Hebrews 1 - Nukumanu

Jisas ko te maihu TeAtua

¹ I mua roo tammaki na vahao ia ma na ara TeAtua ni tattara ake na profet raa ki tattara ake na tipuna taatou raa,

² e meia i roto na aho nei, TeAtua ku tattara mai taatou i na mahi te Tamariki Aia raa; te Tama Aia ni hirihiri ki ttino na mee hakatoa i te hakaotioti, ia te Tama hoki TeAtua ni pena iho na mee hakatoa i roto te maarama nei.

³ Tama raa e hakamahina mai na mahi hai mmahi TeAtua, tena Aia Hokoia e tipu roo pera ma TeAtua, tena Aia e pena te maarama nei hakaatoa ma na mahi na tattara Aia. Aia e ssoro na hai sara te maarama nei raa no oti, tena Aia ku noho i te vahi laaua TeAtua te Tama na Mahi Hai mmahi raa.

Na mahi te Tamariki TeAtua

⁴ Te Tamariki TeAtua raa e hakanaaniu i aruna na ensel, e ssau pera ma te inoa TeAtua e kou ake Aia raa e hakanaaniu i aruna na inoa na ensel raa hoki.

⁵ Maitaname TeAtua se hai vahao ni meake he ensel ma, “Akoe he Tamariki Anau; te aho nei Anau ku mee mo Tamana akoe.” Ia TeAtua hoki ni se hai tattara e tattara ake he ensel ma, “Anau ku mee mo Tamana tama raa, tena tama raa ku mee mo tama Anau.”

⁶ Emeia te saaita TeAtua ku mee ki kauna ria iho te Tamariki Aia raa ki hamai i te maarama nei, Aia e meake ma: “Kootou na ensel Anau raa hakaatoa ki lotu ake Tama raa.”

⁷ Emeia i te vahi na ensel raa, TeAtua e tattara ake ma, “Anau e mee na ensel Anau raa ki ssau pera ma ni matani, tena ki mee na tama hehekau Anau raa ki ssau pera ma ni ahi.”

⁸ Ia i te vahi te Tamariki Aia raa, TeAtua e tattara ma, “Te Hakamaatua ana Akoe raa e me ki moe tahi se isi te hakaoti! Na mahi Akoe raa e kou mai te tauareka i na tama hakaatoa.

⁹ Akoe e hihai koi na tiputipu e ttonu, tena ki se hihai na mee e ssara. Tera hea Anau, TeAtua Akoe raa ni hirihiri Akoe, tena ki kou atu Akoe te hihia e rahi e raka ma te hihia na soa Akoe raa hakaatoa.”

¹⁰ TeAtua e tattara hoki ma, “TeAriki, Akoe e pena iho te maarama nei i te kaamata roo, tena ki pena te vaelani raa ma na rima roo Akoe.

¹¹ Na mee roo hakaatoa e me ki seai, e meia Akoe e me ki noho tahi roo, na mee raa e me ki oo no se mmau pera ma ni paamaro.

¹² Akoe e me ki hatuhatu na mee raa pera ma ni kaukahu, ia na mee raa e me ki ssau pera ma na hekau. Emeia Akoe e me ki tipu koi peenaa na vahao hakaatoa, tena te ora Akoe raa se lavaa te isi te hakaoti.”

¹³ TeAtua se hai vahao ni meake he ensel ma: “Noho i te vahi laaua Anau nei ki tae roo te saaita Anau e tuku na tama e kiri lloto akoe raa i raro na tapuvae akoe raa pera ma he tuai.”

¹⁴ Kaa na ensel raa niaa? Na ensel raa ni anana tera e hehekau ma TeAtua. Tena TeAtua e kauna na tama raa ki oo no tokonaki na tama e me ki too te ora e ora tahi raa.