1 Jɔ̱ɔ̱n 5 - RUAC KUƆTH IN RƐL RƆ

Tiëmdan kɛ ɣɔw

¹ Nɛy diaal ti ŋa̱thkɛ jɛ ɛn ɣöö Yecu ɛ jɛn Kritho, kɛ gaat Kuɔth. Kä ram mi nhɔk gua̱n, nhɔkɛ gatdɛ bä.

² Kɛ jɛn duɔ̱ɔ̱p ɛmɔ ŋa̱cnɛ jɛ ɛn ɣöö nhɔaknɛ gaat Kuɔth, mi nhɔaknɛ Kuoth kä luth kɔn luëëkɛ.

³ Kä nhök Kuɔth ɛ jɛn nɛmɛ, banɛ luëëkɛ luɔ̱th. Kä luëëkɛ /cikɛ naath cuc.

⁴ Kɛ ɣöö gat mi bä kä Kuoth jɛn tiamɛ ɣɔw. Kä min tiamɛ ni ɣɔw, ɛ ŋa̱thdan.

⁵ Ɛŋa mi dee ɣɔw tiam a /ci mɔ a ram mi ŋääth jɛ ɛn ɣöö Yecu ɛ jɛn Gat Kuɔth?

Ruac nenä kɛ kui̱ Yecu Kritho

⁶ Ram ëë bä kɛ pi̱ la̱kdɛ kɛnɛ riɛm li̱ethdɛ ɛ jɛn Yecu Kritho. /Kenɛ ben kɛ pi̱ kärɔ̱, cɛ ben kɛ pi̱ kɛnɛ riɛm. Kä ɛ Yiëë lat nën ɔ, kɛ ɣöö Yiëë ɛ thuɔ̱k.

⁷ Kä te nëën da̱ŋ diɔ̱k ti̱ti̱ thi̱n

⁸ Yiëë, kɛnɛ pi̱, kɛ riɛm, kä kɛn diɔ̱k ti̱ti̱ cikɛ mat kɛɛl.

⁹ Kä mi nhɔk kɔn nën nath, kä di̱t ni nën in lat Kuoth ɛ, kɛ ɣöö ɛ nën Kuɔth in cɛ lat kɛ kui̱ Gatdɛ.

¹⁰ Kɛ ɣöö nɛy tin ŋa̱thkɛ Gat Kuɔth tekɛ kɛ nën rɛydiɛn. Kä nɛy tin /ci Kuoth ŋäth, jakä ni jɛ kä gua̱n kacä, kɛ ɣöö /cikɛ nën in ci Kuoth ɛ lar kɛ kui̱ Gatdɛ ŋäth.

¹¹ Kä nɛmɛ ɛ jɛn nën. Ɛ ɣöö ci Kuoth kɔn ka̱m tëk mi do̱raar, kä tëk ɛmɛ tëë rɛy Gatdɛ.

¹² Ram mi tekɛ Gat Kuɔth tëëkɛ tëk ɛmɛ. Kä ram mi /ci tekɛ Gat Kuɔth, thilɛ jɛ tëk ɛmɛ.

Tëk mi do̱raar

¹³ Ɣän gɔ̱a̱rä mɛmɛ yɛ, yɛn nɛy tin ŋa̱thkɛ ciöt Gatdä Kuɔth, kɛ ɣöö dërɛ jɛ ŋa̱c ɛn ɣöö ta̱yɛ kɛ tëk mi do̱raar.

¹⁴ Kä min la liakdan kä jɛ ɛ jɛn mɛmɛ, ɛ ɣöö mi thiec kɔn ɛ kɛ ŋɔak ti luɔtkɛ rɔ kɛ ruacdɛ la liŋɛ kɔn.

¹⁵ Kä mi ŋa̱cnɛ jɛ ɛn ɣöö liŋɛ kɔn kɛ ti diaal tin thiëcnɛ kä jɛ, la ŋa̱cnɛ jɛ ɛn ɣöö canɛ tin ca thiec kä jɛ jek.

¹⁶ Mi ci raan däman nɛn a lätdɛ duer, mi /ci jɛ bi dhiɛl li̱th, thiec Kuoth kä bi Kuoth ram ɛmɛ moc tëk, ruacä kɛ kui̱ nɛɛni ti /ci dueriɛn kɛ bi giɛk li̱th. Tëëkɛ duer mi gik raan li̱th. /Cä lar ni ɣöö bi raan pal kɛ kui̱ kä nɔmɔ.

¹⁷ La̱t nyuɔɔni ɛ duer, kä duundɛ ɣöö tëëkɛ duer mi /ci raan dee dhiɛl li̱th.

¹⁸ Ŋäc kɔn ɛ ɛn ɣöö nɛy tin ca di̱eth ɛ Kuoth /cikɛ duer lät, kä duundɛ ɣöö gaŋ Gat Kuoth kɛ, kä /ci gua̱n jiäkni kɛ gueer.

¹⁹ Ŋäc kɔnɛ ɛn ɣöö lapnɛ gaat Kuɔth kä te ɣɔw ɛmɛ kɛɛliw piny bumä gua̱n jiäkni.

²⁰ Kä ŋäc kɔn ɛ bä ɛn ɣöö ci Gat Kuɔth ben, kä cɛ kɔn ka̱m ŋäc ŋɔaani kɛ ɣöö dënɛ jɛ ŋa̱c jɛn ram in thuɔ̱k. Kä ta̱nɛ rɛydɛ jɛn min la thuɔ̱k, Gatdɛ ni Yecu Kritho. Kä ɛ jɛn Kuoth in thuɔ̱k, kä ɛ tëk in do̱raar.

²¹ Nyin tiɛtnikä, tiɛtdɛ rɔ̱ kä kuth guäyni diaal.