riet Kuɔth Nhial.

⁶ Kä cu kuäär raan Kuɔth jiök i̱, “Pal Kuoth Nhial Kuothdu täämɛ. Kä thiec ɛ kɛ kui̱dä, kɛ ɣöö dëë tetdä luny puɔ̱nydä.” Kä cu raan Kuɔth, Kuoth Nhial pal. Kä cu tet kua̱r loc puɔ̱nydɛ, a bɛ ce̱tnikɛ ta̱a̱dɛ min wen.

⁷ Kä cu kuäär raan Kuɔth jiök i̱, “Wanɛ cieŋ kɛɛl, bi puɔ̱nydu wä tur, kä bä ji̱ wä col.”

⁸ Kä cu raan Kuɔth kuäär loc i̱, “Cäŋ bi ɣä ka̱m tha̱a̱ŋ dhɔaaru, /cä bi wä kɛɛl kɛ ji̱. Kä /cä bi mi̱th kiɛ /cä pi̱ bi math ɛn wa̱nɛ mɛ.

⁹ Kɛ ɣöö ca ɣä jiök ɛ Kuoth Nhial i̱, ‘/Cu mi̱th, kä /cu mäth kɛ pi̱ kä /cu loc jɔk kɛ duɔ̱ɔ̱p in bäkɛ ji̱.’ ”

¹⁰ Kä cuɛ wä kɛ duɔ̱p dɔ̱diɛn mi /ci mɔ a duɔ̱p in wä kɛ jɛ kä Beth-ɛl.

Gök Beth-ɛl ëë wal

¹¹ Kä täämɛ tëë kɛ gök mi cieŋ kä Beth-ɛl ni walkä cu gatdɛ jɛ ben la̱t tin diaal tin ci raan Kuɔth kɛ la̱t kä Beth-ɛl ɛn cäŋ ɛ mɔ. Amäni ruac in cɛ la̱t kuäär, cukɛ jɛ la̱t gua̱ndiɛn.

¹² Kä cu gua̱ndiɛn kɛ thiec i̱, “Ɛ duɔ̱ɔ̱p ith cɛ wä kɛ jɛ mɔ?” Kä cu gaatkɛ jɛ nyuɔ̱th duɔ̱ɔ̱p in ci raan Kuɔth in bëë kä Juda wä kɛ jɛ.

¹³ Kä cuɛ gaatkɛ jiök i̱, “Rialɛ muulä ikä.” Kä cukɛ muul rialikä kɛ kui̱dɛ kä cuɛ kɔt.

¹⁴ Kä cuɛ wä kɔɔr ran Kuɔth, kä cuɛ jɛ jek nyuurä thaar jiath thëëp. Kä cuɛ jɛ thiec i̱, “Ɛ jɛn ji̱n raan Kuɔth min bä kä Juda?” Kä cuɛ wëë, “Ɛ ɣän.”

¹⁵ Kä cuɛ jɛ jiök i̱, “Bër wanɛ cieŋ bi wä mi̱th kɛ kuän.”

¹⁶ Kä cu raan Kuɔth ɛ loc i̱, “/Cä bi loc jɔk kɛ ji̱ kɛɛl. /Cä bi mi̱th kä /cä bi maath kɛ pi̱ ɛn wa̱nɛ mi.

¹⁷ Kɛ ɣöö ci Kuoth Nhial ɛ la̱r ɣä i̱, ‘/Cu mi̱th kä /cu mäth kɛ pi̱ kä /cu loc jɔk kɛ duɔ̱ɔ̱p in bäkɛ ji̱.’ ”

¹⁸ Kä cu gök ɛ jiök i̱, “Ɛ ɣän gök ce̱tkɛ ji̱ bä, kä ci jääk Kuɔth Nhial ruac kɛ ɣä wëë i̱, ‘No̱o̱ŋni jɛ jɔk dhɔru kɛ ji̱ kɛɛl, kɛ ɣöö bɛ mi̱th kä bɛ maath kɛ pi̱.’ ” Duundɛ ɣöö kacɛ ni jɛ.

¹⁹ Kä cu raan Kuɔth wä kɛɛl kɛ jɛ. Kä cuɛ mi̱th kä cuɛ maath kɛ pi̱ dhɔrɛ.

²⁰ Kä min cikɛ nyuur wi̱i̱ mi̱eth, cu ruac Kuɔth Nhial ben kä gök in naŋ raan Kuɔth jɔk.

²¹ Cuɛ ruac kɛ raan Kuɔth in bä kä Juda, “Nɛmɛ ɛ min laar Kuoth Nhial ɛ i̱, ‘Kɛ ɣöö /keni ruac Kuɔth Nhial luɔ̱th. Kɛnɛ ɣöö /keni ruac Kuɔth Nhial Kuothdu min cɛ la̱r ji̱ tit,

²² Kä ci luny ni ji̱n jɔk, kä ci mi̱th kä ci maath kɛ pi̱ guäth in cɛ la̱r ji̱ /cu mi̱th thi̱n kä cu mäth. Inɔ /ci ri̱ŋdu bi cop kɔ̱kä guuri.’ ”

²³ Kä min cikɛ thuɔ̱k kɛ mi̱eth kɛnɛ ma̱th, cuɛ muul rialikä kɛ kui̱ go̱kä min cɛ luɔ̱c jɔk.

²⁴ Kä min wëë kɛ cuɛ röm kɛ lony, kä cu lony ɛ näk. Kä cua puɔ̱nydɛ yuɔr rɛy duɔ̱p, kä cu muul cuɔ̱ŋ gekädɛ. Amäni lony bä cuɛ cuɔ̱ŋ gekä ri̱eŋdɛ.

²⁵ Kä nɛnɛ cu wutni ben kɛ gëëkdɛ, kä cukɛ ri̱ŋdɛ nɛn ca yuɔr dup, kä te lony cuŋä gekä ri̱eŋdɛ. Kä cukɛ jɛ ben lar wi̱c in cieŋ gök ëë wal thi̱n.

²⁶ Kä min ci gök ëë loc jɛ jɔk dup ɛ liŋ. Cuɛ wëë, “Ɛ raan Kuɔth in /ken ruac Kuɔth Nhial luɔ̱th. Kɛ kui̱c ɛmɔ cɛ jɛ ka̱m lony ɛ ci jɛ camɔ, ce̱tnikɛ ruac ëë ci Kuoth Nhial ɛ la̱t jɛ.”

²⁷ Kä cuɛ gaatkɛ jiök i̱, “Rialɛ muulikä kɛ kui̱dä.” Kä cukɛ jɛ rialikä.

²⁸ Cuɛ wä kä cuɛ puɔ̱nydɛ jek a ca yuɔr dup, kä muul kɛnɛ lony tekɛ cuŋä gekä ri̱eŋdɛ. Kä lony /kenɛ jɛ cam, kä /kenɛ muul cam.

²⁹ Kä cu gök ri̱ŋ ran Kuɔth la̱th jɔɔk muɔ̱l, kä cuɛ jɛ nööŋ wi̱c, cuɛ jɛ kony kä cuɛ pa̱r.

³⁰ Kä cuɛ ri̱ŋdɛ la̱th rɛy kɔ̱kädɛ. Kä cukɛ jɛ par wëë i̱ “Dämaar!”

³¹ Kɛ kɔr kä min cɛ kony, cuɛ gaatkɛ jiök i̱, “Mi wa̱a̱ li̱w, kuɔnyɛ ɣä kɔ̱k in ca raan Kuɔth kony thi̱n. La̱thɛ cɔ̱wkä gekä cɔ̱ɔ̱nikɛ.

³² Kɛ ɣöö ruac Kuɔth Nhial ëë cɛ lat kɛ kui̱ yi̱kä kä Beth-ɛl, kɛnɛ tin diaal tëë cɛ lat kɛ kui̱ duëli palä tin te rɛy wi̱i̱ni Tha-mɛ-ria, bi ka thuɔ̱ɔ̱k.”

³³ Kɛ kɔr kä ti̱ti̱ /ken Ya-rɔ-baam jiäkɛ päl, kä cuɛ nyɔk ni bööth gua̱thni palä kɛ kuëny kä nɛy diaal. Kä cuɛ kuany ni nɛy tin görkɛ böth palä.

³⁴ Kä cu nɔmɔ a duer dhɔr Ya-rɔ-baam min cu jɛ döp da̱k kɛnɛ riawdɛ wi̱i̱ muɔ̱ɔ̱n.