Ezabbuli 63 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Dawudi olu gaali mu lulafu mu Buyudaaya.

¹ O Hatonda, ndiiwe Hatonda wange, kwendula nʼomwoyo gwange. Nesunga bugali ohuba ni neewe ngʼolu muutu aŋemba hu maaji nʼali mu hyalo ehiŋumamo maaji.

² Kuweene mu hifo ehyawufu era mbwene ngʼolu oli nʼamaani nʼeŋono.

³ Ohwenda huhwo ohubitiirifu husingira obulamu era nja huhujumirya.

⁴ Ni kiiri mu bulamu buno nja huhwebasanga era nja hugololanga emihono jange ni saba.

⁵ Wunjigusa ohuhiraho emere endaŋi eyijuuye ebirungo, nja hwemba ni kujumirya nʼesangaalo.

⁶ Ni ndi hu hitanda hyange kuhebulira, era kuŋeegaho owiire wosiwosi.

⁷ Olwohuba oli muyeedi wange nembera ŋaasi wʼehisisigo hyʼamabaŋa gago.

⁸ Nediiye hu ndiiwe era omuhono gugo omulungi gunjeeda.

⁹ Abo abenda ohunjita balibasihiirisa, baja hutiina emagombe.

¹⁰ Balibeeta nʼepiima, balibadanyira embwa ejomwisugu.

¹¹ Aye habaha aja husangaala olwohuba Hatonda amuŋa obuŋangusi. Abo bosibosi abeyama mu siina lya Hatonda baja humujumirya aye abo abadulingi baliŋuma hya huloma.