1 Kor 8 - RUAC KUƆTH IN RƐL RƆ

Thiec kɛ kui̱ mi̱eth mi ca ka̱m kuth jiɛn

¹ Täämɛ kɛ kui̱ mi̱thni tin ca ka̱m kuth jiɛn, ŋa̱cnɛ jɛ ɛn ɣöö, “Kɔn diaal ta̱nɛ kɛ ŋäc ŋɔaani.” Kä ŋäc ŋɔaani kɔ̱pɛ raan kɛ liak, kä nhök piithɛ raan.

² Kä mi caar raan ɛ ɛn ɣöö ŋäcɛ duɔ̱ɔ̱r, ŋotdɛ /cɛ jɛ ŋäc, ce̱tkɛ ŋäc in derɛ ŋäc ni jɛ.

³ Kä duundɛ ɣöö mi nhɔk raan Kuoth, jɛn ŋäc Kuoth ɛ.

⁴ Kä kɛ kui̱ mi̱eth kä min ca ka̱m kuth baaŋ, ŋa̱cnɛ jɛ ɛn ɣöö, “thilɛ kuoth baaŋ rɛy ɣɔaa mi te wanɔ” kɛnɛ ɣöö “thilɛ Kuoth ɛ ni kɛl.”

⁵ Kɛ ɣöö cäŋ tëëkɛ ti cɔalkɛ i̱ kuth nhial kiɛ piny, ɛpuc tëëkɛ ti cɔalkɛ “kuth” kɛnɛ “kua̱r” ti ŋuan.

⁶ Kä ŋotdɛ kɛ kui̱dan Kuoth ɛ kɛl, in la Gua̱a̱r in te nhial. Kä ɛ cääk kä ti diaal, kä ɛ jɛn ɛ ni̱n tëk kɔn kɛ jɛ. Kä te ni Kuäär kɛl thi̱n, min la Yecu Kritho, min ca ŋɔaani diaal cak kɛ jɛ, kä tëk kɔn kɛ jɛ.

⁷ Kä /cikɛ nɛy diaal ŋa̱ckɛ thuɔ̱k ɛmɛ ɔ. Tha̱a̱ŋ nath cikɛ ŋa̱c ni kuth baaŋ, kɛ ɣöö mi cikɛ mi̱eth mi ce̱tkɛ ɛn ɔ cam, ŋotdɛ carkɛ jɛ ɛn ɣöö ɛ mi̱eth mi ca thöp kuoth baaŋ. Kɛn kɔ̱c ca̱r lo̱cnikiɛn, la kɛn ɛ a caar i̱ ca rɔ̱ ya̱r kɛ mi̱ethdiɛn kɛ mi̱eth ɛmɔ.

⁸ Mi̱eth /cɛ kɔn bi nööŋ gekä Kuɔth. /Ci jiääkdan di̱t mi /canɛ mi̱th, kä /ci gɔɔydan di̱t mi mi̱ethnɛ.

⁹ Kä duundɛ ɣöö niɛkɛ rɔ̱ kɛ ɣöö /ci ciaŋ lɔrädun ɛmɛ nɛy tin kɔ̱c ŋäthädiɛn bi pɛn dui̱rä.

¹⁰ Kä mi ca ji̱ nɛn ɛ nɛy kɔ̱kiɛn, ji̱n ram min ŋäc ŋɔak, a mi̱thi rɛy luaak kuɔth baaŋ. /Ci nɛy ɛ tɔ̱ min kɔ̱c ca̱r lo̱cnikiɛn, rɔ̱ bi com ɛn ɣöö bikɛ mi̱eth in ca ka̱m kuth baaŋ cam?

¹¹ Kä kɛ ŋäc ŋɔaanidu ba nɛy tin kɔ̱c ŋa̱thdiɛn tin ci Kritho li̱w kɛ kui̱dɛ däk.

¹² Kä mi wi̱i̱ duer wä lät kä dämuɔɔri rɛy Kritho, kä bia ca̱riɛn ya̱r min ŋot kɛ kɔ̱a̱c, dui̱r yɛn ni Kritho duer.

¹³ Kɛ kui̱ ɛmɔ, mi ɛ mi̱eth ɛn ni̱n jak dämaar kä pɛn dui̱rä, ɣän /cä ri̱ŋ bi met cam, kɛ ɣöö /cä dämaar bilɛ jakä tɛth.