Ezabbuli 69 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ohwemba ni batiinira hu janjaasi “Ebimuli.” Ezabbuli ya Dawudi.

¹ O Hatonda, noŋole amaaji ganjolire mu mamiro!

² Neyiniha mu luteete, ŋaŋuma eroba egumu aŋa panga ohwemeerera era amataba genda huumira.

³ Ndembire ohulira ni nenda obuyeedi noomire ŋa mamiro era nʼemoni jange sijihibona bulaŋi olwʼohulira ni nendula Hatonda wange.

⁴ Abo abacaawa aŋaŋuma songa yosiyosi bangi bugali bahiraaho nʼobungi wʼefiiri hu mutwe gwange. Ndi nʼabalabe bangi aŋaŋuma songa abo abenda ohunjita era baapagia ohuliŋa ebi teeba.

⁵ O Hatonda, omanyire ebibi byange ŋaŋuma hibi hyange ehi otamanyire.

⁶ O Musengwa Omwene Maŋe, otaleha abo abahwesiga ohuswala olwʼese, otaleha abo abahwendula ohuswala olwʼese O Hatonda wa Yisirayiri.

⁷ Nehalirihire ebiduho hu lulwo era nejuuye soni njereere.

⁸ Ndi hyʼomulugendwa eyiri abaganda bange era ndi hyʼomugwira eyiri abaana ba maama.

⁹ Hiri hiityo olwohuba ohwenda ohunendamo enyumba yiyo hulinjitisa era ebi baatu baloma ni bahuduha bigobola hu ndiise.

¹⁰ Ni ndira era nasiiba ndi nʼohugumira ebiduho.

¹¹ Banjeherera ni nambala ehigwali ohulaga ti enaku yipambire.

¹² Abo abeehala hu mulyango banjerega era nafuuha lwembo lwʼabameesi.

¹³ Aye Musengwa, kusunga wungobolemo mu hiseera hihyo ehiragaane era Hatonda mu hwenda huhwo ohubitiirifu ngobolemo wununule ngʼolu wasuubisa.

¹⁴ Ponie, otandeha hweyiniha mu luteete nunule mu balabe bange njinunule mu maaji amangi.

¹⁵ Otaleha mataba huupira oba ohugwa mu njuho oba eroŋo ereeŋi ohuumira.

¹⁶ O Musengwa, gobolamo ohusaba hwange olwʼobulaŋi wʼohwenda huhwo ohubitiirifu nʼehisa ehyʼamaani, njeede.

¹⁷ Otehweha mwidu wuwo ndi mu bugosi owʼamaani kusunga bungobolemo mangumangu.

¹⁸ Sembera era wununule, noŋole ohuŋwa mu balabe bange.

¹⁹ Omanyire ngʼolu balabe bange banjooga, banduula era baaswasa, omanyire abalabe bange bosibosi.

²⁰ Banduhire era bakeniremo amaani ndi aŋo tyotyo. Naheja owohupambira ehisa aye ŋaaŋuma. Naheja owohungobosamo amaani aye ŋaŋuma wayire mulala.

²¹ Enjala ni yaali ni yinduma, baapa emere eyi batayemo enduse era enduŋo ni yaali ni yinduma, baapa omwenge gwʼemizabbibbu ogusalire.

²² Kale leha ebiiŋulo byawe bibafuuhire mutego, bibafuuhire hagumba wegoge, leha emiyaaya jaawe jibafuuhire lutuula.

²³ Leha emoni jaawe jiijeho olubooha batabona nʼohubona nʼemigongo jaawe jigodame emirembe nʼemirembe.

²⁴ Bajuheho ehiruŋi hihyo era balage obusungu wuwo.

²⁵ Leha ehibbwe hyembere mu gunda lirye, ŋaŋume amenyamo.

²⁶ Hiri hiityo olwohuba bahiyaania abo aba wahena hale ohuboneresa era baloma hu abo abali mu bulumi.

²⁷ Beguleho emisango nʼemisango otabasoniŋa kadi.

²⁸ Basangule mu hitabo ehyʼobulamu era otababalira ŋalala nʼabagwalaafu.

²⁹ Ndi mu bulumi nʼohubonaabona O Hatonda, nunule.

³⁰ Najumiryenga Hatonda nʼolwembo ni muŋa eŋono era ni mweyaasa.

³¹ Ehyo hija husangaasanga Musengwa ohuhiraho ohumuŋa esaame, ohuhiraho ebunwa eyʼameega.

³² Abagadi baja hubona basangaale enywe abendula Hatonda mugobolemo amaani.

³³ Musengwa aŋulira esaala jʼabali mu wetaavu era sigebirira baatu babe abali mu komera.

³⁴ Ebiitu ebiri mwigulu nohu hyalo, bimujumirye enyanja ko nʼebiramu byosibyosi ebirimo bimujumirye.

³⁵ Hiri hiityo olwohuba Hatonda alinoŋola Sayuuni era atongole bunyaaha ebibuga bya Yuda. Abaatu babe baja humenyamo.

³⁶ Abejuhulu babaŋeeresa babe balihisikira ni naabo abamwenda balimenyamo.