1 Kor 2 - RUAC KUƆTH IN RƐL RƆ

Ruac kɛ kui̱ puɔ̱tdä Kritho jiaath

¹ Mëë cä ben kä yɛ, dämaari, ɣän /ka̱n ben ɛ la̱tdä yɛ ruac kɛ kui̱ Kuɔth kɛ rieet ti di̱t kiɛ pɛl.

² Kɛ ɣöö cä jɛ lar ɛn ɣöö thilɛ mi bä ŋa̱c rɛydun ɛ ni Yecu Kritho, kɛnɛ lia̱a̱dɛ wi̱c jiaath in ri̱ew.

³ Kä ɣän mëë ba̱a̱ kä yɛ kɔ̱a̱cä kä lathɛ ɣä kɛ dual mi di̱i̱t.

⁴ Kä ruacdä kɛnɛ ŋi̱i̱cdä /cäkɛ lat kɛ rieet pɛlä nath, duundɛ ɣöö latdä kɛ kɛ ŋäc bumä Yieekä Kuɔth.

⁵ Kɛ ɣöö /ci ŋa̱thdun lɔ̱ŋ rɛy pɛlä nath, duundɛ ɣöö lɔ̱ŋɛ rɛy bumä Kuɔth.

Pɛl Kuɔth in thuɔ̱k

⁶ Kä ŋotdɛ bä ruacä kɛ pɛl kɛ nɛy tin ci dël. Kä /ciɛ pɛl runi ti̱ti̱ kiɛ pɛl ruëëcni runi ti̱ti̱ tin bathkɛ buɔ̱mdiɛn.

⁷ Kä ɣän latdä ni pɛl Kuɔth tin la tɛ̱̈ɛ̱̈ni, ci Kuoth kɛ car kɛ kui̱ bumädan ni mëë /ka̱n ɣɔw ni cak.

⁸ Thilɛ ram kɛl kä ruëëc runi ti̱ti̱ mi ŋäc mɛmɛ. Kɛ ɣöö mi ca jɛ ŋa̱c ɛ kɛn, /cikɛ Kuäär buɔyä dee pua̱t jiaath.

⁹ Ce̱tkɛ mëë ca gɔ̱r i̱, “Min /ken waŋ ɛ met nɛn, /ken ji̱th ɛ met liŋ, kä mi /ken raan ɛ car kɛ lɔcdɛ, ɛ jɛn min ci Kuoth ɛ rialikä, kɛ kui̱ nɛɛni tin nhɔakɛ jɛ.”

¹⁰ Ci Kuoth ti̱ti̱ nyuɔ̱th kɔn kɛ Yiëëdɛ. Kɛ ɣöö Yiëë go̱o̱rɛ ŋɔaani diaal, amäni tɛ̱̈ɛ̱̈ni Kuɔth.

¹¹ Kɛ ɣöö ɛŋa mi ŋäc cär ran /ciɛ ni yiëë ran in te rɛydɛ? Kä inɔ bä, thilɛ ram mi ŋäc cär Kuɔth diaal, ɛ ni Yiëë Kuɔth.

¹² Täämɛ canɛ yiëë jek mi /ci mɔ a yiëë ɣɔaa, duundɛ ɣöö ɛ Yiëë mi bä kä Kuoth, kɛ ɣöö dënɛ muc tin ci Kuoth kɛ ka̱m kɔn ŋa̱c.

¹³ Kä latnɛ ruac ɛmɛ kɛ rieet ti /ca ŋi̱i̱c kɛ pɛl nath ti ŋi̱eeckɛ kɛ Yiëë, kɛ ɣöö ŋi̱eecnɛ nyin yieekä nɛy tin tekɛ yiëë.

¹⁴ Kä nɛy tin /ci a ji̱ yieekä /ca mucni Yieekä Kuɔth jek, kɛ ɣöö kɛ dɔ̱ɔ̱r kä kɛ. Kä /cikɛ cup lɔɔcdiɛn, kɛ ɣöö jëkɛ luɔtdiɛn kɛ ciaaŋ yieekä kärɔa.

¹⁵ Kä nɛy tin tekɛ yiëë luɔ̱kɛ luɔ̱ɔ̱tni ŋɔaani diaal, kä thilɛ ram mi bikɛ luk.

¹⁶ “Kä ɛŋa mi ŋäc ca̱r Kua̱r ni Kuoth, mɔ dee jɛ luek ɔ?” Kä kɔn ta̱nɛ kɛ ca̱r Kritho.