1 Kor 10 - RUAC KUƆTH IN RƐL RƆ

Lär lär kɛ kui̱ jiäkni

¹ Ɣän göörä ɣöö bia jɛ ŋa̱c, dämaari, ɛn ɣöö te gua̱ndɔɔŋnikɔn diaal bo̱th ɛ pua̱a̱r, kä ci kɛn diaal rët kɛ bar,

² kä cua kɛn diaal lak ala ji̱ kɔaar Muthɛ piny puɔ̱rä kɛnɛ rɛy bar.

³ Kä cu kɛn diaal mi̱eth yieekä kɛl cam.

⁴ Kä cu kɛn diaal maath kɛ pi̱ yieekä mɔ kɛl ɔ. Cikɛ maath kä päm yieekä min cikɛ guɔ̱ɔ̱r, ɛn päm ɛmɔ ɛ jɛn Kritho.

⁵ Kä cäŋ ɛ jɛn inɔ, cu Kuoth lɔcdɛ jiääk kɛ ri̱wdiɛn ti ŋuan, kä cuɛ ri̱ŋkiɛn riaw där dɔaar.

⁶ Täämɛ cu ti̱ti̱ tuɔɔk kɛ ala luëëk kɛ kui̱dan, kɛ ɣöö /canɛ ciaŋ ti jiäk bi go̱r ce̱tkɛ kɛ.

⁷ /Cuarɛ kuth baaŋ pal ce̱tkɛ mëë ci tha̱a̱ŋkiɛn ɛ la̱t, ce̱tkɛ min ca gɔ̱r i̱, “Ci naath nyuur, kɛ ɣöö bikɛ mi̱th kä bikɛ maath, kä cukɛ rɔ̱ jiɛc kɛ ɣöö bikɛ duth.”

⁸ /Cuarnɛ duer lät kɛ leer ce̱tkɛ min ci tha̱a̱ŋkiɛn ɛ la̱t, kä cu nɛy ti bathdɔɔri ti jiɛn rɛw wi̱cdɛ diɔ̱k li̱w kɛ jɛn cäŋɔ kɛlɔ.

⁹ Kä /cuarnɛ Kuäär ni Kuoth ɣɔ̱n, ce̱tkɛ mëë ci tha̱a̱ŋkiɛn ɛ la̱t, kä cua kɛ däk ɛ thɔ̱ɔ̱l.

¹⁰ Kä /cuarnɛ go̱o̱ny, ce̱tkɛ mëë ci tha̱a̱ŋkiɛn ɛ la̱t kä cua kɛ däk ɛ Dääk.

¹¹ Cu ti̱ti̱ tuɔɔk kä kɛ ala luek, kä cua kɛ gɔ̱a̱r piny kɛ kui̱ ŋi̱i̱cädan, kɔn nɛy ti ci guut thiak kɛ ben.

¹² Kä mi caari jɛ ɛn ɣöö bumi, ku rɔ tit, kɛ ɣöö /ci bi tɛɛth.

¹³ Thilɛ ɣɔ̱n mi ci ben kä yɛ, mi /ken tuɔɔk kä nɛy diaal. Kuoth ɛ gua̱n ŋäthä, kä /cɛ yɛ bi pa̱l ɣöö ba yɛ ɣɔam kɛ buɔ̱m mi leny buɔ̱mdun. Kä mi wa yɛ ɣɔam bɛ yɛ moc duɔ̱ɔ̱p känä, kɛ ɣöö bia jɛ luäŋ kɛ ruɔ̱t.

¹⁴ Kɛ kui̱ ɛmɔ, dämaari, nɔ̱a̱nɛ rɔ̱ kä pal kuthni jiɛn.

¹⁵ Ruacä ce̱tkɛ mi ruacä kɛ nɛy ti tekɛ ca̱r, yɛn pua̱nykun luɔ̱kɛ mɔ cä la̱r yɛ mɔ.

¹⁶ Liɛɛr puthä min puɔthnɛ /ciɛ nyuaak kɛ riɛm Kritho? Kä juray in puɔ̱nynɛ /ciɛ nyuaak kɛ puɔ̱ny Kritho?

¹⁷ Kɛ ɣöö te ni juray kɛl thi̱n, kɔn nɛy ti ŋuan ti̱ti̱ lapnɛ puɔ̱ny kɛl, kɛ ɣöö canɛ nyuak ni ɛn juray ɔ kɛlɔ.

¹⁸ Carɛ ji̱ I-thɛ-rɛl, nɛy tin camkɛ muc tin thöpkɛ Kuoth /cikɛ a mät guäth mucä?

¹⁹ Kä ɛŋu mi luɔtdä? Ɛ ɣöö ɛn mi̱eth in ca thöp kuth baaŋ tëëkɛ luɔt, kiɛ jɛn kuoth baaŋ puɔ̱nydɛ tee luɔt ɔ?

²⁰ Ëëy, ɣän luɔtdä ni ɣöö, min tho̱p nɛy ti kueckɛ Kuoth ɛ, thöpkɛ jɛ kuth ti jiäk, a /ci mɔ a Kuoth. Kä /cä jɛ go̱r ɛn ɣöö dërɛ rɔ̱ mat kɛ kuth ti jiäk.

²¹ Yɛn /cia dee maath kɛ liɛɛr Kua̱r ni Yecu kä bia maath kɛ liɛɛr kuthni ti jiäk. Kä /cia dee mat guäth mi̱eth Kua̱r ni Yecu kɛnɛ gua̱a̱th mi̱eth kuthni ti jiäk.

²² Kiɛ görnɛ ɣöö bi Kuäär ni Kuoth tekɛ tiɛɛl? Kä car nɛ jɛ bum ni kɔn kä jɛ?

Ŋäc ciɛŋä gɔɔyä

²³ Ŋɔaani diaal luɔtkɛ rɔ̱, kä /cikɛ ŋɔak diaal gɔw tɔ̱. Ŋɔaani diaal luɔtkɛ rɔ̱, kä /cikɛ ŋɔak diaal lua̱kɛ naath tɔ̱.

²⁴ A raan /ci go̱r ni mi gɔaa kɛ kui̱dɛ, a jɛ go̱o̱r ni mi gɔaa kɛ kui̱ nɛɛni kɔ̱kiɛn.

²⁵ Camɛ ri̱ŋɔ kɔakɛ guäth ko̱kä mɔ, a thil thiec kɛ kui̱ cärä lɔaac.

²⁶ Kɛ ɣöö “piny ɛ duŋ Kua̱r ni Kuoth amäni ŋɔaani diaal tin te rɛydɛ.”

²⁷ Mi ca yɛ cɔl ɛ nɛy ti /ci Kuɔth ŋäth, kä nhɔakɛ wä, camɛ mɔ ca kuëŋ nhiamdun ɔ a thil thiec kɛ kui̱ cärä lɔaac.

²⁸ Kä mi ci raan yɛ jiök i̱, “Mɛmɛ ca thöp ala muc kɛ kui̱ kuɔth,” ɛnɔ /cuarɛ jɛ cam, kɛ kui̱ raam in ci jɛ kɛnɛ kui̱ cärä lɔaac.

²⁹ Ɣän luɔtdä ni ca̱r lɔaac raam ɛmɔ, a /ci mɔ a ca̱r lɔaacdun inɔ dɔ̱ŋ dee raan thiec i̱, “Kɛ kui̱ ŋukä bä ciaaŋdä päl kɛ kui̱ cärä lɔaac raam mi dɔ̱diɛn ɔ?

³⁰ Mi mi̱ethä kɛ tɛ̈th lɔaac, ɛŋu bä ɣä lat jɔ̱ɔ̱r ɔ kɛ kui̱ kä mi cä Kuoth la̱t tɛ̈th lɔaac kɛ jɛ?”

³¹ Kä ɛnɔ, mi mi̱th yɛn kiɛ mäth yɛn, kiɛ ɛn duɔ̱ɔ̱r ɔ bia la̱t ɔ, la̱tdɛ kɛn diaal kɛ kui̱ puɔnyä Kuɔth.

³² /Cuarɛ ji̱ Juudh kiɛ ji̱ Gɛ-rith, kiɛ duel Kuɔth moc kɛ riɛk,

³³ ce̱tkɛ min cä jɛ ɣɔ̱n ɛn ɣöö bä lo̱c nɛɛni diaal jakä tɛth kä ti diaal tin la̱tdä, kä /cä go̱r ni mi gɔaa kɛ kui̱dä, ɛ mi gɔaa kɛ kui̱ nɛɛni ti ŋuan ɛn ɣöö dee kɛ kään.