Ezabbuli 62 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli ya Dawudi. Ohwembera hu janjaasi lya Yedusuuni.

¹ Nindirira Hatonda nʼobugumiikiriza ohunoŋola era niye yeŋene njʼoyu nesiga.

² Niye yeŋene njʼolwanda lwange era njʼobunoŋosi wange njʼobutaasa era sinja hutya.

³ Mulyosa ŋeena ohunumba, ese aŋuma ehi ndi era omunafu hyʼolukomera olwagwa ŋaasi?

⁴ Musala amagesi ohungwisa ŋaasi, mundomaho ebyʼobudulingi era mwefuula ohuba abanyendesa ehiraŋi aye mu myoyo jenywe jejuuye obucaayi.

⁵ Hatonda nje yeŋene owuupa emiyaaya era njʼesuubi lyange.

⁶ Hatonda yeŋene njʼolwanda lwange era omunoŋosi wange nja gakuuma olwʼehyo sinja hutya.

⁷ Obuŋangusi nʼeŋono lyange biŋwa eyiri Hatonda njʼomuhuumi wange owʼamaani njʼolwanda era omu neŋogoma.

⁸ Abaatu bange mwesige Hatonda ehiseera hyosihyosi humuŋambye emyoyo jeefe olwohuba njʼomuhweŋogoma.

⁹ Abaatu hwesihwesi huli muuya buuya, ŋaŋuma owʼamaani hu begingihiriri nʼabaŋaasi singa batupima hu mizaani huli muuya buuya.

¹⁰ Siwesigamanga hu biitu ebi osunire mu magira amabi oba ohwenyumirisanga mu biitu ebyʼowiibi era wayire obuŋinda buwo weyongera, sobutangaho mwoyo gugwo.

¹¹ Hatonda aloma lwatu era emirundi mingi kiŋuliiye ti Hatonda njʼomwene obuŋangi.

¹² Era ti Musengwa ohwenda huhwo sihuhoma. Mu butuufu oja huŋa hiisi muutu omuhemba ni weema hu bikolwa bibye.