Ezabbuli 40 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli ya Dawudi.

¹ Nahuumirira Musengwa nʼobugumiikiriza, gaŋulira ngʼagobolamo ohwerira hwange.

² Gaatusa ohuŋwa mu madosi mwiroŋo eritiisa nga ganjemeeresa hu lwanda gaagira nagenda ni tagwa.

³ Gaapa olwembo olunyaaha olwembo olwohujumirya Hatonda wange. Bangi baja hubona batye era besigenga Musengwa.

⁴ Gesiimire omuutu owesiga Musengwa, atesiga abo abepaahapaaha era abagotera mu hujumirya ebinambulamo.

⁵ O Musengwa Hatonda wange, oholire ebyamaliholiho bingi, eŋuma owʼohuhugerageraniaho. Ŋaŋuma asobola ohwanja ebiitu ebi otegehire ohutuholera gahenayo, bingi bugali weene sibibaliha era nolu nahagehisyeho ohubibala sinahasoboye.

⁶ Siwendire birabo nʼeŋongo eŋongo eyi bohya ehwiye lyaguguliha ni neeryo eri baŋaayo olwʼebibi siwabisiima ne waapa ohutwi ohuhuŋulira.

⁷ Ngʼaŋo ndoma ti, “Nijire ohuhola ebi osiima ngʼolu bapandiihaho mu Byaŋandiihiwa.

⁸ O Hatonda wange, nenda ohuhola ebi osiima, amagambi gago bagaŋandiiha mu mwoyo gwange.”

⁹ O Musengwa, ndangirira owawufu wuwo mu luhumbaano olubba. Sinja huhiŋoleraho ngʼolu omanyire.

¹⁰ Mu luhumbaano lwʼabaatu babo sipolera hu bunoŋosi wuwo. Ndangirira ebiŋamba hu hwenda nʼowesigwa wuwo.

¹¹ O Musengwa, otalehera hupambira hisa hihyo leha ohwenda nʼamazima gago bikuumenga habuhyabuhya.

¹² Hiri hiityo olwohuba ebigosi eduuli bineswanigirihise ebibi byange bipinga era binjigaaye emoni. Bihira efiiri johu mutwe gwange obungi era omwoyo gwange gunafuŋire.

¹³ O Musengwa, hihusangaase wununule O Musengwa, yanguŋaho wunjeede.

¹⁴ Leha abo abenda ohunjita baswale era hibagwemo abeene nʼabeene. Leha abo abasangaalira ohufafagana hwange bagameyo ni bawomboŋaaye.

¹⁵ Leha abo abakondyola bagameyo ni baswaye olwohuba baloma baati, “A a! Hwahulomera!”

¹⁶ Leha abo bosibosi abahwendula basangaale era basaŋalye olwʼewe, era leha abo abenda ohunoŋoha balomerenga ŋamugulu baati, “Musengwa aŋeewe eŋono!”

¹⁷ Ndi mugadi era ndi mu wetaavu, Musengwa kusunga wupeegeho. Ndiiwe obunjeeda era ndiiwe omununuzi wange. O Hatonda wange, otalwa ohunjeeda!