Ezabbuli 37 - Endagaano Epyaha ko n'ebitabo ebindi eby'Endagaano Ekayire mu Lunyole

Ya Dawudi.

¹ Oteŋendeheranga olwʼabahosi bʼebibi oba esaalwa ohuhuŋamba olwʼabo abahola ebitali biruŋamu,

² olwohuba bali hyʼenyaasi baja huŋotoha hyʼebimera mu hiseera ehitali hya ŋaleeŋi, hyʼomuloofe ngʼolu guŋotoha mangumangu boosi baja hufa baatyo.

³ Wesigenga Musengwa, era oholenga ebiraŋi omenye mu hyalo onyumirwenga ebiraŋi ebi ahuŋa.

⁴ Sangaalanga olwa Musengwa, alihuŋa ebi omwoyo gugwo guŋembaho.

⁵ Ŋambya Musengwa obulamu wuwo omwesigenga era aja huhuyeeda.

⁶ Aja huleetera obugwalaafu wuwo ohwaduhirira hyʼenjase mu mawiiwi, nʼohuba omuutu atehubbira ohwaduha hyʼeryuba eryomu muusi tangalwe.

⁷ Weŋomehanga mu moni ja Musengwa omuhuumiirire nʼobugumiikiriza, oteralihiriranga abaatu banabitamo mu tegeha jaawe ecaamu.

⁸ Leheraaŋo ohunyiiga oba obuhambwe, bihuleetera bigosi byereere.

⁹ Abahosi bʼebibi baja husihiiriha, aye abesiga Musengwa baja huba njʼabeene ehyalo ehi gasuubisa.

¹⁰ Mu hamanga hatono, abahosi bʼebibi baja huŋwaŋo era nʼoja hubendula, sibaja huboneha.

¹¹ Aye abeŋomeha balisikira ehyalo hino era baja huba nʼemiyaaya mingi.

¹² Abahosi bʼebibi besoomera abagwalaafu era baluma emba olwʼobucaayi.

¹³ Aye Musengwa ajeherera abahosi bʼebibi olwohuba amanyire ati oludaalo lwawe luja hwola basihiirihe.

¹⁴ Abahosi bʼebibi basoŋolayo epiima era balasa obusaale ohusihiirisa abagadi nʼabali mu wetaavu ko nʼohwita abo abahola ebiruŋamu.

¹⁵ Aye nawoogi wʼefumo wiita nʼobuŋagaaye epiima jaawe jija hubeta nibo abeene era obusaale waawe buja hubbwagiha.

¹⁶ Ebitono ebi omugwalaafu ali ni nabyo byamugaso, ohuhira obuŋinda wʼabahosi bʼebibi eduuli.

¹⁷ Hiri hiityo olwohuba amaani gʼabahosi bʼebibi gaja huhoma aye Musengwa njʼahuuma abagwalaafu.

¹⁸ Musengwa alabirira abagwalaafu era obusika waawe buja huba wʼemirembe nʼemirembe.

¹⁹ Mu biseera ebigosi sibaja huŋotoha era mu biseera ebyʼenjala baja hubanga nʼemere mbitiirufu.

²⁰ Aye abahosi bʼebibi balisihiiriha, abalabe ba Musengwa baliŋotoha hyʼebimuli era baja hugotaŋo hyʼeriisi.

²¹ Abahosi bʼebibi beŋola ne sibasasula aye abagwalaafu bagaba nʼomwoyo mulala.

²² Abo aba Musengwa aŋa ekabi balisikira ehyalo hino aye abo aba aŋwaba balisihiiriha.

²³ Musengwa anaba nʼasiima engenda yʼomuutu amutaho obuhuumi,

²⁴ nʼolu atagala saaja hugwa olwohuba Musengwa amulera mu ngalo jije.

²⁵ Naali muŋere ne ŋaahani ndi kulire simbonangaho Musengwa nʼahubbire omugwalaafu omugongo oba abaana babe ni basungirisa emere.

²⁶ Baba nʼehyere hiisi hiseera baŋola ni baŋuma ehi beŋambya era nʼabaana baawe baja husuna ekabi.

²⁷ Mucuuhe ohuŋwe mu bibi muhole ebiruŋamu muja humenya hu hyalo hino emirembe nʼemirembe.

²⁸ Musengwa genda abatehubbira era salehaŋo abesigwa babe. Aja hubahuuma emirembe nʼemirembe aye olulyo lwʼabahosi bʼebibi lulisihiiriha.

²⁹ Abagwalaafu baja husikira ehyalo era balihimenyamo emirembe nʼemirembe.

³⁰ Omuutu omuluŋamu ebimuŋwamo biba byʼamagesi era aloma ebiruŋamu.

³¹ Ahuuma amagambi ga Hatonda wuwe mu mwoyo gugwe era sagalehaŋo.

³² Omubi geteega omugwalaafu ni genda amwite

³³ aye Musengwa salireha bagwalaafu mu buŋangi wʼababi oba ohuleha bamusalire omusango.

³⁴ Wesigenga Musengwa era ogenderenga mu magira gage, oja husikira ehyalo hino. Era olibona ababi ni basihiiriha.

³⁵ Nabona omuhosi wʼebibi nʼaŋuma hisa era nʼali bulaŋi hyʼomusaala gwʼe Lebbanooni, oguhulira mwiroba egimu

³⁶ aye siŋabita hiseera ngʼafa era ngagota ni namwendula sinamubona.

³⁷ Wehaŋaase omuutu omugwalaafu era omulaŋi aja huba nʼobulamu owʼemiyaaya mu moni eyo.

³⁸ Aye abahola ebibi bosibosi baja husihiiriha baŋwereŋo erala.

³⁹ Obunoŋosi wʼabagwalaafu buŋwa eyiri Musengwa era njʼabahuuma mu biseera ebigosi.

⁴⁰ Musengwa njʼabayeeda era njʼabanunula, abaŋonia abahosi bʼebibi era gabanoŋola olwohuba bamwesiga.