Ezabbuli 32 - Endagaano Epyaha ko n'ebitabo ebindi eby'Endagaano Ekayire mu Lunyole

Ya Dawudi. Masikili.

¹ Gesiimire oyo oyu basoniŋa ebibi bibye oyu bawiiha hu bibi bibye.

² Gesiimire oyo oyu Musengwa atabalaho bibi ebi aholire era aŋumamo budulingi.

³ Ni naali ni cigeene ohwatula ebibi byange, amagumba gange ganafuŋira erala olwʼohulira ohunabangamo ni talehera.

⁴ Wamboneresanga omuusi nʼowiire, naŋwamo amaani ngʼolu maaji gomeera mu biseera byʼehyeya.

⁵ Nga mbutula ebibi byange eyi oli era sinahweha bubi wange. Naloma ti, “Nja hwatulira Musengwa ebibi byange,” era waasoniŋa ebibi byange byosibyosi.

⁶ Olwʼehyo, hiisi muutu ahujumirya ahweŋe alombe nʼohiboneha. Mu butuufu amataba ni galiija sigalisobola humwolaho.

⁷ Ndiiwe ehyehwehero hyange, oja hukuuma ohutagwa mu bigosi era oja huupa olwembo olwʼobuŋangusi.

⁸ Nga Musengwa aloma ti, “Nja huhulaga engira eyohugenderangamo. Nja huhusomesa era nja huhulabirira.

⁹ Mutaba hyʼembalaasi oba nasugirya ejiŋumamo magesi, era ejenda ohujitaamo ehyoma nʼoluhoba ko jaahola ehi oba ni wenda jihole.”

¹⁰ Abahosi bʼebibi bali nʼohubonaabona hungi, aye Musengwa genda ehibitiiriye abaatu abamwesiga.

¹¹ Musangaale era musaŋalye hulwa Musengwa, enywe abahola ebiruŋamu, enywe mwesimwesi abagwalaafu mu myoyo, mwembe.