Ezabbuli 85 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli yʼabaatu bomu lulyo lwa Koora.

¹ O Musengwa, waaŋa ehyalo hihyo ekabi era oleeteeye abejuhulu ba Yakobbo ohuba bulaŋi.

² Wasoniŋa ohubbenga hwʼabaatu babo era wabatusaho ebibi byawe byosibyosi.

³ Walehera aŋo ohutuluŋira nʼohuba nʼobusungu bungi eyi huli.

⁴ O Hatonda Omunoŋosi weefe, tugobose bunyaaha era olehere aŋo ohutuluŋira.

⁵ Oja hutuluŋira emirembe nʼemirembe? Oja hweyongera ohuba nʼobusungu?

⁶ Sooja hutugobosa bunyaaha nindi, abaatu babo basangaale hu lwʼewe?

⁷ O Musengwa, tulage ohwenda huhwo ohubitiirifu era otunoŋole.

⁸ Nja huŋuliirisa ehi Hatonda Musengwa aja huloma, olwohuba asuubisa abaatu abagwalaafu babe emiyaaya ohutusaho batagobolayo mu buŋubeebe waawe.

⁹ Mu butuufu oweene ali ŋaapi ohunoŋola abo abamutya ko eŋono lirye lihwane ehyalo hyefe.

¹⁰ Ohwenda nʼowesigwa byeŋimbire era obuluŋamu nʼemiyaaya bigwijana mu hifuba.

¹¹ Owesigwa buŋwera mu hyalo hino obuluŋamu busiziira mwigulu nga wiiha ŋaasi hu hyalo.

¹² Musengwa aja hutuŋa ebiraŋi era ehyalo hyefe hija hwama ebibala bingi bugali.

¹³ Obuluŋamu bumutangiriramo era wamweyulira engira omu abita.