Ezabbuli 49 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli yʼabaatu bomu lulyo lwa Koora.

¹ Hiisi muutu aŋulire hino abaatu mwesimwesi mu hyalo hino muŋuliirise,

² abegingihiriri nʼabaŋaasi nʼabaŋinda nʼabagadi.

³ Nja huloma ebibono ebyʼamahulu era ebi muja huŋulira ohuŋwa mu mwoyo gwange bija hubafuula abaatu abali nʼohutegeera.

⁴ Nja hwetegeeresa engero njinyonyole mu lwembo ni kubba ahatongooli.

⁵ Mu biseera ebigosi sinja hutya wayire abalabe bange banjeswanigirisa,

⁶ abo abesiga obuŋinda waawe era abepaaha olwʼobuŋinda waawe obubitiirifu.

⁷ Eŋuma muutu aŋanga ohununula omuutu wahye, wayire aŋanga ohusasula Hatonda amuhuuma.

⁸ Obulamu wʼebbeeyi bugali era eŋuma aŋanga ohugulirira,

⁹ asobole ohuwangaala era atafa.

¹⁰ Hiisi muutu ahibona ti nʼabagesi boosi bafa, abaŋubeebe nʼabaŋuma ehi bategeera boosi basihiiriha era balehera abandi obuŋinda waawe.

¹¹ Amagombe gaawe gaja husigala ni gali njʼamago gaawe endaalo josijosi, pomu balimenya emirembe nʼemirembe nʼolu baliba nʼebyalo ebiri mu masiina gaawe.

¹² Aye omuutu nʼolwaba muŋinda atye sihimugaana hufa era alisihiiriha hyʼebisolo.

¹³ Ehyo njʼehyola hu abo abaŋeega ti behena ni naabo ababesiga era babehirihisamo.

¹⁴ Boosi bali nʼohufa hyʼetaama era olumbe lulibalya. Bulihya abagwalaafu babaŋuga era sibaligobolayo humenya mu mayumba gaawe agʼomutindo.

¹⁵ Aye Hatonda aja huununula ohuŋwa emagombe, mu butuufu omwene alipira ewuwe.

¹⁶ Hitahubisyanga bubi singa omuutu asuna obuŋinda obubitiirifu singa obuŋinda buwe weyongera obungi

¹⁷ olwohuba nʼalifa eŋuma ehi alitiina ni nahyo era saalitiina emagombe nʼeŋono lirye.

¹⁸ Wayire omuutu geranga wʼekabi era abaatu bamupaaha olwʼobuŋinda

¹⁹ aye ali tiina geŋimba hu basehulu babe abataligaluhamo hubona hu lyuba.

²⁰ Omuutu omuŋinda aŋuma hutegeera yeesi wahusihiiriha hyʼesolo.