1 Kor 12 - RUAC KUƆTH IN RƐL RƆ

Muc kä Yiëë in Gɔaa in Rɛl Rɔ

¹ Täämɛ dämaari rɛy Kritho, ɣän /cä jɛ go̱r ɛn ɣöö bia a nɛy ti /ka̱n la̱r lär kɛ kui̱ mucni yieekä.

² Yɛn ŋa̱cɛ jɛ mëë thilɛ yɛ ŋa̱th, cua yɛ böth palä kuthni jiɛn ti /ci ruac.

³ Kɛ kui̱ ɛmɔ ɣän göörä ɣöö bɛ wä lo̱cnikun ɛn ɣöö thilɛ ram mi ruac kɛ Yiëë Kuɔth mi dee wee i̱, “A lam tekɛ Yecu!” Kä thilɛ ram mi dee wee i̱, “Yecu ɛ Kuäär,” ɛ ni mi tëëkɛ Yiëë in Gɔaa in Rɛl Rɔ.

⁴ Täämɛ tëëkɛ muc ti gööl, kä ɛ jɛn Yiëë ɔ kɛl ɔ.

⁵ Kä tëëkɛ lät ti gööli, kä duundɛ ɣöö Kuäär ɛ kɛl.

⁶ Kä tëëkɛ luäŋ lätni ti gööl, kä duundɛ ɣöö ɛ Kuoth kɛl ɛ ni̱n läth lua̱ŋ lätni diaal rɛy nɛɛni diaal.

⁷ Ka̱mkɛ ramɔ muc Yieekä kɛ kui̱ gɔɔyä nɛɛni diaal.

⁸ Ka̱mkɛ ram kɛl muc ruac pɛlä ɛ Yiëë, kä kämɛ ram in dɔ̱ŋ muc ruac ŋäcä ŋɔaani ɛ jɛn Yiëë ɔ kɛl ɔ.

⁹ Jɛn Yiëë ɛmɔ mocɛ ram kɛl ŋa̱th, kä kämɛ ram in dɔ̱ŋ muc jakä nath kä gɔw ɛn Yiëë ɔ kɛl ɔ.

¹⁰ Ɛn yiëë cɛ ram kɛl moc lua̱ŋ lätni ti ga̱ykɛ naath, kɛ cɛ min dɔ̱ŋ moc kɛ ruac go̱o̱kä, kä cɛ min dɔ̱ŋ moc kɛ lua̱ŋ mi ŋäcɛ yiey ti gɔw kɛnɛ ti jiäk, kɛ cɛ min dɔ̱ŋ moc kɛ lua̱ŋ ruac kɛ thuk ti kueckɛ, kä cɛ min dɔ̱ŋ moc kɛ lua̱ŋ lucä thukni.

¹¹ Kä kɛn muc gööli ti̱ti̱ diaal lätkɛ ni ɛn Yiëë ɔ kɛl ɔ, ce̱tkɛ min go̱o̱rɛ cɛ ram ɔ ka̱m muc mi göl.

Puɔ̱ny kɛl mi tekɛ cuŋ ti ŋuan

¹² Ce̱tkɛ min puɔ̱ny ran ɛ kɛl, kä tëëkɛ cuŋ ti ŋuan, kä cuŋ pua̱a̱ny diaal tekɛ puɔ̱ny kɛl, cäŋ ŋuankɛ, inɔ ɛ jɛn ta̱a̱ Kritho bä.

¹³ Kɛ ɣöö rɛy Yieekä kɛl ca kɔn diaal lak puɔ̱ɔ̱ny kɛl, (ji̱ Juudh, kiɛ ji̱ Gɛ-rith, kuaany kiɛ nɛy ti lɔr) ca kɔn diaal jakä mäth kɛ Yiëë kɛl.

¹⁴ Kɛ thuɔ̱k puɔ̱ny /cɛ tekɛ cuɔ̱ŋ kɛl, kɛ cuŋ ti ŋuan.

¹⁵ Mi laar pät cio̱kä jɛ i̱, “Kɛ ɣöö /ciɛ ɣän pät tetdä, /ciɛ ɣän cuɔ̱ŋ pua̱a̱ny,” /ciɛ jɛn ɛ ni̱n dee jɛ jakä ɣöö /ciɛ tha̱a̱ŋ pua̱a̱ny.

¹⁶ Kä mi laar ji̱th jɛ i̱, “Kɛ ɣöö /ciɛ ɣän waŋ, /ciɛ ɣän tha̱a̱ŋ pua̱a̱ny,” /ciɛ jɛn ɛ ni̱n dee jɛ jakä ɣöö /ciɛ tha̱a̱ŋ pua̱a̱ny.

¹⁷ Kä mi puɔ̱ny kɛɛliw ɛ waŋ, dee li̱eŋ te ni? Kä mi puɔ̱ny kɛɛliw ɛ ji̱th, dee ŋua̱c te ni?

¹⁸ Kä duundɛ ɣöö kɛ ta̱a̱dɛ inɔ, ci Kuoth cuŋ pua̱ny diaal guir, cuɔ̱ŋɔ kä kɛ ce̱tkɛ min go̱o̱rɛ.

¹⁹ Kä mi kɛn diaal ɛ cuɔ̱ŋ kɛl, dee puɔ̱ny te ni?

²⁰ Kä duundɛ ɣöö kɛ ta̱a̱dɛ inɔ, cuŋ ŋuankɛ, kä ŋotdɛ puɔ̱ny ɛ kɛl.

²¹ Waŋ /cɛ tet dee jiök i̱, “/Ci ɣän ji̱ go̱r,” kä /ci wi̱c pa̱a̱t cio̱o̱k dee jiök i̱, “/Ci ɣän ji̱ go̱r.”

²² A gua̱c kɛ nɔmɔ pa̱ny, kɛn cuŋ pua̱ny, tin caar naath kɛ i̱ nyuän ni kɛn tekɛ kɛ luɔt.

²³ Kä cuŋ pua̱ny tin kuiy luthdan kɛ kɛ, kɛ kɛn tin ciaŋnɛ luthä ɛlɔ̱ŋ, kä cuŋ pua̱ny tin tiɛtni yuɔpnɛ kɛ ɛlɔ̱ŋ,

²⁴ kä /ci cuŋ pua̱a̱ny tin luɔ̱th nɛ tɔ̱tɔ̱ go̱r. Kä Kuoth cɛ puɔ̱ny rialikä inɔ, a mocɛ cuɔ̱ŋ mi tɔt luth mi di̱i̱t.

²⁵ Kä inɔ thilɛ puɔ̱ny dääk, kä duundɛ ɣöö dee cuŋ diaal ram ɔ tit.

²⁶ Mi bɛc cuɔ̱ŋ kɛl bɛckɛ kɛn diaal kɛɛl, kä mi luɔ̱thkɛ cuɔ̱ŋ kɛl bi cuŋ diaal lo̱ckiɛn tɛɛth kɛɛl.

²⁷ Täämɛ kɛ yɛn puɔ̱ny Kritho, kä lapɛ cuŋ pua̱nydɛ kɛ̈l kɛ̈ɛ̈li.

²⁸ Kä ci Kuoth naath kuany rɛy duëël Kuɔth, kɛ nhiam jaak, kɛ rɛwdɛ göök, diɔ̱ɔ̱kdiɛn ŋi̱eec, kɛ nɛy ti la̱tkɛ ti ga̱ykɛ naath, kɛ nɛy tin jakɛ naath kä gɔw, kɛ lua̱a̱k nath, kɛ ruëëc nath, amäni nɛy ti ruac kɛ thuk gööli.

²⁹ Kɛn ti̱ti̱ diaal kɛ jaak? Kɛn diaal kɛ göök? Kɛn diaal kɛ ŋi̱eec? Lät kɛn diaal ti ga̱ykɛ naath?

³⁰ Te kɛn diaal kɛ muc luäŋä jakä nath kä gɔw? Ruac kɛn diaal kɛ thuk ti kueckɛ? Te kɛn diaal kɛ lua̱ŋ lucädiɛn?

³¹ Kä inɔ görɛ ni lua̱ŋ mucni tin di̱t. Kä bä yɛ nyuɔ̱th duɔ̱ɔ̱p in gɔaa ni jɛn ɛlɔ̱ŋ.