1 Kor 16 - RUAC KUƆTH IN RƐL RƆ

Muc kɛ kui̱ ji̱ ŋäthä

¹ Täämɛ kɛ kui̱ mucä kɛ nɛy tin ci Kuoth kɛ lɛy, guɔ̱ɔ̱rɛ ni duɔ̱ɔ̱p ëë ŋi̱i̱c ni ji̱ duëël Kuɔth kä Gä-lëë-cia.

² Kɛ cäŋ in jio̱l rɛy juɔkni diaal bi ramɔ kä yɛ duɔ̱ɔ̱r la̱th go̱lä, kä tɔ̱wɛ jɛ, ce̱tkɛ mi bi tekɛ rëp, kɛ ɣöö /ca muc bi lɛ dol mi wa̱a̱ ben.

³ Kä mi wa̱a̱ cop, bä nɛy tin cia car ɛn ɣöö bi wä ja̱k kɛ warɛgak, kɛ ɣöö ba muckun naŋ kä Jɛ-ru-tha-lɛm.

⁴ Mi cia jɛ car ɛn ɣöö bä wä bä, kä bikɛ rɔ̱ ma̱t ɣä.

Ca̱a̱p Puɔl

⁵ Ɣän bä yɛ ben gui̱l mi wa̱a̱ rët kɛ Ma-tha-do-nia, (kɛ ɣöö göörä rët kɛ Ma-tha-do-nia,)

⁶ kä dɔ̱ŋ bä te kɛɛl kɛ yɛ, kiɛ bä mäy thuk, kɛ kui̱ kä ɣöö bia ɣä nam rɛy ja̱lä, guäthɔ wa̱a̱ thi̱n ɔ.

⁷ Kɛ ɣöö /cä gui̱lun go̱r ɛn täämɛ, ɣän bakä ni yɛ. Ɣän göörä jɛ ɛn ɣöö bä jääny kɛ yɛ kɛɛl, mi nhɔk Kuäär ɛ.

⁸ Kä ɣän bä te kä Ɛ-pɛ-thäth amäni Cäŋ kä jiɛn dhieec.

⁹ Kɛ ɣöö ca ɣä lëp thi̱i̱k ɛlɔ̱ŋ kɛ kui̱ läätdä mi gɔaa, kä tëëkɛ löök ti ŋuan.

¹⁰ Mi wä Ti-mo-thi wä ben, tiɛtdɛ jɛ ɛn ɣöö bɛ thil mi dualkɛ jɛ rɛydun, kɛ ɣöö lätdɛ ni la̱t Kua̱r ni Yecu ce̱tkɛ ɣä.

¹¹ Kä ɛnɔ, a thil ram mi caany jɛ. Namɛ jɛ dupdɛ kɛ mal, kɛ ɣöö derɛ ben kä ɣä. Kɛ ɣöö diɛɛwä jɛ ɛn ɣöö bɛ ben kɛnɛ dämaari.

¹² Kɛ kui̱ dämandan ni A-pɔ-löth, ɣän cä jɛ läŋ ɛlɔ̱ŋ ɛn ɣöö bɛ yɛ gui̱l kɛnɛ dämanikɔn tin kɔ̱kiɛn, kä duundɛ ɣöö /ken Kuoth ɛ nhɔk ɛn ɣöö bɛ ben kä yɛ ɛn täämɛ. Bɛ ben, mi wëë tekɛ gua̱a̱th.

Ruac in jɔak

¹³ Niɛkɛ rɔ, cuɔ̱ŋɛ a bum rɛy ŋäthädun, a lo̱ckun bum, kä buɔ̱mɛ.

¹⁴ La̱tdɛ lätkun diaal kɛ nhök.

¹⁵ Täämɛ dämaari, ŋa̱cɛ jɛ ɛn ɣöö ji̱ gɔaal Thɛ-pa-näth kɛ kɛn nɛy tëë jio̱l tëë rietkɛ rɔ̱ dueeri kä A-ke-ya, kä cikɛ rɔ̱ ka̱m luäk nɛɛni tin ci Kuoth kɛ lɛy.

¹⁶ La̱ŋä yɛ ɛn ɣöö bia rɔ̱ ka̱m luäk nɛɛni ti ce̱tkɛ tɔ̱, kɛ nɛy diaal tin lät kɛɛl kɛ kɛ.

¹⁷ Ɣän tɛth lɔcdä kɛ ben Thɛ-pa-näth kɛnɛ Por-tu-na-täth kɛ A-ke-kuth, kɛ ɣöö cikɛ lät kɛ gua̱a̱thdun mëë ta̱yɛ jɔ̱ɔ̱r,

¹⁸ kɛnɛ ɣöö cikɛ yiëëdä jakä gɔaa amäni yieykun. Inɔ ŋiɛcɛ nɛy ti ce̱tkɛ tɔ̱.

¹⁹ Nërkɛ yɛ ɛ duël Kuɔth tin te kä E-cia. Nërkɛ yɛ ɛlɔ̱ŋ rɛy Kua̱r ni Yecu ɛ A-kui-lä kɛnɛ Pɛ-rith-ka, kɛɛl kɛ ji̱ duëël Kuɔth in te dhɔriɛn.

²⁰ Dämuɔɔri diaal nërkɛ yɛ. A ramɔ ner ramɔ kɛ ci̱em nho̱kä mi rɛl rɔ.

²¹ Ner ɛmɛ gɔ̱ɔ̱rɛ ɣän Puɔl kɛ tetdä pa̱ny.

²² Mi tëëkɛ ram mi thil nhök kɛ Kuäär, a jɛ lamkɛ. Kuäära, bër!

²³ A puɔ̱th Kua̱r ni Yecu tekɛ yɛ.

²⁴ A nhök tekɛ yɛn diaal rɛy Kritho Yecu. Inɔnɔ.