1 Kor 3 - RUAC KUƆTH IN RƐL RƆ

La̱a̱t Kuɔth

¹ Kä ɣän, dämaari, /cä bi ruac kɛ yɛ ce̱tkɛ ji̱ yieekä, kä bä ruac kɛ yɛ ce̱tkɛ ji̱ ri̱eŋ, ce̱tkɛ ruɔri ti tɔatni rɛy Kritho.

² Ɣän cä yɛ ruëëth kɛ cak, a /ci mɔ a mi̱eth mi dɔk, kɛ ɣöö /ka̱nɛ rɔ̱ rialikä kɛ kui̱dɛ. Kä a cäŋɛ ɛn täämɛ, /ken yɛn rɔ̱ ni rialikä,

³ kɛ ɣöö ŋuɔtdɛ ala ji̱ ri̱eŋ. Kä min ŋot tiɛɛl kɛnɛ gak kamnikun, /ci yɛn a ji̱ ri̱eŋ, kä ciëŋɛ kɛ ciaŋ nath?

⁴ Kɛ ɣöö mi lar ram kɛl ɛ i̱, “Ɛ ɣän raan Puɔl,” kä laar ram mi dɔ̱diɛn ɛ i̱, “Ɛ ɣän raan A-pɔ-löth,” /ci yɛn cieŋ kɛ pek ciɛŋä nath?

⁵ Kä A-pɔ-löth ɛŋa? Kä Puɔl ɛŋa? Kɛ ji̱ läätdä ti ca yɛ nööŋ ŋäthä ce̱tkɛ min ci Kuäär ɛ ka̱m ramɔ i̱ bɛ la̱t.

⁶ Ɣän cä pi̱eth, kä ci A-pɔ-löth kɛ wac, kä ci Kuoth kɛ jakä pith.

⁷ Kä ɛnɔ, /ciɛ pi̱i̱th kiɛ wääc ɛnɔ tee luɔt ɔ, ɛ jɛn Kuoth kärɔa min jakɛ kä pith.

⁸ Ram mi pi̱i̱th kɛnɛ ram mi wääc päärkɛ, kä bi ramɔ mucdɛ jek kɛ pek la̱tdɛ.

⁹ Kɛ ɣöö kɛ kɔn la̱a̱t Kuɔth ti lät kɛɛl. Kä kɛ yɛn kak Kuɔth, kä kɛ yɛn ti̱c Kuɔth bä.

¹⁰ Kä ce̱tkɛ puɔ̱th baaŋ Kuɔth in cɛ ka̱m ɣä, cä keŋ rialikä ce̱tkɛ läät mi kuur, kä lät radɔ̱diɛn wi̱cdɛ. A ramɔ nik la̱t in lätdɛ ni jɛ.

¹¹ Kɛ ɣöö thilɛ ram mi dee keŋ täth a /ci mɔ a min ca la̱t ni wen. Keŋ ɛmɔ ɛ jɛn Yecu Kritho.

¹² Täämɛ mi cuŋ raan luaak wi̱i̱ keŋä kɛ da̱a̱p, kiɛ ciɛk in bo̱r, kiɛ pääm ti di̱t kökdiɛn, kiɛ jiɛn, juaac, kiɛ nyon,

¹³ bi la̱t raamɔ jɔɔc. Kɛ ɣöö bi cäŋ luɔ̱k ɛ nyoth kɛɛliw, kä ba jɛ nyoth kɛ mac, kä bi mac lät tin ca lat ɛ ram ɛmɔ ɣɔ̱n.

¹⁴ Kä mi bi min ca täth wi̱i̱ keŋä ɛmɔ ŋot kɛ cuɔ̱ŋ, bi ram in tääth jɛ muc jek.

¹⁵ Kä mi ca min ca täth waaŋ, bi tääth la̱tdɛ bath, ba kän ni tääth kärɔa, ce̱tkɛ mi känɛ kɛ mac.

¹⁶ Yɛn /cia jɛ ŋäc, ɛn ɣöö lapɛ luaak Kuɔth, kä cieŋ Yiëë Kuɔth rɛydun?

¹⁷ Mi yär raan luaak Kuɔth bi Kuoth ram ɛmɔ däk, kɛ ɣöö luaak Kuɔth rɛlɛ rɔ, kä kɛ yɛn luaak Kuɔth ɛmɔ.

¹⁸ Yɛn /cuarɛ rɔ met. Mi caar raan ɛ i̱ pɛlɛ ɛn runi ti̱ti̱, a jɛ la dɔ̱a̱r kɛ ɣöö bɛ pɛl kɛ thuɔ̱k.

¹⁹ Kɛ ɣöö pɛl ɣɔaa ɛmɛ ɛ dɔ̱ɔ̱r kä Kuɔth. Kɛ ɣöö ca jɛ gɔ̱r i̱, “Jɛn kääpɛ nɛy tin pɛl rɛy ca̱a̱pnikiɛn,”

²⁰ Kä ca jɛ lar guäth mi dɔ̱ŋ i̱, “Kuäär ni Kuoth ŋäcɛ cär nɛɛni ti pɛl, ɛn ɣöö thilɛ kɛ luɔt.”

²¹ Kä a thil ram mi liak min la̱tkɛ ɛ naath. Kɛ ɣöö ti diaal kɛ nyinkun,

²² a cäŋɛ Puɔl, kiɛ A-pɔ-löth, kiɛ Thi̱i̱-päth, kiɛ ɣɔw ɛmɛ, kiɛ tëk, kiɛ lia̱a̱, kiɛ täämɛ mɛ, kiɛ nhiam, kɛn diaal kɛ nyinkun,

²³ kä yɛn lapɛ nɛy Kritho, kä Kritho ɛ raan Kuɔth.