1 Kor 5 - RUAC KUƆTH IN RƐL RƆ

Ciaaŋ leerä yärɛ duel Kuɔth

¹ Ca jɛ lat ɛpuc ɛn ɣöö te rɛydun kɛ ciaaŋ leerä, ɛn ni ce̱tkɛ nɔ, ɛ mi /ca dee jek a cäŋɛ ni rɛy nɛɛni ti kueckɛ Kuoth. Cä jɛ liŋ ɛn ɣöö nyuur raan kɛɛl kɛ ciek gua̱n.

² Kä liak yɛn rɔ̱! /Ci gɔaa ni ɣöö dee pa̱r ni yɛn? Kä ram mɔ ci mɔmɔ la̱t ɔ a jɛ wuɔckɛ rɛydun.

³ Kɛ ɣöö cäŋ te puɔ̱nydä jɔ̱ɔ̱r, ta̱a̱ kɛɛl kɛ yɛ kɛ yiëë. Kä ce̱tkɛ mi ta̱a̱ thi̱n, cä lukdä ku thuŋ ŋok

⁴ kɛ ciöt Kua̱r ni Yecu kɛ kui̱ wutdä min ci mi ce̱tkɛ nɔ la̱t. Mëë cia duɔl, kä te yiëëdä thi̱n kɛ buɔ̱m Kua̱ran ni Yecu,

⁵ ka̱mɛ ram ɛmɔ Cɛy-tan kɛ kui̱ däkä pua̱a̱nydɛ, kɛ ɣöö dee yiëëdɛ kään kɛ cäŋ Kua̱r ni Yecu.

⁶ Liakdun /ciɛ mi gɔaa. Kuecɛ jɛ, ɛn ɣöö thuɔp mi tɔt jiɛcɛ nup kɛɛliw?

⁷ Lɛ̈yɛ thuɔp ëë wal raar, kɛ kui̱ kä ɣöö bi yɛn a nup mi gɔaa, mi /ka̱n liɔm kɛ thuɔp ce̱tkɛ mɔ te yɛn ɔ. Kɛ ɣöö ca Kritho min la Ruath Ca̱ŋ Bälä thöp.

⁸ Kɛ kui̱ ɛmɔ kuanɛ juray Cäŋ Bälä la̱t, duundɛ ɣöö a /ci mɔ a juray mi tekɛ thuɔp ëë wal, min mɔ thuɔp nyier kɛnɛ nyuɔɔn. Duundɛ ɣöö la̱t nɛ jɛ kɛ juray thukä mi wic wic mi /ka̱n liɔm kɛ thuɔp.

⁹ Cä jɛ gɔ̱a̱r yɛ rɛy warɛgakädä ɛn ɣöö /cia bi mat kɛ nɛy ti nhɔakɛ la̱t leer.

¹⁰ Ɣän /cä lot ni leer ɣɔaa ɛmɛ, kiɛ ji̱ da̱r kɛnɛ ma̱a̱c nath, kiɛ nɛy tin palkɛ kuth baaŋ. Kä kɛ ɣöö dërɛ jiɛɛn kä kɛ, dërɛ dhil ben raar rɛy ɣɔaa ɛmɛ.

¹¹ Kä ɛn täämɛ ɣän gɔ̱a̱rä yɛ warɛgak ɛmɛ kɛ ɣöö /cia bi mat kɛ ram mi cɔali dämuɔɔr mi tekɛ ciaŋ leerä kiɛ da̱r kiɛ pa̱l kuthni baaŋ, mi kueth naath, mi yɔ̱ŋ kɔaŋ, kiɛ määc nath. A cäŋɛ mi̱eth, /cuarɛ jɛ cam kɛɛl kɛ ram mi ce̱tkɛ ɛnɔ.

¹² Kɛ ɣöö ɛŋu mi dëë lɛl kɛ luk ji̱ raar? /Cikɛ nɛy tin te rɛy duëël Kuɔth kɛn tin dee yɛn kɛ luk?

¹³ Kuoth lukɛ nɛy tin /ci te dueel Kuɔth. “Tuɔ̱kɛ ram mɔ jiääk ɛmɔ raar rɛydun.”