Ezabbuli 97 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Musengwa aŋuga, leha ehyalo hisaŋalye, leha ebizinga byosibyosi bisangaale.

² Ebireri nʼehiirema ehiŋambire oti ngu bimweswanigirihiise, obuŋugi buwe wijuuye obuluŋamu nʼohutehubbira.

³ Omuliro guŋwera aŋa ali, gwohya abalabe babe abamweswanigirihiise.

⁴ Ahubba ehimyaso hu hyalo, abaatu babona bateetema.

⁵ Esozi jisanuuha hyʼamasavu mu moni ja Musengwa mu moni ja Musengwa wʼehyalo hyosihyosi.

⁶ Ebitonde ebiri mwigulu biraga biiti Musengwa ahola ebiruŋamu era hiisi muutu abona eŋono lirye.

⁷ Aswasa hiisi muutu ajumirya ebibbote abaswasa era abahatonda bosibosi bahubbira Musengwa amafuha.

⁸ O Musengwa, abaatu bomu Sayuuni basangaala nʼabomu bibuga bya Yuda basaŋalya olwʼohuŋulira emisango eji olamula.

⁹ O Musengwa, ndiiwe Ali Ŋamugulu Obugali era oŋuga ehyalo hyosihyosi, ohirira ŋale abahatonda bosibosi.

¹⁰ Enywe omwenda Musengwa, mucaawe ehibi. Ahuuma abaatu babe era gabanunula ohuŋwa mu maani gʼababi.

¹¹ Enjase yaduhira abahola ebiruŋamu nʼesangaalo liba nʼabemyoyo emigwalaafu.

¹² Enywe abagwalaafu mwesimwesi musangaale olwʼebyo ebi Musengwa ahola. Mumweyaase olwʼowawufu wuwe.