1 Kua̱r 12 - RUAC KUƆTH IN RƐL RƆ

Lo̱k thuk duëli caam (I-thɛ-rɛl) kɛ Rɛ-ɣɛ̈-bɔm

¹ Cu Rɛ-ɣɛ̈-bɔm wä kä Cɛ-kɛm kɛ ɣöö ci thuk duëli kuec caam ben thi̱n kɛ ɣöö ba wä jak kä kuäär.

² Kä mëë ca liŋ a Ya-rɔ-baam gat Nɛ-bat (Kɛ ɣöö ŋotdɛ kä I-jëp, guäth ëë cɛ rɔ bar thi̱n kɛ kuäär ni Thɔ-lo-mon), kä cuɛ cieŋ kä I-jëp.

³ Kä cukɛ Ya-rɔ-baam jäk kä raan, kä jɛn kɛnɛ thuk duëli kuec caam diaal cukɛ ben, kä Rɛ-ɣɛ̈-bɔm ka cua jɛ jiök i̱,

⁴ “Ci guur kɔ ciɛn a bɛc ɛlɔ̱ŋ. Kɛ kui̱c ɛmɔ täämɛ ku ciaŋ guurɛ bɛc bɛc ɛmɛ woc kä kɔ, bakɔ ji̱ lätikä.”

⁵ Kä cu Rɛ-ɣɛ̈-bɔm kɛ loc i̱, “Wiaa niɛnɛ ni̱n diɔ̱k, bia ku lɛ luny kä ɣä.” Kä cu naath jiɛn.

⁶ Kä cu kuäär ni Rɛ-ɣɛ̈-bɔm ruac wä thiec kä nɛy tin di̱t, tëë la luëëk gua̱n ni Thɔ-lo-mon wëë i̱, “Ɛŋu mi dërɛ la̱r ɣä mi dëë wä luɔc nɛy ti̱ti̱?”

⁷ Kä cukɛ jɛ jiök i̱, “Mi wi̱i̱ nɛy ti̱ti̱ lät ikä ɛn walɛ a bia̱ kuanydiɛn, kä bikɛ la̱t ruac mi gɔaa, ba ji̱ lät ikä amäni cäŋ kɛl.”

⁸ Duundɛ ɣöö cuɛ luek nɛɛni tin di̱t lo̱k, cuɛ wä nhɔk ni luek ŋuɛ̈tni tin pith kɛɛl jɛ kä ci cuɔ̱ŋ nhiamdɛ.

⁹ Kä cuɛ kɛ thiec i̱, “Ɛŋu mi dee yɛn ɛ lar, mi dënɛ loc ni nɛy ti ca ɣä jiök ti i̱, ‘Woc ciaŋ ɛ bɛc bɛc ɛ ci guurɛ ka̱m kɔ ma̱a̱th?’ ”

¹⁰ Kä cu ŋuɛ̈tni jɛ jiök i̱, “Nɛmɛ ɛ jɛn min bi la̱r kɛn nɛy tin ca ji̱ jiök i̱, ‘Ci guur kɔ moc lät ti bɛ̈c bɛ̈ɛ̈c, duundɛ ɣöö kuɛ lɛ woc kä kɔ.’ Jiök nikɛ i̱, ‘Yiatdä min tɔt dho̱k ni jɛn kä juäk gua̱a̱r.

¹¹ Kä täämɛ mi ci gua̱a̱r yɛ ka̱m lät ti bɛ̈c bɛ̈ɛ̈c, kä ɣän bäkɛ jak kä bɛc ɛlɔ̱ŋ. Ci gua̱a̱r yɛ duäc kɛ cuëëc ɣɔ̱ɔ̱k, kä ɣän bä yɛ duäc kɛ waat loorä.’ ”

¹² Inɔ cu Ya-rɔ-baam kɛnɛ nɛy diaal ben kä kuäär ni Rɛ-ɣɛ̈-bɔm kɛ diɔ̱ɔ̱k ni̱ni ce̱tkɛ mëë cɛ lar i̱, “Luɔ̱nyɛ kä ɣä kɛ diɔ̱ɔ̱k ni̱ni.”

¹³ Kä cu kuäär naath loc ɛ jiäk, cuɛ luek di̱tni min ca la̱r jɛ lo̱k,

¹⁴ cuɛ ruac kɛ kɛ ce̱tkɛ ruac ŋuɛ̈tni, wëë i̱, “Ci gua̱a̱r yɛ ciɛŋ ɛ bɛc, duundɛ ɣöö bä rep ni bɛ̈cdɛ. Kä gua̱a̱r cɛ yɛ duäc kɛ cuëëc ɣɔ̱ɔ̱k, duundɛ ɣöö bä yɛ duäc kɛ waat loorä.”

¹⁵ Inɔ /ken kuäär ruac nath liŋ, kɛ ɣöö bi ruac Kuɔth Nhial mëë latdɛ kɛ thok go̱kä ni Ä-ɣi-yaa raan Cilo mëë lätdɛ Ya-rɔ-baam gat Nɛ-bat a thuɔ̱k.

¹⁶ Kä mëë ci thuk duëli kuec caam ɛ nɛn ɛn ɣöö /ken kuäär ruacdiɛn liŋ, cukɛ jɛ loc i̱. “Ɛ kui̱c ith la duŋda mɔ kä Dee-bid? Thilɛ nɛy kui̱c kä gat Jɛthi. Wiaa kɛmɛnikun lö thuk duëli kuec caam! Kä täämɛ ku guic ni dhɔru kärɔa lö Dee-bid.” Inɔ cu thuk duëli kuec caam wä kɛmɛnikiɛn.

¹⁷ Duundɛ ɣöö cu Rɛ-ɣɛ̈-bɔm thuk duëli kuec caam cuëëc tin cieŋ kä Juda ruac.

¹⁸ Kä cu kuäär ni Rɛ-ɣɛ̈-bɔm Ä-do-ram min la kuäär lätni ja̱k, duundɛ ɣöö cu thuk duëli kuec caam diaal jɛ bök kɛ dööl amäni mëë cɛ li̱w. Kä cu kuäär ni Rɛ-ɣɛ̈-bɔm pɛ̈th kɛ köt thurbiɛɛlɛ, cuɛ rɔ bar wëë kä Jɛ-ru-tha-lɛm.

¹⁹ Inɔ cu thuk duëli kuec caam a ji̱ tɛ̈r thuɔk duëël Dee-bid amäni walɛ.

²⁰ Kä min ci ji̱ I-thɛ-rɛl diaal ɛ liŋ i̱ ci Ya-rɔ-baam luny jɔk, cukɛ jɛ ciööl rɛy dolä, kä cua jɛ jak kä kuäär I-thɛ-rɛl kɛɛliw. Kä cuɛ thil ram kɛl mi cu dhɔr Dee-bid guɔ̱ɔ̱r, cua ni thok duëël Juda kärɔa.

Ruac go̱o̱kä Cɛ-mɛ̈-yaa

²¹ Kä mëë ci Rɛ-ɣɛ̈-bɔm cop kä Jɛ-ru-tha-lɛm, cuɛ ji̱ Juda diaal dol, kɛnɛ thok duëël Ben-ya-min, wutni ko̱o̱r ti bathdɔɔri ti kuɔ̱r wi̱cdɛ jiɛn bädäk ti ca kuany, kɛ ɣöö bikɛ wä nyiëëny kɛ thuk duëli kuec caam, kɛ ɣöö ba kuäär luɔ̱c Rɛ-ɣɛ̈-bɔm gat Thɔ-lo-mon.

²² Duundɛ ɣöö cu riet Kuɔth ben kä Cɛ-mɛ̈-yaa raan Kuɔth i̱,

²³ “Jiök ni Rɛ-ɣɛ̈-bɔm gat Thɔ-lo-mon kuäär Juda, kɛnɛ thok duëël Juda diaal kɛ Ben-ya-min, kɛnɛ duɔth nath i̱,

²⁴ ‘Nɛmɛ ɛ min ca lar ɛ Kuoth Nhial ɛn ɣöö /cuarɛ wä nyiëëny kɛ ji̱ maarädun ni thuk duëli kuec caam. Ɛ ramɔ loc dhɔrɛ kɛ ɣöö nɔmɔ bëë kä ɣä.’ ” Inɔ cukɛ ruac Kuɔth Nhial liŋ kä cukɛ loc ciëëŋni.

Riet Ya-rɔ-baam kɛ rɔ kä Kuoth Nhial

²⁵ Kä cu Ya-rɔ-baam Cɛ-kɛm täth rɛy wi̱i̱ni päämni Ɛ-pa-rim, kä cuɛ cieŋ thi̱n. Kä cuɛ jiɛn ɛn wi̱ni cuɛ Pɛ-nu-el wä täth.

²⁶ Kä cuɛ riet kɛ lɔcdɛ i̱, “Täämɛ bi kuäär loc dhɔr Dee-bid.

²⁷ Mi wä nɛy ti̱ti̱ muc wä thöp luak Kuɔth Nhial kä Jɛ-ru-tha-lɛm, kä bi nɛy ti̱ti̱ lo̱ckiɛn loc kä kuääriɛn, ni Rɛ-ɣɛ̈-bɔm kuäär Juda. Kä bikɛ ɣä näk bikɛ cu loc kä jɛ.”

²⁸ Kä cu Ya-rɔ-baam luek go̱r, kä cuɛ rueeth thääkni da̱ŋ rɛw täth kɛ da̱a̱p. Kä cuɛ naath jiök i̱, “Cia bi wä kä Jɛ-ru-tha-lɛm kɛ pek mi bäär. Nɛ̈nɛ jɛ, kuthkun tin lö I-thɛ-rɛl, tëë nööŋkɛ yɛ raar kä I-jëp.”

²⁹ Kä cuɛ kɛl la̱th kä Beth-ɛl, kä cu min dɔ̱ŋ te kä Daan.

³⁰ Kä cu nɔmɔ a duer, kɛ ɣöö wä naath kä duel kɛl in te kä Beth-ɛl, kɛnɛ min te kä Daan.

³¹ Kä cuɛ duel palä la̱t, kä cuɛ bööth palä ti /ci tɔ̱a̱ ji̱ Lii-bay kuany rɛy nɛɛni diaal.

³² Kä cuɛ cäŋ kä wäl dhieec kä pay bädäk mɛk ala cäŋ ŋarä ce̱tkɛ min te kä Juda. Kä cuɛ muc thöp wi̱i̱ yi̱kä. Inɔ cuɛ muc thöp rueeth thääkni tin cɛ la̱t kä Beth-ɛl. Kä cuɛ bööth palä tin te kä Beth-ɛl woc kɛ bööth palä luak in cɛ la̱t.

³³ Kä cuɛ muc wä thöp wi̱i̱ yi̱kä min cɛ la̱t kä Beth-ɛl, kɛ cäŋ kä wäl dhieec kä pay bädäk, pay ëë mɛɛkɛ kärɔa. Kä cuɛ cäŋ ŋarä mi̱eth lät kä ji̱ I-thɛ-rɛl, kä cuɛ wal ti kuɔ̱r kuɔ̱ɔ̱r wä waŋ wi̱i̱ yi̱kä.