1 Kor 6 - RUAC KUƆTH IN RƐL RƆ

Luk kam ji̱ kɔaar Yecu

¹ Mi te raan kä yɛ kɛ gak kɛ däman, la yɛn a go̱o̱r ni naŋdɛ guäth luɔ̱k nhiam nɛɛni tin thil cuŋ, kä naŋdɛ nhiam nɛɛni tin ci Kuoth kɛ lɛy?

² Kuecɛ jɛ ɛn ɣöö bi nɛy tin ca lɛy ɣɔw luk? Kä mi bi yɛn ɣɔw luk, /cia ro̱ŋ kɛ luɔ̱k kä tin tɔatni?

³ /Cia jɛ ŋäc ɛn ɣöö banɛ ja̱a̱k nhial luk? Kä derɛ kulɛ te i̱di kɛ nyin teekä mɛmɛ?

⁴ Kä mi ta̱yɛ kɛ go̱o̱nyni ti ce̱tkɛ tɔ̱tɔ̱, ɛ bia naath ku kuany ti bikɛ luk nɛy ti thil luɔt rɛy duëël Kuɔth?

⁵ Ɣän latdä mɛmɛ kɛ kui̱ po̱cädun. Kɛ thuɔ̱k ɛpuc, te rɛydun kɛ ram mi pɛl, mi dee ruac ŋok kam Krith-cini.

⁶ Kä duundɛ ɣöö la raan Yecu däman a naŋ guäth luɔ̱k, ala yɛn mɛmɛ a lät nhiam nɛɛni tin thil ŋa̱th!

⁷ Kä kɛ thuɔ̱k mi ta̱yɛ kɛ go̱o̱nyni kamnikun nyoothɛ ni ɣöö ca yɛ tiam. /Ci ŋua̱n ni ɣöö ba yɛ dui̱rikä? /Ci ŋua̱n ni ɣöö ba yɛ mac?

⁸ Kä yɛn pua̱nykun la̱tdɛ dueer kä macɛ naath, a cäŋɛ ni dämuɔɔrikun rɛy Kritho!

⁹ Kä /cia jɛ ŋäc ɛn ɣöö ji̱ dueeri /cikɛ ciëŋ kuäärä Kuɔth bi jek? A yɛ /ca mɛt ɛ raan. Nɛy tin lër, tin pa̱a̱l kuthni baaŋ, tin dhööm, wutni tin kɔarkɛ rɔ,

¹⁰ nɛy tin kuëël, tin ji̱ da̱r, tin la yɔ̱a̱ŋ kɔaaŋni, tin ji̱ kueethä, tin la ma̱a̱c nath, kɛn tɔ̱tɔ̱ /ca ciëŋ kuäärä Kuɔth bi jek.

¹¹ Kä tha̱a̱ŋkun ce̱tkɛ kɛ nɛy ɛ tɔ̱. Kä duundɛ ɣöö ca yɛ lak, ca yɛ jak kä gɔaa ci Kuoth yɛ lɛy, kä ca yɛ moc cuɔ̱ɔ̱ŋ kɛ ciöt Kua̱r ni Yecu Kritho kɛnɛ rɛy Yieekä Kuɔthdan.

Liakɛ Kuoth kɛ pua̱nykun kɛnɛ Yiëë

¹² Dee raan wee i̱, “Ŋɔaani diaal luɔtkɛ rɔ̱ kɛ ɣä,” kä duundɛ ɣöö /ciɛ ŋɔak diaal gɔw rɔ̱ kɛ ji̱ mɔ. “Ŋɔaani diaal luɔtkɛ rɔ̱ kɛ ɣä,” kä duundɛ ɣöö thilɛ mi bi ɣä jakä kuanydɛ.

¹³ Kä dee raan wee i̱, “Mi̱eth lotdɛ ni jic, kä jic lotdɛ ni mi̱eth,” kä bi Kuoth kɛnɛ da̱ŋ rɛw däk. Kä puɔ̱ny /cɛ lot ni leer, lotdɛ ni Kuäär, kä Kuäär lotdɛ ni puɔ̱ny.

¹⁴ Kuoth cɛ Kuäär ni Yecu jiɛc li̱th, kä kɛ buɔ̱mdɛ bɛ kɔn jiɛc li̱th bä.

¹⁵ /Cia jɛ ŋäc ɛn ɣöö pua̱nykun kɛ cuŋ pua̱a̱ny Kritho? Kɛ kui̱ ɛmɔ bä cuŋ Kritho ka̱n kä bäkɛ jakä cuŋ leerä? Ëëy!

¹⁶ Kuecɛ jɛ ɛn ɣöö ram mi ci rɔ mat kɛ ler bɛ a puɔ̱ny kɛl kɛ jɛ? Kɛ ɣöö ca jɛ lar i̱, “Kɛn da̱ŋ rɛw bikɛ a puɔ̱ny kɛl.”

¹⁷ Kä ram mi ca mat kɛ Kuäär bɛ a yiëë kɛl kɛ jɛ.

¹⁸ Yiënɛ rɔ̱ kä leer! Dueer diaal kɔ̱kiɛn tin lät raan kɛ tekɛ raar pua̱ny, kä duundɛ ɣöö ram mi duer kɛ leer dui̱r ni puɔ̱nydɛ duer pa̱ny.

¹⁹ Kiɛ kuecɛ jɛ ɛn ɣöö puɔ̱nydun ɛ jɛn duel in cieŋ Yiëë in Gɔaa in Rɛl Rɔ thi̱n rɛydun, min ca ka̱m yɛ ɛ Kuoth? Yɛn, /ci yɛn la nyin pua̱nynikun,

²⁰ kɛ ɣöö ca yɛ kɔk kɛ ko̱k. Kɛ kui̱c ɛmɔ liakɛ Kuoth kɛ pua̱nykun.