1 Kua̱r 10 - RUAC KUƆTH IN RƐL RƆ

Gui̱l kua̱r ciek rööl Cɛba kɛ Thɔ-lo-mon

¹ Täämɛ mëë ci kuäär Cɛba mi ciek kɛ̈k Thɔ-lo-mon liŋ kɛ kui̱c cio̱tdä Kuɔth Nhial, cuɛ jɛ ben ɣɔ̱n kɛ thiecni ti buɔ̱m buɔ̱ɔ̱m.

² Cuɛ ben kä Jɛ-ru-tha-lɛm kɛ nɛy ti ŋuan, jälɛ kɛ thɔ̱a̱rɔa̱a̱li no̱o̱ŋɛ wal ti kɔap kɔaap kɛ da̱a̱p mi di̱t ɛlɔ̱ŋ, kɛ pääm ti di̱t kökdiɛn. Kä mëë cɛ jek kɛ Thɔ-lo-mon, cuɛ la̱t tin diaal tin te lɔɔcdɛ.

³ Kä cu Thɔ-lo-mon thiecnikɛ diaal loc. Cuɛ thil kɛl mi cu kuäär dhal a /kenɛ la̱t jɛ.

⁴ Kä mëë ci kuäär ciek Cɛba pɛl Thɔ-lo-mon nɛn kɛɛliw, kɛnɛ luak in cɛ täth,

⁵ kɛ mi̱ethdɛ, kɛ gua̱th nyuurä ji̱ kɔaarɛ, kɛ ta̱a̱ kuaanynikɛ, tin la̱t kɛ jɛ ikä, kɛ bieynikiɛn, kɛ nɛy tin muɔckɛ jɛ pi̱, kɛ muc ti waŋkɛ tin cɛ thöp rɛy luaak Kuɔth Nhial, cuɛ ga̱a̱c ɛlɔ̱ŋ.

⁶ Kä cuɛ kuäär ni Thɔ-lo-mon jiök i̱, “Ɛn ruaac ëë cä liŋ muundä kɛ kui̱du kɛnɛ pɛlu ɛ thuɔ̱k,

⁷ duundɛ ɣöö /ka̱nɛ ŋäth amäni mi cä ben ɛ a cä ben nɛn kɛ waŋdä. Kä nɛnɛ /ka̱n ɣä la̱r tha̱a̱ŋdiɛn. Pɛlu, kɛnɛ ria̱ŋdu ca min cä liŋ leny.

⁸ Kä ku lo̱c nɛɛniku lɛ tɛɛth i̱di! Kä ku ji̱ kɔaaru tin te gekädu ni ciaŋ kä nɛ̈nkɛ pɛlu, lɔcdiɛn lɛ tɛɛth i̱di!

⁹ Ɛ liak tekɛ Kuoth Nhial ni Kuothdu, min ci ji̱ nhɔk, kä ci ji̱ ka̱m kuäär I-thɛ-rɛl! Kɛ ɣöö nhɔk Kuɔth Nhial I-thɛ-rɛl amäni cäŋ kɛl, ɛ jɛn cɛ ji̱ jak kä kuäärɔ, kɛ ɣöö bi thuɔ̱k kɛnɛ cuŋ la̱t.”

¹⁰ Kä cuɛ kuäär ni Thɔ-lo-mon ka̱m da̱a̱p mi leny ki̱luni ti bathdɔɔri ŋuaan, kɛnɛ wal ti kɔap kɔaap ti ŋuan ti gɔw, kɛ pääm ti di̱t kökdiɛn. Kä cuɛ thil wal ti kɔap kɔaap ti gɔw ti cua nöŋ kuäär ni Thɔ-lo-mon ti ce̱tkɛ ti ca nöŋ jɛ ti ɛ kuäär ciek Cɛba.

¹¹ Kä cu mäni babuuri Ɣi-ram, tëë nööŋkɛ da̱a̱p kä O-për, cukɛ jiɛn ti tëë kɛ ŋuäny mi gɔaa, nööŋ bä kä O-për, kɛnɛ pääm ti di̱t kökdiɛn.

¹² Kä cu kuäär ni Thɔ-lo-mon jiɛn tɔ̱tɔ̱ lät ni thieer luaak Kuɔth Nhial kɛnɛ duel kua̱r, kɛ thuɔmni ji̱ kët din. Kä cuɛ thil jiɛn ti ce̱tkɛ kɛ ti cua nööŋ kiɛ cu jɔɔc amäni walɛ.

¹³ Kä cu kuäär ni Thɔ-lo-mon kuäär ciek Cɛba ka̱m tin diaal tin go̱o̱rɛ kɛnɛ tin cɛ thiec, a /ci tin ci kuäär ni Thɔ-lo-mon kɛ ka̱m jɛ kɛ gɔɔydɛ te thi̱n. Inɔ cuɛ loc wi̱i̱dɛ, kɛnɛ nɛɛkɛ.

Ria̱ŋ Thɔ-lo-mon

¹⁴ Kä la Thɔ-lo-mon da̱a̱p a mi tekɛ ki̱luni ti bathdɔɔri ti jiɛn da̱ŋ rɛw wi̱cdɛ diɔ̱k a jek kɛ ruɔ̱n,

¹⁵ a /ci min bä kä köök kɛnɛ tho̱lbo̱kdiɛn, kɛ kua̱r Ä-rab-ya, kɛ ruëëc muɔ̱ɔ̱n te thi̱n.

¹⁶ Kä cu kuäär ni Thɔ-lo-mon köötni ti kur da̱ŋ rɛw ti di̱t la̱t kɛ da̱a̱p mi ca riac. Kä te ko̱t kɛl kɛ ki̱luni dääpä da̱ŋ bärɔw.

¹⁷ Kä cuɛ kötni ti kur diɔ̱k ti nyin tiɛtni la̱t kɛ da̱a̱p mi ca riac. Kä cua ko̱t kɛl la̱t kɛ da̱a̱p mi te ki̱luni da̱ŋ rɛw. Kä cu kuäär kɛ la̱th duëël Ruɔ̱p Lɛ-ba-nɔn.

¹⁸ Kä cu kuäär kɔm kuäärä mi di̱i̱t lɛni la̱t kɛ tuɔ̱ŋ guɔ̱ri, kä cuɛ jɛ rɔth kɛ da̱a̱p in gɔaa ni jɛn.

¹⁹ Kä ɛn kɔm te ko̱o̱tni da̱ŋ bäkɛl, kä jɔk kɔam tëë kɛ wi̱c ruaath, kä gëëknikɛ tëë kɛ gua̱a̱th mi la̱thkɛ tet thi̱n, kä te lony da̱ŋ rɛw cuŋä gëëkni tetni kɔam.

²⁰ Kä te lony wäl rɛw cuŋä ko̱o̱tni kɔam da̱ŋ bäkɛl, te pek ko̱o̱tdä mɔ kɛ lony kɛl. Kä cuɛ thil mi ce̱tkɛ jɛ mi cua la̱t kua̱r i̱ tin kɔ̱ŋ.

²¹ Kä kuak ma̱th kua̱r ni Thɔ-lo-mon diaal kɛ da̱a̱p kä kuak duëël Ruɔ̱p Lɛ-ba-nɔn kɛn diaal da̱a̱p mi lɛy lɛy, kä /ca ciɛk in bo̱r cɔl duɔ̱ɔ̱r kɛ ni̱n Thɔ-lo-mon.

²² Kä te kuäär kɛ babuuri ko̱kä rɛy yiëër kɛɛl kɛ babuuri Ɣi-ram. La wëë kä Tar-cic kä kɛɛl kɛ kɔr runi da̱ŋ diɔ̱k no̱o̱ŋɛ da̱a̱p, ciɛk in bo̱r, tuɔ̱ŋ guɔ̱ri, amäni gɔakni.

²³ Kä cu kuäär ni Thɔ-lo-mon kua̱r diaal leny kɛ ria̱ŋ kɛnɛ pɛl mi di̱i̱t wi̱i̱ muɔ̱ɔ̱n.

²⁴ Kä cu ɣɔw kɛɛliw ben kä Thɔ-lo-mon, kɛ ɣöö ba pɛl in ci Kuoth ɛ ka̱m jɛ ben liŋ.

²⁵ Kä cu ramɔ mucdɛ nööŋ, ciɛk in bo̱r, da̱a̱p, bieyni, kɛ wal tin kɔp, jio̱o̱k tuɔ̱ruɔ̱k, muɔ̱li, ti ŋuan run kä run.

²⁶ Kä cu Thɔ-lo-mon thurbiɛɛli kɛnɛ jiöŋkööri mat guäth kɛl. Tëë kɛ thurbiɛɛli ti bathdɔɔr kɛl wi̱cdɛ kur ŋuaan kɛnɛ jiöŋkööri ti bathdɔɔri wäl rɛw. Tin cɛ la̱th wi̱i̱ni thurbiɛɛli, kɛnɛ wec kua̱r kä Jɛ-ru-tha-lɛm.

²⁷ Kä cu kuäär ciɛk in bo̱r jak kä ŋuan kä Jɛ-ru-tha-lɛm ce̱tkɛ guiy, kä cuɛ jiɛn ŋuëri jak kä ŋuan ce̱tkɛ jiɛn täpä.

²⁸ Kä la Thɔ-lo-mon jiöŋkööri a no̱o̱ŋ kä I-jëp kɛnɛ Kɛwee, la köök kua̱r ɣa wä kɔk kä Kɛwee.

²⁹ Kä la thurbil kɛl a kɔakɛ kä I-jëp kɛ yio̱w ti kur bäkɛl, kä kɔakɛ jiök tuɔ̱ruɔ̱k kɛ yio̱w ti kuɔ̱r kɛl wi̱cdɛ jiɛn dhieec. Kä la kɛn kɛ a wä kök kua̱r ji̱ Ɣɛ̈th, kɛnɛ kua̱r Thi-ri-ya.