1 Kor 1 - RUAC KUƆTH IN RƐL RƆ

¹ Ɛ ɣän Puɔl, mi ca cɔl ce̱tkɛ min go̱o̱r Kuoth ɛ ɛn ɣöö bä a jak Kritho Yecu, kɔnɛ dämandan ni Thɔ-thɛ-niith,

² Gɔ̱a̱rkɔ jɛ ji̱ duëël Kuɔth in te kä Ko-rinth, kä yɛn tin ca lɛy kɛ Kritho Yecu, tin ca cɔl ala nɛɛ Kuɔth, kɛɛl kɛ nɛy diaal tin cɔalkɛ ciöt Kua̱ran ni Yecu Kritho, Kuääriɛn kä Kuääran, gua̱thni diaal.

³ A puɔ̱th baaŋ kɛnɛ mal Kuɔth in la Gua̱a̱ra kɛnɛ Kuäär ni Yecu Kritho tekɛ yɛ.

Puth rɛy Kritho

⁴ Ɣän la̱rä Kuoth tɛ̈th lɔaac ni ciaŋ kɛ kui̱dun, kɛ kui̱ puthä baaŋ Kuɔth min ca ka̱m yɛ rɛy Kritho Yecu.

⁵ Kɛ ɣöö kɛ mat kɛ Kritho ci yɛn riäŋ rɛy kä ti diaal, a te ruac kɛnɛ ŋäc ŋɔaani diaal.

⁶ Ca ruac nenä kɛ kui̱ Kritho jakä thuɔ̱k rɛydun.

⁷ Kɛ kui̱c ɛmɔ thilɛ muc yieekä mi te jɔ̱ɔ̱r kä yɛ, min liɛpɛ jɔac Kua̱ran ni Yecu Kritho.

⁸ Kä bɛ yɛ jakä bum amäni guutdɛ bia thil bɛ̈ɛ̈l kɛ cäŋ Kua̱ran ni Yecu Kritho.

⁹ Kuoth ɛ Gua̱n ŋäthä, kä jɛn cɛ yɛ cɔl rɛy matdä kɛ Gatdɛ ni Yecu Kritho Kuääran.

Dääk rɛy luaak Kuɔth

¹⁰ Ɣän la̱ŋä yɛ, dämaari kä nyiemaari, kɛ ciöt Kua̱ran ni Yecu Kritho, ɛn ɣöö dee yɛn diaal rɔ̱ mat kɛ ɣöö bɛ thil dääk rɛydun. Kä duundɛ ɣöö ma̱tdɛ kɛ ca̱r kɛl kɛnɛ ruac kɛl.

¹¹ Kɛ ɣöö ca jɛ la̱r ɣä ɛ ji̱ Ko-lo-i, dämaari, ɛn ɣöö ta̱yɛ kɛ ŋak kamnikun.

¹² Min luɔtdä ɛ ɣöö laar ramɔ jɛ kä yɛ i̱, “Ɛ ɣän raan Puɔl,” kiɛ “Ɛ ɣän raan A-pɔ-löth,” kiɛ “Ɛ ɣän raan Thi̱i̱-päth,” kiɛ “Ɛ ɣän raan Kritho.”

¹³ Ca Kritho da̱a̱k? Ca Puɔl pua̱t jiaath kɛ kui̱dun? Kiɛ ca yɛ lak kɛ ciöt Puɔl?

¹⁴ Ɣän tɛth lɔcdä kɛ Kuoth ɛn ɣöö thilɛ ram kɛl kä yɛ mi cä lak, ɛ ni Ki-rith-päth kɛnɛ Gay-äth.

¹⁵ Kä bɛ thil ram mi laar jɛ ɛn ɣöö ca jɛ lak kɛ ciötdä.

¹⁶ (Kä cua ji̱ dhɔaar Thɛ-pa-näth lak bä. Kä kuecä jɛ mi tëë kɛ radɔ̱diɛn mi cä lak.)

¹⁷ Kä /ken Kritho ɣä ja̱k kɛ ɣöö bä naath lak, kä ɛ ɣöö bä thuk Kuɔth ti gɔw lat, kä /cä jɛ lat kɛ ruac pɛlä nath, kɛ ɣöö /ci lua̱ŋ jiaath Kritho ëë pua̱t kɛ jɛ thi̱n bi thil.

Kritho ɛ buɔ̱m kä pɛl Kuɔth

¹⁸ Kɛ ɣöö ruac kɛ kui̱ jiaath in ca Yecu pua̱t thi̱n ɛ dɔ̱ɔ̱r kä nɛy tin li̱w, kä duundɛ ɣöö ɛ buɔ̱m Kuɔth kä kɔn nɛy tin ka̱nkɛ.

¹⁹ Kɛ ɣöö ca jɛ gɔ̱r i̱, “Ɣän bä pɛl nɛɛni tin pɛl däk, kä bä ŋäc ŋɔaani nɛɛni tin ŋa̱ckɛ ŋɔak woc.”

²⁰ Ram mi pɛl anikä? Kä ram in ŋäc gɔ̱a̱r anikä? Kä gua̱n ŋaknɔmä ɣɔaa ɛmɛ anikä? Kä /ken Kuoth pɛl ɣɔaa ɛmɛ jakä dɔ̱ɔ̱r?

²¹ Kɛ ɣöö rɛy pɛlä Kuɔth, /ken ɣɔw Kuoth ŋa̱c kɛ pɛlɛ ɛmɛ. Ci Kuoth ɛ lar ɛn ɣöö bɛ nɛy ti tekɛ ŋa̱th kän kɛ dɔ̱ɔ̱r latädan kɛ ruaacnikɛ.

²² Kɛ ɣöö ji̱ Juudh görkɛ ni nyuuthni ti ga̱ykɛ naath, kä ji̱ Gɛ-rith nhɔakɛ ni pɛl.

²³ Kä duundɛ ɣöö latnɛ puɔ̱t Kritho jiaath. Ɛ jɛn la riɛk kä ji̱ Juudh ɔ, kä ɛ jɛn la dɔ̱ɔ̱r kä Jur ɔ.

²⁴ Kä kɛ kui̱ nɛɛni tin ca cɔl ɛ Kuoth, ji̱ Juudh kɛnɛ ji̱ Gɛ-rith, jɛn Kritho ɛmɔ ɛ jɛn la buɔ̱m Kuɔth ɔ kä pɛl Kuɔth.

²⁵ Kɛ ɣöö dɔ̱ɔ̱r Kuɔth lenyɛ pɛl nath, kä kɔ̱a̱c Kuɔth lenyɛ buɔ̱m nath.

²⁶ Kä carɛ mëë cɔalkɛ yɛ, dämaari, thilɛ nɛy ti ŋuan ti pɛl kɛ ta̱a̱ nath, kä /cikɛ nɛy ti ŋuan bum tɔ̱, kä /cikɛ nɛy ti ŋuan luɔ̱thkɛ rɛydun ɔ.

²⁷ Kä duundɛ ɣöö Kuoth cɛ mi dɔ̱a̱r mɛk rɛy ɣɔaa, kɛ ɣöö bɛ nɛy ti pɛl jakä po̱c. Kä Kuoth cɛ mi kɔ̱c mɛk rɛy ɣɔaa, kɛ ɣöö bɛ nɛy ti bum jakä po̱c.

²⁸ Kuoth cɛ mi kuiy kä latkɛ jɔ̱ɔ̱r kä caar ɣɔwɛ i̱ thil luɔt mɛk, kɛ ɣöö bɛ ŋɔaani tin caar ɣɔwkɛ i̱ tekɛ luɔt däk.

²⁹ Kɛ ɣöö thilɛ ram mi bi rɔ liak nhiam Kuɔth.

³⁰ Kä duundɛ ɣöö ɛ jɛn la tëkdun ɔ rɛy Yecu Kritho, min ci Kuoth ɛ jakä pɛlädan. Kɛ jɛ cakɔn moc cuɔ̱ɔ̱ŋ ɛ Kuoth, kä cikɔn a nɛɛkɛ ti rɛl rɔ̱ ti ca lony ɛ lɔr.

³¹ Kɛ kui̱ ɛmɔ, ce̱tkɛ min ca gɔ̱r i̱, “Ram mi liak rɔ̱ a jɛ liak ni Kuäär ni Yecu.”