1 Kor 14 - RUAC KUƆTH IN RƐL RƆ

Tho̱p mucni go̱o̱kä kɛnɛ thuk ti gööl

¹ Guɔ̱ɔ̱rɛ ni nhök, kä görɛ ni muc yieekä kɛ lɔcdun kɛɛliw, min la muc ruac go̱o̱kä.

² Kɛ ɣöö nɛy tin ruac kɛ thok gööli ruackɛ kɛ Kuoth, /cikɛ ruac kɛ naath, kɛ ɣöö thilɛ ram mi liŋ kɛ. Latkɛ ti cua̱ŋkɛ naath rɛy Yieekä.

³ Kä kɛ pek in dɔ̱ŋ, ram mi lat ruaacni go̱o̱kä ruacɛ kɛ naath kɛ kui̱ pi̱ethdiɛn, kɛnɛ cuɔ̱mdiɛn, kɛ buɔ̱mdiɛn.

⁴ Kä nɛy tin ruac kɛ thuk gööli piɛthkɛ ni rɔ̱, kä nɛy tin lat ruaacni go̱o̱kä piɛthkɛ ni duel Kuɔth.

⁵ Täämɛ ɣän göörä ɣöö bi yɛn diaal ruac kɛ thuk ti kueckɛ, kä min göörä ɛlɔ̱ŋ ɛ ɣöö bia ruaacni go̱o̱kä lat. Kä ram in lat ruaacni go̱o̱kä, lenyɛ ram in ruac kɛ thuk gööli, ɛ ni mi ci raan ɛ loc kɛ ɣöö bɛ duel Kuɔth kulɛ pith.

⁶ Täämɛ dämaari, mi ba̱a̱ kä yɛ a ruacä kɛ thuk ti kueckɛ, dëë yɛ luäk i̱di, /ciɛ ni mi nöŋä ni yɛ nyuuth kiɛ ŋäc ŋɔaani, kiɛ ruac go̱o̱kä, kiɛ ŋi̱i̱c?

⁷ Ce̱t ta̱a̱diɛn kɛ ŋɔak ti /ci tëk tin nööŋkɛ, ce̱tkɛ kuɔ̱th kaaŋä kiɛ tuŋ, kɛ jiööth ti /ca rɔ̱ lot, dee raan min kuɔthkɛ ŋa̱c i̱di?

⁸ Kä mi /ci jɔw kaaŋä köör ro̱t agɔaa, ɛŋa mi bi rɔɔdɛ rialikä kɛ kui̱ köör?

⁹ Ɛ jɛn inɔ kɛ kui̱dun, mi ruac yɛn kɛ thuk gööli ti /ci cup lɔɔc nath, dee raan min ca lat ŋa̱c i̱di? Kɛ ɣöö inɔ bi ruacni ji̱n kɛ jiɔam.

¹⁰ Thilɛ diw ɛn ɣöö tëëkɛ thuk ti ŋuan rɛy ɣɔaa, kä thilɛ kɛl mi thil luɔt kä kɛ.

¹¹ Kä mi kuecä luɔt thuɔk, bä a juɔ̱r kä ram in ruac, kä bi ram in ruac a juɔ̱r kä ɣä.

¹² Ɛ jɛn inɔ kɛ kui̱dun, kä min görɛ mucni yieekä ɛlɔ̱ŋ, görɛ ni mucni tin ba naath jakä piɛthkɛ ni duel Kuɔth agɔaa.

¹³ Kɛ kui̱ ɛmɔ, gɔaa ni ɣöö bi ram in ruac kɛ thok go̱lä pal kɛ ɣöö bɛ min cɛ lat loc.

¹⁴ Kɛ ɣöö mi palä kɛ thok go̱lä, yiëëdä palɛ, kä ca̱rä cɛ lät.

¹⁵ Ɛŋu mi bä la̱t? Ɣän bä pal kɛ yiëë, kä bä pal kɛ ca̱r wec bä. Ɣän bä kiet kɛ yiëë, kä bä kiet kɛ ca̱r wec bä.

¹⁶ Kä mi pothi Kuoth kɛ yiëë, dee juɔ̱r, mi /kenɛ cop lɔcdɛ, ɛ lar i̱di, “Inɔnɔ” kɛ palu, mi kui̱cɛ min latdi?

¹⁷ Kɛ ɣöö dɔ̱ŋ ci tɛ̈th lɔaac lar a ro̱ŋ, kä /ken ram in dɔ̱ŋ ben nhial.

¹⁸ Ɣän la̱rä Kuoth tɛ̈th lɔaac ɛn ɣöö lënyä yɛn diaal kɛ ruac thukni ti kueckɛ.

¹⁹ Kä rɛy duëël Kuɔth dëë lat ni rieet da̱ŋ dhieec kɛ ca̱rä rɛy, kɛ ɣöö bä nɛy tin kɔ̱kiɛn ŋi̱eec, kä ɣöö dëë lat ni rieet ti bathdɔɔri wäl kɛ thok go̱lä.

²⁰ Dämaari kä nyiemaari, /cuarɛ bi ce̱tkɛ gaat rɛy cärädun, a cär ni yɛn ce̱tkɛ ruɔri rɛy kä mi jiääk, kä duundɛ ɣöö ca̱rɛ ce̱tkɛ nɛy ti di̱t.

²¹ Rɛy ŋuɔ̱t ca jɛ gɔ̱r i̱, “Kɛ nɛy ti tekɛ thok go̱lä, kɛ nɛy ti tekɛ lëëp gööli ɣän bä ruac kɛ nɛy ti̱ti̱, kä cäŋ ɛ jɛn inɔ, /cikɛ ɣä bi liŋ.” Ruac ni Kuäär ni Kuoth.

²² Kä ɛnɔ thuk ti kueckɛ ɛ nyuuth mi /ci mɔ akɛ kui̱ ji̱ ŋäthä, duundɛ ɣöö ɛ kui̱ nɛɛni ti thil ŋa̱th. Kä ruac go̱o̱kä /ciɛ kɛ kui̱ nɛɛni ti thil ŋa̱th, duundɛ ɣöö ɛ kui̱ ji̱ ŋäthä.

²³ Kä mi, ci duɔl ji̱ Kuɔth ben guäth kɛl kä ruac kɛn diaal kɛ thuk ti kueckɛ, kä bi ja̱a̱l kiɛ nɛy ti thil ŋa̱th ben rɛc, /cikɛ jɛ dee lar ɛn ɣöö cia yɔ̱ŋ?

²⁴ Kä mi lat yɛn diaal ni ruaacni go̱o̱kä, kä bi ja̱l kiɛ ram mi thil ŋa̱th ben rɛc, jɛn derɛ duerɛ jek kä kɛn diaal kä ba jɛ luk kɛ tin diaal tin cɛ liŋ.

²⁵ Kä kɛ kɔr kä min ca nyin lɔaac raam in /ci ŋa̱th nööŋ raar, jɛn ram ɛmɔ bɛ rɔ goŋ nhiam Kuɔth kä palɛ jɛ, kä bɛ jɛ la̱r i̱, “Kuoth a rɛydun pa̱ny.”

Ciaaŋ palä rɛy duëël Kuɔth

²⁶ Ɛŋu mi dëë la̱t, dämaari? Mi wä yɛn ben guäth kɛl, te ramɔ kɛ dit, kɛ ŋi̱i̱c, kɛ nyuuth, kɛ thok go̱lä, kiɛ luɔc ŋɔaani. A ŋɔaani diaal latkɛ kɛ kui̱ pi̱thä nath.

²⁷ Mi tëë ram mi ruac kɛ thok go̱lä, a ruac ni nɛy da̱ŋ rɛw kiɛ diɔ̱k kärɔ̱, kä ɛ ramɔ la ruac, kä a ram kɛl lat luɔcdɛ.

²⁸ Kä mi thilɛ ram mi lat luɔcdɛ, a ramɔ bit rɛy duëël Kuɔth, kä a jɛ ruac kärɔ̱ kä akɛ ruac kɛ Kuoth.

²⁹ A göök rɛw kiɛ diɔ̱k latkɛ ruaacni go̱o̱kä, kä a nɛy kɔ̱kiɛn thɛ̈mkɛ tin ca lar.

³⁰ Mi ca nyuuth ka̱m ram min nyuur gekä, a ram min ruac kɛ nhiam bit.

³¹ Kɛ ɣöö dee yɛn diaal ruac go̱o̱kä lat kɛ̈l kɛ̈ɛ̈li, kɛ ɣöö dee nɛy diaal tekɛ ŋäc, kä dee kɛn diaal cu buɔ̱m.

³² Kä yiey göökni tëë piny göökni.

³³ Kɛ ɣöö Kuoth /ciɛ Kuoth nyuɔɔni, ɛ Kuoth malä. (Ce̱tkɛ min te rɛy duëli Kuɔth nɛɛni Kuɔth diaal,

³⁴ gɔaa ni ɣöö bi män biɛt rɛy duëli Kuɔth. Kɛ ɣöö /ka̱n kɛ nhök ruac, duundɛ ɣöö bikɛ guɔ̱ɔ̱r ni naath, ce̱tkɛ min ca lar ɛ ŋut.

³⁵ Mi tëëkɛ mi görkɛ ɛ kɛn ɛn ɣöö ba ŋa̱c, akɛ thiëckɛ cɔwkiɛn cieŋ. Kɛ ɣöö ɛ pöc ɛn ɣöö bi ciek ruac rɛy duëël Kuɔth.

³⁶ Kiɛ ɛn ruac Kuɔth tuɔɔk kä yɛ? Kiɛ ci ruac Kuɔth peek kɛ yɛn kärɔ̱?)

³⁷ Mi caar raan ɛ ɛn ɣöö ɛ gök, kiɛ tëë kɛ buɔ̱m yieekä, derɛ jɛ ŋa̱c ɛnɛ gɔ̱a̱rä yɛ mɛ, ɛn ɣöö ɛ guk kä Kuäär ni Yecu.

³⁸ Mi /ci raan mɛmɛ ŋäc, jɛn /ca jɛ bi ŋa̱c.

³⁹ Kä ɛnɔ, dämaari, görɛ jɛ ɛn ɣöö bia ruaacni go̱o̱kä lat, kä /cuarɛ ruac kɛ thuk ti kueckɛ pen,

⁴⁰ kä duundɛ ɣöö ba ŋɔak diaal guir kɛ ciaŋ mi com.