Ezabbuli 73 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Asafu.

¹ Mu butuufu Hatonda mulaŋi eyiri Yisirayiri, eyiri abo abagwalaafu mu myoyo.

² Aye naali huupi huterera, naali mbuliraho hatono ohugwa

³ olwohuba esaalwa yapamba ni mbona abaatu abepaahapaaha, ni nabona ebiitu ni bitiinira bulaŋi abahosi bʼebibi.

⁴ Baŋuma bigosi emibiri jaawe jibulaamo bulwaye era bali nʼamaani gaawe.

⁵ Sibabonaabona hyʼabaatu abandi obulwaye sibubajoogajooga ngʼolu bujooga abandi.

⁶ Ohwepaahapaaha njʼebihomo ebi bambala mu mamiro era emivuyo njʼehyambalo hyawe.

⁷ Emyoyo jaawe jijuuye bibi byereere, ebiŋeego byawe bibererera hutegeha embi.

⁸ Bajeherera era balimirira abandi, bepaahapaaha era bategeha hunyigirisa abahyawe.

⁹ Baloma wubi hu Hatonda mwigulu banyooma nʼabaatu babe hu hyalo.

¹⁰ Cʼehigira nʼabaatu bacuuha baaba hya nibo, bafugiirira ebi baloma.

¹¹ Baloma baati, “Hatonda saaja humanya. Oyo Ali Ŋamugulu Obugali sasobola humanya.”

¹² Abahosi bʼebibi baatyo polu baba obulamu wubabereeye bulaŋi era bebbiryaho obuŋinda.

¹³ Mu butuufu sihyamahulu ohuhuuma omwoyo gwange ni guli mugwalaafu, hyawereere ohwehuuma ni tabbenga.

¹⁴ Mbonaabona oludaalo lwosirwosi hiisi mugamba bamboneresa.

¹⁵ Singa naloma ti, “Nja hwebisya hya nibo,” sinahabaaye wʼamazima eyiri abaatu babo.

¹⁶ Nagesyaho ohutegeera aye hyali higosi.

¹⁷ Ohwola olu natiina mu hifo hya Hatonda ehigwalaafu nga ko tegeera ekomerero yaawe.

¹⁸ Hituufu obata aŋali obuterere bagwe basihiirihe.

¹⁹ Sibalwa husihiiriha, baja husihiirihira erala.

²⁰ O Musengwa nʼolinyoha, baja husihiiriha, babanyoome hyʼehirooto ehiŋumamo ehi muutu gebirira ni buhyeye.

²¹ Obusungu wapamba omwoyo gwanduma.

²² Mu moni jijo naali muŋubeebe hyʼesolo ni tahutegeera.

²³ Aye hiisi ludaalo ndi ŋalala ni neewe era oŋambiriiye omuhono gwange omulungi.

²⁴ Wutangirira ni wundabbira oluvanyuma oja hu nyanirisa ohwingira mu ŋono.

²⁵ Puma wundi yesiyesi mwigulu ohutusaho ewe, era hu hyalo puma ehinenda ehindi ohutusaho ewe.

²⁶ Ebiŋeego nʼomubiri gwange binafu aye Hatonda wange njʼamaani gange njʼeyi netaaga emirembe nʼemirembe.

²⁷ Abahweŋalama balisihiiriha osihiirisa abatali besigwa.

²⁸ Aye hiraŋi ese ohuba ŋaapi ni Hatonda, Musengwa Omwene Buŋangi njʼomuneŋogoma, nja huloma hu bikolwa bibyo byosibyosi.