Ezabbuli 89 - Endagaano Epyaha ko n'ebitabo ebindi eby'Endagaano Ekayire mu Lunyole

Masikili ya Esani Omuzirahiti.

¹ Nja hwemba hu hwenda hwa Musengwa ohubitiirifu emirembe nʼemirembe. Nja huloma hu wesigwa wuwe eyiri abaatu emirembe josijosi.

² Nja hulangirira ebiŋamba hu hwenda huhwo ohwʼemirembe nʼemirembe, owesigwa wuwo sibuŋwaŋo hyʼegulu.

³ Waloma oti, “Nahola endagaano nʼomutobole wange. Nalayirira Dawudi omuŋeeresa wange ti,

⁴ ‘Mu lulyo lulwo muja hubaamo omuŋugi nga habaha emirembe nʼemirembe.’ ”

⁵ Musengwa egulu lihutendereza olwʼebyamaliholiho bibyo era leha abamalayika bahutendereze olwʼowesigwa wuwo.

⁶ Njʼani ali mwigulu owegerageraniaho hu Musengwa? Hu abo abali mwigulu njʼani ali hya Musengwa?

⁷ Hatonda bamutya mu luhiiho lwʼabawufu, atiisa ohuhira bosibosi abamweswanigirihiise.

⁸ O Musengwa Hatonda Omwene Maŋe, O Musengwa, njʼani ali hyʼewe! Era oli mwesigwa mu biitu byosibyosi.

⁹ Oŋuga obusungu wʼenyanja, obunjeesa amayengo agatumbera.

¹⁰ Wabbwagabbwaga Rahabbu, wasalaania abalabe babo nʼobuŋangi wuwo owʼamaani.

¹¹ Egulu nʼehyalo bibyo, nʼebibirimo byosibyosi bibyo olwohuba ndiiwe owabihola.

¹² Watonda amaniino nʼamehiriro, esozi Tabbori ni Herumooni jihwembera nʼesangaalo.

¹³ Oli nʼobuŋangi, amaani gago gaŋamugulu era omuhono gugwo gwʼamaani mangi.

¹⁴ Obuluŋamu nʼohutehubbira njʼomusingi gwʼobuŋugi wuwo, ohwenda nʼowesigwa njʼebi oholeraho.

¹⁵ O Musengwa, besiimire abo abahujumirya, abamenya mu njase eyʼehyere hihyo.

¹⁶ Basangaala oludaalo lwosirwosi era bahujumirya olwʼobulaŋi wuwo

¹⁷ olwohuba ndiiwe ogima baba nʼeŋono nʼamaani era otuŋa obuŋangusi olwʼehisa hihyo.

¹⁸ Mu butuufu Musengwa njʼengabo yeefe era Omwawufu wa Yisirayiri gaatuŋa habaha weefe.

¹⁹ Mu biseera ebyahale waloma abaatu babo abesigwa mu hwolesewa oti, “Paaye omusooli amaani, nenyosa omuvubuka oyu natobola namuŋa etebe eyʼobuŋugi.”

²⁰ Paaye Dawudi omuŋeeresa wange owahabaha era mujuhireeho amafuta amawufu.

²¹ Nabenga ni naye era mu butuufu nja humuŋa amaani.

²² Abalabe babe sibaja humuŋangula ŋaŋuma muhosi wʼebibi aja humunyigirisa.

²³ Nja husihiirisa abalabe babe nʼabona abo abamucaawa baja hufa.

²⁴ Nja humwenda era mbe mwesigwa eyi ali, era nʼabita mu ese aja huba wʼamaani.

²⁵ Nja hugalamya owahabaha wuwe ohuŋwa hu nyanja Meditereniani ohwolera erala hu lwabi Yufuleeti.

²⁶ Aja huloma ati, “Ndiiwe Bbaabba Hatonda wange, olwanda lwange era omunoŋosi wange.”

²⁷ Nja humufuula mwana wange omudaayi ahira abahabaha bosibosi hu hyalo.

²⁸ Nja humwenda emirembe nʼemirembe era endagaano yange ni naye yʼemirembe nʼemirembe.

²⁹ Mu lulyo lulwe muja huŋwamo habaha aja huŋuga emirembe nʼemirembe era etebe yiye eyʼobuŋugi yija hweyongera ohubaaŋo hyʼegulu.

³⁰ “Singa abejuhulu babe babbwaga amagambi gange era bagaana ohugondera ebiragiro byange,

³¹ singa banyooma ebiragiro byange, amagambi gange gabahaya ohuhuuma,

³² nja hubahangavula olwʼebibi byawe, nja hubabonyaabonya olwʼobujeemu waawe

³³ aye sinja huleheraŋo hubenda era nja husigala ni ndi mwesigwa eyi bali.

³⁴ Sinja hubbwaga ndagaano yange oba ohucuusamo ehi nasuubisa.

³⁵ Mu wawufu wange nalayira nahena era sinja hudulinga Dawudi.

³⁶ Mu lulyo lulwe muja huŋwamo habaha owʼemirembe nʼemirembe era owahabaha wuwe bulibereraŋo hyʼeryuba.

³⁷ Obuŋugi wuwe buja hubaaŋo hyʼomwesi hwigulu, obujulizi owʼamazima hwigulu.”

³⁸ Aye oluŋiiye habaha wuwo oyu watobola era omuhubbire omugongo.

³⁹ Obbwagire endagaano yiyo eyi waahola nʼomuŋeeresa wuwo era engule yiye oyidanyire mu fuuhe.

⁴⁰ Olukomera olwʼehiteepe hihye ehyʼehibuga olubbwagire, walufuula gunda era watangajula ebibagadirira.

⁴¹ Ababitaŋo bosibosi beeba ebibye era nʼabaliranwa babe bamujeherera.

⁴² Abalabe babe obaŋaaye obuŋangusi era obaŋaaye esangaalo.

⁴³ Ebisoosa bibye sibihiiri byamugaso era omulehire bamuŋangula.

⁴⁴ Omutuhiseeho eŋono, odanyire etebe yiye eyʼobuŋugi ŋaasi.

⁴⁵ Omuhayiriŋihiisye nʼahiiri muŋere era omuswahiise. Era omuhubbire esoni.

⁴⁶ O Musengwa, olihyosa ŋeena ohutwehweha emirembe nʼemirembe? Onahoseŋe ohuba nʼehiruŋi ehyohya hyʼomuliro?

⁴⁷ Hebulira oti obulamu wange wʼehiseera buseera. Hebulira oti watutonda baatu buutu hwesihwesi.

⁴⁸ Njʼani atalifa oba genoŋola ohutatiina emagombe?

⁴⁹ O Musengwa, ohwenda huhwo ohwahale ohubitiirifu, ohuwasuubisa Dawudi mu wesigwa wuwo huli ŋeena?

⁵⁰ Musengwa, hebulira ngʼolu baduuye omuŋeeresa wuwo, ngʼolu ngumiiye ebiduho byʼabaatu bangi.

⁵¹ O Musengwa, abalabe babo baduha oyu wajuhaho amafuta, bamuduha hiisi aŋa aja.

⁵² O Musengwa, aŋeewe eŋono emirembe nʼemirembe! Amiina era Amiina.