Ezabbuli 71 - Endagaano Epyaha ko n'ebitabo ebindi eby'Endagaano Ekayire mu Lunyole

¹ O Musengwa, ndiiwe omuneŋogoma otandeha huswala.

² Ohola ebiruŋamu nunule, tegere ohutwi yanguŋaho wununule ba pungulu yange omunehweha, ofuuhe ebaale eringadirira.

³ Ba lwanda lwange omuneŋogoma ehifo omundulumira ohusuna obuhuumi. Lagira ohunoŋola. Ndiiwe olwanda lwange era ehifo hyange omunehweha.

⁴ O Hatonda wange, nunule ohuŋwa mu bahosi bʼebibi era wuponie amaani gʼehibi abaatu abehubbira era abahambwe.

⁵ O Musengwa Omwene Buŋangi, esuubi lyange liri mu ndiiwe era kwesigire ohuŋwa buvubuka wange.

⁶ Obaaye ni nange ehiseera hyosihyosi ehyʼobulamu wange wukumire ohuŋwa olu naŋwa mu hida hya maama era nja huhujumiryanga hiisi hiseera.

⁷ Obulamu wange hyahuboneraho eyiri abaatu bangi olwohuba ndiiwe ehifo ehyʼamaani omuneŋogoma.

⁸ Cʼehifa kutendereza oludaalo lwosirwosi ni ndangirira ebiŋamba hu eŋono liryo.

⁹ Olwʼehyo otanetusaho olwohuba ŋahani ndi musahulu, otandehulira olwʼohubona ti ŋahani gapooye.

¹⁰ Abalabe bange bateesa ohunjita behobana ohukenaŋo.

¹¹ Era baloma baati, “Hatonda gamuhubba omugongo hutiine humuŋambe olwohuba ŋaŋuma owʼohumununula.”

¹² O Hatonda, otamba ŋaleeŋi. O Hatonda wange, nja mangu wunjeede.

¹³ Leha abo abapaŋabira baswale era obasihiirise leha abo abenda ohukosa baswale.

¹⁴ Aye ese habuhyabuhya esuubi lyange linabenga mu ndiiwe nja hweyongera ohuhujumiryanga.

¹⁵ Nasiibenga ni ndomera abaatu hu biŋamba hu biruŋamu ebi ohola ebiŋamba hu bunoŋosi wuwo, wayire nga simanyire bungi wabyo.

¹⁶ O Musengwa Omwene Buŋangi nahujumiryenga olwʼebyamaani ebi ohola era nja hulangirira obuluŋamu wuwo, owuwo woŋene.

¹⁷ O Hatonda, ohuŋwa mu buvubuka wange wusomehiise era nʼohwola hatyane ndomera abaatu hu biŋamba hu byeŋunjisa ebi ohola.

¹⁸ O Hatonda, kusunga atandehulira mu busahulu buno otakubba mugongo ohwola olu ndiromera abʼomulembe oguuja ebiŋamba hu maani gago hu maani gago eyiri abo aba baja husaala.

¹⁹ O Hatonda, obuluŋamu wuwo woola nohwigulu oholire ebyeŋunjisa bingi O Hatonda, njʼani ali hyʼewe?

²⁰ Wayire wundehire nabonaabona nʼebigosi bingi era ebyʼamaani oja hungobosa bunyaaha oja hundamusa ohuŋwa e magombe.

²¹ Oja hufuula ohuba owʼeŋono eryʼamaani era wambudabuda nindi.

²² O Hatonda wange, nja huhujumirya ni kubba ogutongooli olwohuba oli mwesigwa nja huhujumirya ni kubba ahatongooli olwohuba ndiiwe Omwawufu wa Yisirayiri.

²³ Nja hwembera ŋamugulu olwʼesangaalo ni kwembera etendo ese oyu wanunula.

²⁴ Oludaalo lwosirwosi nja huloma hu biŋamba hu biruŋamu ebi ohola olwohuba abo abenda ohuukosa obaswahise era obatabujuuye.