1 Jɔ̱ɔ̱n 3 - RUAC KUƆTH IN RƐL RƆ

Gaat Kuɔth

¹ Nɛ̈nɛ jɛ, ɛ nhök mi te i̱di ci Gua̱a̱r in te nhial ɛ nhɔk ni kɔn ɛ, a cɔalkɛ kɔn i̱ gaat Kuɔth. Kä kɛ kɛn gaatkɛ. Luɔt kä min kui̱c ɣɔw ɛ ni kɔn ɛ jɛn ɣöö kui̱ ɣɔw ɛ.

² Nhöökä, ɛn täämɛ lapnɛ gaat Kuɔth, kä ŋotdɛ /ken ta̱a̱ in bi tekɛ kɔn in jɔɔc. Kä min ŋa̱cnɛ ɛ ɣöö, mi wëë wä jɔɔc banɛ ce̱tkɛ jɛ, kɛ ɣöö banɛ jɛ nɛn kɛ ta̱a̱ in tekɛ jɛ.

³ Nɛy diaal tin ŋa̱thkɛ bendɛ, bikɛ rɔ̱ jakä wiɛc wiɛɛc ce̱tkɛ min jɛn ɛ wic wic.

⁴ Nɛy diaal tin la̱tkɛ dueer cikɛ duer kɛ to̱l ŋuɔ̱tni, kɛ ɣöö duer ɛ jɛn to̱l ŋuɔ̱tni.

⁵ Ŋäc yɛn ɛ ɛn ɣöö ci Yecu jɔɔc kɛ ɣöö bɛ dueer woc, kä rɛydɛ thilɛ duer.

⁶ Thilɛ ram mi cieŋ rɛydɛ mi dui̱r, kä thilɛ ram mi lät dui̱r, mi ci Yecu nɛn kiɛ cɛ jɛ ŋa̱c.

⁷ Nyin tiɛtnikä, a thil ram mi kaaŋ yɛ. Ram ɔ lät cuŋ ɔ jɛn ɛ gua̱n cuŋni, ce̱tkɛ min Yecu ɛ gua̱n cuŋni.

⁸ Ram mi lät dueer, ɛ gat gua̱n jiäkni, kɛ ɣöö gua̱n jiäkni lätdɛ duer ni tukä. Luɔt ëë jɔc kɛ Gat Kuɔth ɛ ɣöö bɛ lät gua̱n jiäkni däk.

⁹ Thilɛ ram mi ca di̱eth ɛ Kuoth mi lät duer, kɛ ɣöö te ciaŋ Kuɔth rɛydun, kä /cikɛ dee duer, kɛ ɣöö diëth kɛ kɛ ɛ Kuoth.

¹⁰ Dëë gaat Kuɔth kɛnɛ gaat gua̱n jiäkni ŋic kɛ nɛmɛ. Nɛy diaal tin /ci lät ni cuŋ, /cikɛ nɛɛ Kuɔth, amäni nɛy tin /ca dämani nhɔk.

Nhɔakɛ rɔ̱

¹¹ Kɛ ɣöö nɛmɛ ɛ jɛn ruac ëë ci yɛn ɛ liŋ ni tukä, ɛn ɣöö banɛ rɔ̱ nhɔk.

¹² Kä /canɛ bi ce̱tkɛ Këën ëë la raan gua̱n jiäkni, kä cuɛ däman näk. Kä ɛŋu näkɛ jɛ mɔ? Ɛ ɣöö jiäk lätkɛ kä gɔw lät däman.

¹³ /Cuarɛ ga̱a̱c dämaari, kɛ ɣöö nyir ɣɔw yɛ.

¹⁴ Ŋa̱cnɛ jɛ ɛn ɣöö canɛ jiɛɛn li̱th, kä canɛ ben teekä, kɛ ɣöö nhɔaknɛ rɔ̱. Jɛn mi /ci naath nhɔk, ŋotdɛ li̱th.

¹⁵ Ram mi nyir däman jɛn ɛ luuc nath, kä ŋäc yɛn ɛ ɛn ɣöö thilɛ luɔ̱ɔ̱c nath ti te rɛydiɛn kɛ tëk mi do̱raar.

¹⁶ Ŋa̱cnɛ nhök kɛ nɛmɛ, kɛ ɣöö ci Yecu tëkdɛ thöp kɛ kui̱dan, kä banɛ tëkdan lɛ thöp kɛ kui̱ dämanikɔn.

¹⁷ Kä dee nhök Kuɔth te rɛy ran i̱di mi te raan kɛ ŋɔak wi̱i̱ muɔ̱ɔ̱n ɛmɛ, kä nɛɛnɛ gaatman görkɛ duɔ̱ɔ̱r, kä lo̱kɛ ɣöö bɛ kɛ moc?

¹⁸ Nyin tiɛtnikä, /cuanɛ naath nhɔk kɛ nhök lɛc kiɛ ruac baaŋ, nhɔaknɛ rɔ kɛ lät kɛnɛ thuɔ̱k.

¹⁹ Kä kɛ nɛmɛ banɛ jɛ ŋa̱c ɛn ɣöö lapnɛ ji̱ thuɔ̱ɔ̱kni kä banɛ lo̱ckɔn lɛni jakä bum nhiamdɛ,

²⁰ gua̱thni diaal tin ci lo̱ckɔn kɔn moc kɛ duer ɔ. Kɛ ɣöö di̱t ni Kuoth kä lo̱ckɔn, kä ŋäcɛ ti diaal.

²¹ Nhöökä, mi /ken lo̱ckɔn kɔn moc duer, liaknɛ rɔ̱ nhiam Kuɔth.

²² Kä canɛ min canɛ thiec kä jɛ jek, kɛ ɣöö luɔ̱thnɛ luëëkɛ, kä la̱tnɛ ni min jak lɔcdɛ kä tɛth.

²³ Kä nɛmɛ ɛ jɛn luekdɛ, kɛ ɣöö banɛ ciöt Gatdɛ ni Yecu Kritho ŋäth, kä banɛ rɔ nhɔk, ce̱tkɛ min cɛ la̱r kɔn.

²⁴ Nɛy diaal ti luɔ̱thkɛ luëëkɛ cieŋkɛ rɛydɛ, kä cieŋɛ rɛydiɛn. Ŋäc kɔn ɛ ɛn ɣöö cieŋɛ rɛydan kɛ nɔmɔ, kɛ Yiëë in cɛ ka̱m kɔn.