Ezabbuli 45 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ohwemba ni batiinira hu ejanjaasi “Lyʼebimuli.” Lwʼabaatu bomu lulyo lwa Koora. Olwembo lwʼobugole.

¹ Omwoyo gwange gwituluha ebiraŋi ni nembera habaha ebi seega olulimi lwange lusengeja ebibono hyʼekalaamu yʼomuŋandiisi haŋunye.

² Ndiiwe omusinde omuŋoono ohira abandi bosibosi era omanyire ohuloma olwohuba Hatonda gahuŋa ekabi ejʼemirembe nʼemirembe.

³ Wefiihe epiima yiyo hu nduuhu ewe owʼamaani amangi. Yambala engoye endaŋi ejʼomutangirisi.

⁴ Mwiŋono liryo oŋanguuye hulwa amazima, obuwombeefu nʼowawufu. Leha omuhono gugwo ogwʼamaani guhole ebiitu ebitiisa.

⁵ Lasula obusaale wuwo owoogi bufumite emyoyo jʼabalabe ba Habaha. Leha ogaluse amawanga mu buŋangi wuwo.

⁶ O Hatonda, owahabaha wuwo buja hubererera emirembe nʼemirembe. Era oja huŋuga abaatu babo nʼotehubbira.

⁷ Wenda obutukirivu aye ocaawa ehibi. Olwʼehyo, Hatonda wuwo ahutobooye mu bahyo era gahuta mu hifo ehyʼeŋono ehiitu ehija huhuŋweramo esangaalo ohuhiraho abahyo.

⁸ Ebyambalo bibyo ebyʼobuŋugi biŋunya ahaloosa aha miira nʼaha alowe naha kasiya. Mu mbuga eji batimbire amasyaka ebifuga bihusangaasa.

⁹ Mu bahasi abahulabirira mulimo nʼabahaana ba habaha. Hu muhono gugwo omulungi pohuli omumbeja owambaaye ezaabbu ehira obulaŋi ohuŋwa mu Ofiri.

¹⁰ Muhaana, ŋuliirisa era faayo hu ebi ndoma yibirira abalebe babo nʼabomu hiha hihyo.

¹¹ Obuŋoono wuwo wuŋirire omwoyo gwa habaha. Muŋe eŋono olwohuba nje musengwawo.

¹² Abaatu bʼe Tiiro balihuleetera ebirabo nʼabaŋinda balyehoyahoya ni benda obasiime.

¹³ Omumbeja ali mu lubiri era gejuuye eŋono. Ehyambalo hihye batungiraho ezaabbu.

¹⁴ Mu byambalo ebigohobe obulaŋi bamuŋerehera ewa habaha abahaana bahye abataŋenyuhangaho nʼomusinde bamuŋerehera era bali humuhuleetera.

¹⁵ Bali humuleeta mu sangaalo nʼohusaŋalya ni bengira mu lubiri lwa habaha.

¹⁶ Abaana babo balisikira abasehulu baawe oli bafuula baŋugi mu hyalo hyosihyosi.

¹⁷ Nja huleetera abaatu abʼemirembe josijosi ohuhuhebuliranga era olwʼehyo amawanga gosigosi ganahujumiryenga emirembe nʼemirembe.