Ezabbuli 55 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi owemba nʼebivuga ebyʼewaaya. Ezabbuli ya Dawudi.

¹ O Hatonda, ŋulira ohusaba hwange otagaana hwegayirira hwange.

² Ganya wupuliirise era wungobolemo, ebiŋeego bikenireemo.

³ Neŋendeherera olwʼebibono byʼabalabe bange. Banjohise hu bigosi era bandiho ehiruŋi ehyʼamaani.

⁴ Omwoyo gwange guhubbahubba era noleheeye ohufa.

⁵ Teetema olwʼobuti era mbula ngeri eyʼohuleheramo ohuteetema.

⁶ Naloma ti, “Singa naali nʼamabaŋa hyʼeŋuusi nahaguluhire natiina eyi tiina nesunira emiyaaya.

⁷ Nahaguluhire natiina ŋaleeŋi namenya eyo mu lulafu.

⁸ Nahanguŋire mangu nasuna aŋa neŋogoma naŋona hibuyaga owʼamaani nʼefula eyʼamabaale.”

⁹ O Musengwa, tabuujula tabuujula olulimi lwʼabahosi bʼebibi hiisi muutu atategeera ehi wahye aloma. Hiri hiityo olwohuba mbona abaatu mu hibuga bahola ebikolwa ebibi era begugunga.

¹⁰ Omuusi nʼowiire basiiba hugenda ni betoloola ehibuga, ni bahola emivuyo nʼebiitu ebyenyinyasa.

¹¹ Hiisi ŋaatu ŋaliŋo husihiiriha era mu nabiŋwera mwejuuye budulingi nʼohulyakula.

¹² Singa omulabe ganduula, nahamwehalirihire. Era singa omulabe ganjinyoheraho nahamwehwehire.

¹³ Aye omuutu oyo ndiiwe omuutu hyange oyu ndya ni naye mu swa ndala era meeri yange,

¹⁴ oyu naali nʼomuhumba ni naye ni hutiinanga huutyo mu nyumba ya Hatonda.

¹⁵ Leha ohufa hugwe hugwa hyʼomwibi hu balabe bange era amagombe gabamire balamu olwohuba ehibi himenyire mu bulamu waawe.

¹⁶ Aye ndanga Hatonda, era Musengwa ganoŋola.

¹⁷ Mu mugamba nomu muusi nʼegulo, neririgana enaku yange era gaŋulira ejanjaasi lyange.

¹⁸ Aja hungobosa miyaaya ohuŋwa mu lutalo wayire ndi nʼeduuli lyʼabalabe.

¹⁹ Hatonda aŋuga emirembe nʼemirembe era oja huŋangula abalabe bange olwohuba bageene ohucuusa ebikolwa byawe bahujumirye.

²⁰ Oyu ndya ni naye mu swa ndala alumba meriiwe gebirira endagaano eyi gahola.

²¹ Endoma yiye ndaŋi ohuhiraho omuzigo aye omwoyo gugwe gwijuuye talo njereere. Ebibono bibye bigonda hyʼamafuta agahaloosa ngʼolu gagondya omubiri aye bisala hyʼepiima.

²² Yanjuliranga Musengwa ebigosi bibyo aja huhuyeeda saaja huleha baŋangule abagwalaafu babe.

²³ Aye ewe Hatonda oja huŋindiha abahosi bʼebibi mwiroŋo ereeŋi basihiirihe, abatemu nʼabadulingi sibaja huŋesa nʼehitundu hyʼemyaha jaawe ejʼobuhulu aye ese nesiga ndiiwe.