Ababbebbulaniya 1 - Endagaano Epyaha mu Lunyole

Hatonda aloma nʼabita mu Mwana wuwe

¹ Halehale Hatonda galomanga nʼabasehulu beefe emirundi mingi nomu ngeri nyingi nʼabita mu banaabbi.

² Aye mu ndaalo jino ejʼoluvanyuma, Hatonda aloma ni neefe nʼabita mu Mwana wuwe oyu gataŋo ohuba omusika wa hiisi hiitu era omwene oyo njʼoyu gabitamo ohutonda ehyalo.

³ Mu mwana wuwe oyo, njomu eŋono nʼehifaananyi hya Hatonda bibonehera era niye njʼaŋengerera ehyalo hyosihyosi nʼatambisa amaani gehibono hihye. Ni gahena ohuhola ehyo ehi Hatonda gemaho ohusoniŋa abaatu ebibi, gatiina gehala mwigulu hu lubega lwʼomuhono omulungi ogwa Hatonda omwene buŋangi.

Yesu ahira abamalayika eŋono

⁴ Hatonda gaŋa Omwana wuwe eŋono erihira eryʼabamalayika ko nʼesiina erihira agaawe.

⁵ Ale njʼani hu bamalayika oyu Hatonda gaaloma ati, “Oli Mwana wange, olwa leero kusaaye?” Oba ati, “Nja huba Semwana, yeesi aja huba Mwana wange?”

⁶ Era Hatonda ni gaali nʼanatere ohutuma Omwana wuwe omudaayi hu hyalo, gaaloma ati, “Abamalayika ba Hatonda bosibosi bamujumiryenga.”

⁷ Eyiri abamalayika, Ebyaŋandihiwa biroma biiti, “Hatonda afuula abamalayika ohuba hyʼembeŋo, nʼabaŋeeresa babe ohuba hyʼendimi jʼomuliro.”

⁸ Aye hu Mwana wuwe biroma biiti, “O Hatonda, oja huŋuga emirembe nʼemirembe. Era oja huŋuga abaatu babo nʼotehubbira,

⁹ Wenda abo abahola ebyolereeye era ocaawa abaatu ohuhola ebibi. Olwʼehyo, Hatonda wuwo ahutobooye mu bahyo era gahuta mu hifo ehyʼeŋono, ehiitu ehija huhuŋweramo esangaalo ohuhiraho abahyo.”

¹⁰ Era aloma ati, “Ewe Musengwa, mu hutagiha watonda ehyalo era nʼegulu ndiiwe owalihola.

¹¹ Egulu nʼehyalo biriŋwaŋo aye ewe olibaaŋo emirembe nʼemirembe. Byosibyosi birihayiriŋa hyʼolugoye,

¹² olibifumbaaho hyʼolugoye era biricucuha hyʼehyambalo. Aye ewe osigala cʼehyene, era olibaaŋo emirembe nʼemirembe.”

¹³ Njʼani hu bamalayika oyu Hatonda gaaloma ati, “Yiihala hu lubega olwʼomuhono gwange omulungi, ohwola olu ndifuula abasigu babo ekookolo eyʼohutaho amagulu gago?”

¹⁴ Abamalayika bosibosi sinje emyoyo ejiŋeeresa Hatonda era eji atuma ohuyeeda abo abalinoŋola?