1 Kor 7 - RUAC KUƆTH IN RƐL RƆ

Thiec kɛ kui̱ kuën

¹ Täämɛ kɛ kui̱ ruaacni tin cia gɔ̱r i̱, “Gɔaaɛ ɛn ɣöö wut /cɛ ciek bi guëër.”

² Kä kɛ kui̱ go̱o̱nyni käni mään, ɛ wut ɔ tekɛ ciekdɛ, kä a ciekɔ tekɛ cɔwdɛ.

³ Kä ɛ wut lät la̱tdɛ ala wut, kä ɛ ciek lät la̱tdɛ ala ciek. Kä ɛ ram ɔ ro̱o̱ŋ lɔc raam ɔ kɛ min go̱o̱rɛ.

⁴ Kɛ ɣöö ciek thilɛ jɛ lua̱ŋ kɛ puɔ̱nydɛ, ɛ cɔwdɛ tekɛ lua̱ŋ kɛ jɛ mɔ. Kä cɔw bä thilɛ jɛ lua̱ŋ kɛ puɔ̱nydɛ, ɛ ciekdɛ tekɛ lua̱ŋ kɛ jɛ mɔ.

⁵ /Cuarɛ rɔ̱ pen rɔ̱, ɛ ni mi cia jɛ mat ɛn ɣöö bia te gööli kɛ pek gua̱th mi tɔt, kɛ ɣöö bia gua̱a̱th ɛn thuk palä. Kä nyɔakɛ rɔ̱ kɛ ma̱t, kɛ ɣöö /ci Cɛy-tan yɛ bi ɣɔam kɛ kui̱ kä ɣöö /cia rɔ̱ luäŋ kɛ guɔ̱k.

⁶ Ɣän laarä ni mɛmɛ yɛ /ciɛ ɣöö la̱tdä ni jɛ yɛ.

⁷ Ɣän göörä ni ɣöö dee nɛy diaal ce̱tkɛ ɣä. Kä te ramɔ kɛ mucdɛ mi ca ka̱m jɛ ɛ Kuoth, te ram ɛmɛ kɛ muc ɛmɛ, kä te min dɔ̱ŋ kɛ muc mi göl.

⁸ Kɛ kui̱ nɛɛni tin /ken kuɛɛn kɛnɛ män jɔɔkni, ɣän la̱rä kɛ ɣöö gɔaaɛ kɛ kɛ ɛn ɣöö bikɛ cieŋ a /ci kuën ce̱tkɛ mɛ ta̱a̱ mɛ.

⁹ Kä mi /cikɛ rɔ̱ luäŋ kɛ guɔ̱k, akɛ kuen. Kɛ ɣöö ŋua̱ni kuën kä di̱t lɔaac leerä.

¹⁰ Ɣän la̱tdä jɛ nɛy tin ci kuɛɛn, kä /ciɛ ɣän, laarɛ Kuäär ni Yecu, ɛn ɣöö ciek /cɛ bi da̱k kä cɔwdɛ,

¹¹ (kä mi cɛ da̱k a jɛ cieŋ a /ca kuɛn, kiɛ a jɛ loc kä cɔwdɛ) kä wut /cɛ ciekdɛ bi däk.

¹² Ɣän la̱rä jɛ nɛy tin kɔ̱kiɛn, a /ciɛ laar Kuäär, ɛn ɣöö mi te raan ŋäthä kɛ ciek mi /ci ŋa̱th, kä nhɔk ciek ɛ ɛn ɣöö bikɛ te kɛɛl, a jɛ /ci ciekdɛ däk.

¹³ Kä mi tëë kɛ ciek mi /ci cɔwdɛ ŋa̱th, kä nhɔk cɔw ɛ ɛn ɣöö bikɛ te kɛɛl, a jɛ /ci cɔwdɛ däk.

¹⁴ Kɛ ɣöö cɔw mi thil ŋa̱th jakɛ jɛ kä lɛy lɛy kɛ ciekdɛ, kä ciek mi thil ŋa̱th jakɛ jɛ kä lɛy lɛy kɛ cɔwdɛ. Mi /ciɛ jɛn inɔ, gaatkun /cikɛ bi gɔw, kä kɛ ta̱a̱ ɛmɔ kɛn rɛl gɔɔydiɛn rɔ.

¹⁵ Kä mi ci ram in thil ŋa̱th go̱r ɛn ɣöö bikɛ da̱k, a jɛ däk. Mi ci nɔmɔ tuɔɔk inɔ, bi ciek kiɛ wut in ŋa̱th lɔar. Kɛ ɣöö ci Kuoth yɛ cɔl kɛ ɣöö bia cieŋ kɛ mal.

¹⁶ Ciek, ŋäci jɛ i̱di ɛn ɣöö dɔ̱ŋ /ci cɔwdu bi kän? Cɔw, ŋäci jɛ i̱di ɛn ɣöö dɔ̱ŋ /ci ciekdu bi kän?

Cieŋni ce̱tkɛ min ci Kuoth ji̱ cɔl

¹⁷ Kä ɛ ram ɔ kä yɛ cieŋ kɛ duɔ̱ɔ̱p in ci Kuoth ɛ ka̱m jɛ, kɛ ciaaŋ ëë cieŋ kɛ jɛ mëë cɔɔl Kuoth jɛ. Mɛmɛ ɛ jɛn ŋut in ŋi̱eecä duëli Kuɔth diaal.

¹⁸ Tëëkɛ ram mi ca thuŋ cuɛl guäth ëë cɔalkɛ ni jɛ? A jɛ /ci ciaŋ cuelädɛ päl. Tëëkɛ ram mi /ka̱n cuɛl guäth ëë cɔalkɛ ni jɛ? A jɛ /ci cuël go̱r.

¹⁹ Kɛ ɣöö thilɛ cuël luɔt, kä thil cuelä thilɛ jɛ luɔt, kä luth ŋuɔ̱tni Kuɔth ɛnɔ tekɛ luɔt ɔ.

²⁰ A ram ɔ tekɛ ta̱a̱dɛ mëë cɔalkɛ jɛ thi̱n.

²¹ Mi ɛ ji̱n kuany mëë cɔalkɛ ji̱? /Cu rɔ jut kɛ jɛ. Kä mi deri ciaŋ lɔrädu jek, käpɛ ala baŋdu.

²² Kɛ ɣöö jɛn ram mi ca cɔl rɛy Kua̱r ni Yecu ala kuany, ɛ ram mi ca lony rɛy Kua̱r ni Yecu. Kä ce̱tkɛ inɔ bä, jɛn ram mi lɔr mëë cɔalkɛ jɛ, ɛ kuany Kritho.

²³ Ca yɛ kɔk kɛ ko̱k, /cuarɛ bi a kuaany nath.

²⁴ Kä ɛnɔ, dämaari, ɛ ram ɔ tekɛ ta̱a̱dɛ mëë cɔalkɛ jɛ thi̱n kä yɛ, kä a jɛ te kɛɛl kɛ Kuoth.

Thiecni kɛ kui̱ raam mi /ken kuɛɛn kɛnɛ män jɔɔkni

²⁵ Täämɛ kɛ kui̱ nɛɛni ti /ken kuɛɛn, thilɛ ɣä ruac kä Kuäär ni Yecu kɛ kui̱diɛn, kä ɣän thöpä ca̱rä ce̱tkɛ ram mi ŋa̱thkɛ kɛ kɔ̱a̱c lɔaac Kua̱r ni Yecu.

²⁶ Ɣän caarä jɛ kɛ kui̱ rikni ti̱ti̱, gɔaaɛ ɛn ɣöö bi raan tekɛ ta̱a̱ in tekɛ jɛ.

²⁷ Ji̱n ci kuɛɛn kɛ ciek? /Cu däkdɛ lɛ go̱r. Ji̱n /keni kuɛɛn? /Cu kuën lɛ go̱r.

²⁸ Kä mi ci kuɛɛn thilɛ ji̱ duer, kä mi ca nyal kuɛn, jɛn thilɛ jɛ duer. Kä nɛy tin ci kuɛɛn bikɛ rik jek rɛy teekä ɛmɛ, kä göörä ɣöö dëë yɛ gaŋ kä riɛk ɛmɔ.

²⁹ Dämaari, ɣän luɔtdä ni ɣöö gua̱a̱th in ca lar cɛ thia̱k. Kä a tɛmɛ ni ɛn täämɛ a wä nhiam, a nɛy ti tekɛ män cieŋ ce̱tkɛ nɛy ti thil män,

³⁰ kä a nɛy ti pär cieŋ ce̱tkɛ nɛy ti /ci pär, kä a nɛy ti tɛth lo̱ckiɛn cieŋ ce̱tkɛ nɛy ti /ci lo̱ckiɛn tɛth, kä a nɛy ti ko̱k cieŋ ce̱tkɛ nɛy ti thil ŋɔaani,

³¹ kä nɛy ti tekɛ maar kɛ ɣɔw cieŋ ce̱tkɛ nɛy ti thil maar kɛ jɛ. Kɛ ɣöö ta̱a̱ ɣɔaa ɛmɛ wee kɛ mi thukɛ.

³² Ɣän göörä jɛ ɛn ɣöö bia thil diɛɛr. Ram mi thil ciek diɛɛrɛ kɛ lät Kua̱r ni Yecu, kɛ ɣöö go̱o̱r ɣöö bɛ lɔc Kua̱r ni Yecu tɛth.

³³ Kä ram mi ci kuɛɛn diɛɛrɛ kɛ nyin ɣɔaa, kɛ ɣöö go̱o̱rɛ ɣöö bɛ lɔc ciëkdɛ tɛth,

³⁴ kä ca tin diaal tin go̱o̱rɛ da̱a̱k. Kä ciek mi thil cɔw kiɛ nyal diɛɛrkɛ kɛ lät Kua̱r ni Yecu, kɛ ɣöö dee puɔ̱nydiɛn kɛnɛ yiëëdiɛn rɔ rɛl. Kä ciek mi ca kuɛn diɛɛrɛ kɛ nyin ɣɔaa, kɛ ɣöö go̱o̱rɛ ɣöö bɛ lɔc cɔaadɛ jakä tɛth.

³⁵ Ɣän la̱rä yɛ mɛmɛ kɛ kui̱ gɔɔyädun, /ciɛ ɣöö bä yɛ gok, kä ɛ ɣöö bia la̱t ni cuŋ, kä bia Kuäär luɔ̱th a thil mi dɔ̱diɛn mi bi yɛ gaŋ.

³⁶ Mi caar raan ɛ, ɛn ɣöö /cɛ rɔɔdɛ ciɛŋ gɔaa kɛ nyam min cɛ la̱r kuën, kä mi go̱o̱r lɔcdɛ kuëndɛ kä bɛ jɛ lat, a jɛ lätdɛ ce̱tkɛ min go̱o̱rɛ, akɛ kuɛ̈nkɛ rɔ̱. /Ciɛ duer.

³⁷ Kä duundɛ ɣöö mi ci raan a car kɛ lɔcdɛ ɛn ɣöö /cɛ kuën lɛ go̱r, kä cɛ rɔ käp ɛ bum, kä cɛ lat ɛn /cɛ nyam in cɛ la̱r kuën bi kuɛn ɛn täämɛ jɛn, bɛ la̱t ni mi gɔaa.

³⁸ Kɛ kui̱c ɛmɔ ram mi kuɛɛn nyam in go̱o̱rɛ kuëndɛ lätdɛ ni mi gɔaa, kä ram mi /ci kuen bɛ la̱t ni mi ŋua̱n ni jɛn.

³⁹ Bi ciek dhil te kɛɛl kɛnɛ cɔwdɛ min ŋot cɔwdɛ teekä. Kä mi ci cɔwdɛ li̱w, tëëkɛ cuɔ̱ɔ̱ŋ ɛn ɣöö dëë jɛ nyɔk kɛ kuën ɛ ram mi go̱o̱rɛ, kä bɛ a ram mi te rɛy Kua̱r ni Yecu.

⁴⁰ Kä kɛ ca̱rä dee di̱t ni tɛ̈th lɔaacdɛ, mi /ka̱nɛ nyɔk kɛ kuën. Kä caarä jɛ ɛn ɣöö ta̱a̱ kɛ Yiëë Kuɔth.