Ezabbuli 91 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Hiisi amenya mu hisisira hyʼoyo Ali Ŋamugulu Obugali, asuna obuhuumi wʼOmwene Buŋangi.

² Era nalomenga ti, “Musengwa ndiiwe olwanda lwange era omuhuumi wange, oli Hatonda wange oyu nesiga,”

³ Era mu butuufu aja huhuŋonianga emitego jʼabalabe era ahuŋonie ni haŋupuli.

⁴ Anahuwihenga namabaŋa gage, wasunira omwo obuŋonere. Era owesigwa wuwe bunaabenga ngabo yiyo.

⁵ Sonatyenga hiitu hyosihyosi owiire, oba obusaale obu balahiise mu muusi

⁶ oba ohutya haŋupuli agwaŋo mu njirema, oba namusisa abaluhaŋo mu muusi.

⁷ Abaatu ekumi nʼekumi balifiira aŋo nʼobona, aye ewe ŋaŋuma ehiri hwolaho kadi.

⁸ Olibona nʼemoni jijo omubi nʼasuna ehibonerezo.

⁹ Musengwa njʼohugadirira, era Ali Ŋamugulu Obugali njʼomuhuumi wuwo.

¹⁰ Era ŋaŋuma higosi hyosihyosi ehija huhwolaho, ŋaŋuma ehija hwola hu mago gago.

¹¹ Hiri hiityo olwohuba Hatonda aliragira abamalayika babe bahuyeeda.

¹² Era balihubbaha ndiwegumula hu mabaale huhulumya magulu.

¹³ Oja hutyakirira epologoma nʼekolokima oja hwema hu pologoma ekambwe nohu gusota.

¹⁴ Musengwa aloma ati, “Nja huŋonia abo abanyenda. Era nja huhuuma abo abaamanyire.

¹⁵ Anaabenga nʼebigosi gandanga, nja humugobolangamo era mbe ŋalala ni naye muhuume era muŋe eŋono.

¹⁶ Nja humuleetera ohuŋangala era munoŋole.”