Ezabbuli 95 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Muuje hwembere Musengwa nʼesangaalo, leha huhayaanire ŋamugulu ni hwembera Hatonda olwanda atunoŋola.

² Leha hutiine mu moni jije nʼohweyaasa, humwembere nʼesangaalo ni humujumirya.

³ Musengwa nje Hatonda owʼamaani, habaha owʼamaani ahira abahatonda bosibosi.

⁴ Ehyalo hyosihyosi hiri mu mihono jije, nʼowegingihiriri wʼesozi woosi wuwe.

⁵ Enyanja jije olwohuba njʼowajitonda, era emihono jije nje jahola eroba.

⁶ Muuje huhubbe amafuha ni humujumirya, leha huhome ekumbo mu moni ja Musengwa owatutonda,

⁷ olwohuba nje Hatonda weefe era efe huli baatu babe, etaama jije eji alabirira. Olwaleero ni muŋulira ejanjaasi lirye,

⁸ mutahahanyasa myoyo jenywe hyʼabasehulu benywe olu baahola e Meribba, ngʼolu bahola hu ludaalo olu baali e Maasa mu lulafu

⁹ eyi basehulu benywe baakema wayire baabona ebinahola.

¹⁰ Cʼehyagira naluŋira abaatu abo emyaha amahumi ane era nʼaloma ti, “Emyoyo jaawe jiŋaba era sibaŋamba biragiro byange.

¹¹ Cʼehyagira naluŋa nalayira ti, ‘Sibalyola mu hifo omu naali nʼohubaŋeramo ehiŋuumulo hyange.’ ”