1 Kor 15 - RUAC KUƆTH IN RƐL RƆ

Jiëc Kritho li̱th

¹ Täämɛ dämaari, ɣän ti̱emä yɛ thuk Kuɔth ti gɔw tëë cä la̱t yɛ, tëë cia jek, kä cia cuɔ̱ŋ thi̱n.

² Kɛ kɛn tin ka̱n kɛ yɛ, mi ka̱pɛ kɛ a bum kɛn tëë cä la̱t yɛ (ɛ ni mi ŋa̱thdun ɛ lɔar.

³ Kɛ ɣöö cä yɛ ka̱m min di̱t ni jɛn ɛlɔ̱ŋ, min cä jek bä. Ɛn ɣöö ci Kritho li̱w kɛ kui̱ dueerikɔn, ce̱tkɛ min ca gɔ̱r rɛy ruaacni Kuɔth,

⁴ cua jɛ kony, kä ca jɛ jiɛc li̱th kɛ diɔ̱ɔ̱k ni̱ni, ce̱tkɛ mi ca gɔ̱r rɛy ruaacni Kuɔth,

⁵ ɛn ɣöö cɛ päl kä Thi̱i̱-päth kä cɛ päl kä jaak da̱ŋ wäl rɛw.

⁶ Kä cuɛ päl kä nɛy ti la̱nykɛ kur dhieec kä ji̱ kɔaarɛ guäth ɔ kɛlɔ, ti ŋot ri̱wdiɛn teekä, cäŋ ni min ci tha̱a̱ŋkiɛn li̱w.

⁷ Cuɛ päl kä Je-mɛth, kä cuɛ päl kä jaak diaal.

⁸ Kä kɛ jɔakdɛ cuɛ päl kä ɣä bä, ɣän ram mi ca dap kɛ gua̱a̱th mi /ci a gua̱a̱thdɛ.

⁹ Kɛ ɣöö ɛ ɣän jak in kuiy ni jɛn, mi /ci ro̱ŋ kɛ ɣöö ba cɔl i̱ jak, kɛ ɣöö cä duel Kuɔth kɔŋ moc riɛk.

¹⁰ Kä duundɛ ɣöö kɛ puɔ̱th Kuɔth ɛ jɛn ɣän min mɔ ɣän, kɛ ɣöö /ken puɔ̱th baaŋdɛ a lɔar kä ɣä. A gua̱c kɛ mɔmɔ ɣän cä lät a bum ɛlɔ̱ŋ kä kɛn diaal,) cäŋ /ciɛ ɣän lätdɛ mɔ, ɛ puɔ̱th Kuɔth in tekɛ ɣä.

¹¹ Mi ɛ ɣän latdɛ mɔ kiɛ kɛn, cakɔ ruac Kuɔth lat, kä cia cu ŋa̱th.

Jiëcdan li̱th

¹² Täämɛ, mi latkɔ jɛ ɛn ɣöö ca Kritho jiɛc li̱th, ɛŋu laar tha̱a̱ŋkun ɛ ɛn ɣöö thilɛ jiëc nath li̱th ɔ?

¹³ Kä mi thilɛ jiëc nath li̱th, kä /ka̱n Kritho jiɛc li̱th.

¹⁴ Kä mi /ka̱n Kritho jiɛc li̱th, latdä kɛ ruaacni Kuɔth ɛ baŋ, kä ŋa̱thdun ɛ baŋ.

¹⁵ Kä kɔn cakɔ duer kɛ lat ruaacni Kuɔth, kɛ ɣöö cakɔ jɛ lar ɛn ɣöö Kuoth cɛ Kritho jiɛc li̱th. Kä mi ɛ thuɔ̱k ɛn ɣöö /ka̱n naath jiɛc li̱th, kä /kenɛ Kritho jiɛc li̱th.

¹⁶ Kä mi /ka̱n nɛy ti ci li̱w jiɛc li̱th, kä inɔ /ka̱n Kritho jiɛc li̱th.

¹⁷ Kä mi /ka̱n Kritho jiɛc li̱th, ŋa̱thdun ɛ baŋ, kä ŋot yɛn rɛy dueerikun.

¹⁸ Kä nɛy tin ci li̱w bä rɛy Kritho cikɛ dhiap.

¹⁹ Kä mi ŋa̱thdan rɛy Kritho ɛ kui̱ teekä mɛmɛ kärɔa, kä ba par ni kɔn ɛlɔ̱ŋ kä ji̱ ɣɔaa ɛmɛ diaal.

²⁰ Kä kɛ thuɔ̱k ca Kritho jiɛc li̱th. Ɛ jɛn ram in nhiam mi nyooth ɣöö bi nɛy tëë ci li̱w rɔ jiɛc li̱th.

²¹ Kɛ ɣöö ce̱tkɛ min bä lia̱a̱ kä ram kɛl, bi jiëc nath kɛ rɔ̱ li̱th ben kä ram kɛl bä.

²² Kɛ ɣöö ci nɛy diaal li̱w kɛ A-dam, ba nɛy diaal jakä tëk kɛ Kritho.

²³ Kä ba ramɔ jiɛc kɛ gua̱a̱thdɛ, bi Kritho ben kɛ nhiam, kä kɛ bendɛ min rɛwdɛ ba nɛɛkɛ jiɛc li̱th.

²⁴ Kä ɛ jɛn bi guut ɣɔaa cu ben, mi wa̱a̱ Kuoth in la Gua̱a̱r in te nhial ka̱m kuäär, kɛ kɔr kä mi cɛ ruëëc diaal kɛnɛ buɔ̱mdiɛn däk.

²⁵ Kɛ ɣöö jɛn bɛ dhil ruëc amäni mi cɛ ji̱ tɛ̈rɛ diaal la̱th piny ciöknikɛ.

²⁶ Kä gua̱n tɛ̈r in jɔak in ba däk ɛ lia̱a̱.

²⁷ Kɛ ɣöö ca jɛ gɔ̱r i̱, “Kuoth cɛ ŋɔaani diaal la̱th piny ciöknikɛ.” Kä mëë wëë i̱, “Ŋɔaani diaal tekɛ piny ciöknikä,” kä jɔcɛ ɛn ɣöö /ci Kuoth in läth ŋɔaani diaal pinydɛ te thi̱n.

²⁸ Kä mëë ca ŋɔaani diaal la̱th pinydɛ, bi Gat ran puɔ̱nydɛ te piny raam ëë läth ŋɔaani diaal pinydɛ, kɛ ɣöö bi Kuoth a ti diaal kä ti diaal.

²⁹ Mi /ciɛ jɛn, lot naath ni ŋu mi lakɛ rɔ̱ kɛ kui̱ nɛɛnikiɛn ti ci li̱w? Mi /ca nɛy tin ci li̱w jiɛc, ɛŋu lakɛ naath ɔ kɛ kui̱diɛn?

³⁰ Kä ɛŋu lathnɛ rɔ̱ rɛy rikä gua̱thni diaal ɔ?

³¹ Ɣän la li̱ewä ni ciaŋ, dämaari! Ɣän liakä rɔ kɛ kui̱dun liak mi latdä rɛy Kritho Yecu Kuääran.

³² Kä mi cä nyiëëny kɛ ley dɔaar kɛ kui̱ kä tin ŋääth naath kɛ kä Ɛ-pɛ-thäth ɛŋu mi cä jek thi̱n? Mi /ca nɛy tin ci li̱w jiɛc li̱th, “Mi̱ethnɛ kä ma̱thnɛ kɛ ɣöö iruun banɛ li̱w.”

³³ A yɛ /ca mɛt, “Ja̱l kɛ̈ɛ̈l kɛ mäthni ti jiäk yärɛ ciɛŋ ti gɔw.”

³⁴ Luɔ̱nyɛ kä ca̱run in gɔaa, kä /cuarɛ duer lɛ nyɔk. Kɛ ɣöö tha̱a̱ŋ nath thilkɛ ŋäc Kuɔth. Latdä mɛmɛ kɛ kui̱ po̱cädun.

Jiëc pua̱ny li̱th

³⁵ Kä bi ram kɛl thiec i̱, “Jiackɛ nɛy tin ci li̱w i̱di? Kä bäkɛ kɛ puɔ̱ny mi te i̱di?”

³⁶ Ji̱n ram mi dɔ̱a̱r! Mɔ piithi mɔ /cɛ tëk ɛ ni mi cɛ kɔŋ riɔw.

³⁷ Kä ɛnɔ piithi mɔ /ciɛ jɛn bia puɔ̱ny ɔ, ɛ kuɛ̈ɛ̈ baaŋ dɔ̱ŋ ɛ manytap kiɛ beel dɔ̱diɛn.

³⁸ Kä Kuoth mocɛ jɛ puɔ̱ny ce̱tkɛ mi cɛ mɛk, kä mocɛ kuɛ̈ɛ̈ ɔ kɛ puɔ̱nydɛ pa̱ny.

³⁹ Kɛ ɣöö /ci ri̱ŋ diaal a kɛl, tëëkɛ ri̱ŋ kɛ kui̱ nath, kɛ kɛl kɛ kui̱ leyni, kɛ kɛl kɛ kui̱ din, kɛ kɛl kɛ kui̱ rɛc.

⁴⁰ Tëëkɛ pua̱ny nhial kä tëëkɛ pua̱ny piɛny. Kä gɔɔy pua̱a̱ny nhial ɛ kɛl, kä maan pua̱a̱ny piɛny ɛ mi dɔ̱ŋ.

⁴¹ Maan ca̱ŋ ɛ kɛl, kä maan path ɛ mi dɔ̱ŋ, kä maan kuɛli ɛ göl. Kɛ thuɔ̱k te kuɛl kɛ dääk kɛ kuɛl in dɔ̱ŋ kɛ maan.

⁴² Tëë thi̱n inɔ bä kɛ jiëc nɛɛni ti ci li̱w li̱th. Mɔ ca pith ɔ bɛ thil, kä mɔ ca jiɛc ɔ /cɛ bi thil.

⁴³ Piɛthkɛ jɛ rɛy thil luthä, kä jiackɛ jɛ rɛy luthä. Piɛthkɛ jɛ rɛy nyuänä, kä jiackɛ jɛ rɛy bumä.

⁴⁴ Piɛthkɛ jɛ kɛ puɔ̱ny ri̱eŋ, kä jiackɛ jɛ ɛ puɔ̱ny yieekä. Mi tekɛ puɔ̱ny ri̱eŋ, tëëkɛ puɔ̱ny yieekä bä.

⁴⁵ Kä ca jɛ gɔ̱r i̱, “Ram min nhiam ni A-dam, cɛ a ram mi tëk,” kä A-dam in jɔak yiëë mi ŋun tëk.

⁴⁶ Kä /ciɛ yiëë ɛ nëë nhiam, duundɛ ɣöö ɛ ri̱ŋ, cu yiëë kulɛ ben.

⁴⁷ Ram ëë jio̱l bëë piny, jɛn ɛ tur, kä ram in rɛwdɛ bëë nhial.

⁴⁸ Ce̱t ji̱ tuɔ̱ɔ̱r kɛ raan tuɔ̱ɔ̱r, kä ce̱t ji̱ nhial kɛ raan nhial.

⁴⁹ Ce̱tkɛ min ce̱t kɔn kɛ cät ran tuɔ̱ɔ̱r, kä banɛ cu tekɛ ta̱a̱ ran nhial bä.

⁵⁰ Ɣän la̱rä mɛmɛ yɛ, dämaari, ɛn ɣöö nɛy tin tekɛ ri̱ŋ kɛnɛ riɛm /cikɛ kuäär Kuɔth bi jek, kä nɛy tin bi thil /cikɛ mi /ci bi thil bi jek.

⁵¹ Liɛŋɛ jɛ, ɣän la̱rä yɛ ruac mi cuäŋ naath. /Ci kɔn diaal bi li̱w, kä duundɛ ɣöö ba kɔn diaal loc,

⁵² kɛ gua̱a̱th mi tɔt mi ce̱tkɛ nyuɔ̱p waŋ, kɛ kuɔ̱th kaaŋä min jɔak. Kɛ ɣöö bi kaaŋ röt, kä ba nɛy tin ci li̱w jiɛc a /cikɛ bi lɛ thil, kä ba kɔn cu loc.

⁵³ Kɛ ɣöö bi ta̱a̱ pua̱a̱ny ɛ bi thil ɛmɛ ta̱a̱ pua̱a̱ny mi /ci bi thil dhil la̱th, kä bi ta̱a̱ pua̱a̱ny ɛ dhiapɛ ta̱a̱ pua̱a̱ny mi /ci bi dhiap dhil la̱th.

⁵⁴ Mi wa ta̱a̱ pua̱a̱ny mi /ci bi thil la̱th wi̱i̱kä mi bi thil, kä ba ta̱a̱ pua̱a̱ny mi /ci bi dhiap la̱th wi̱i̱kä mi bi dhiap, ɛ jɛn inɔ bi min ca gɔ̱r cu tuɔɔk ɔ i̱, “Ca lia̱a̱ roc kɛ puɔ̱t.”

⁵⁵ “Ji̱n lia̱a̱, guëthdu anikä? Ji̱n lia̱a̱, kacdu anikä?”

⁵⁶ Kac li̱eth ɛ duer, kä buɔ̱m dui̱rä ɛ ŋut.

⁵⁷ A liak tekɛ Kuoth mi mooc kɔn juc kɛ Kuääran ni Yecu Kritho.

⁵⁸ Kɛ kui̱ ɛmɔ, dämaari tin nhɔakä, cuɔ̱ŋɛ a bum, a yɛ /ca wany, la̱tdɛ ɛlɔ̱ŋ ni ciaŋ rɛy la̱t Kua̱r ni Yecu, kä ŋa̱cɛ jɛ ɛn ɣöö la̱tdun rɛy Kua̱r ni Yecu /ciɛ baŋ.