Ezabbuli 29 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Dawudi.

¹ Muŋe Musengwa eŋono, enywe ebitonde ebyomwigulu, muŋe Musengwa eŋono olwʼamaani gage.

² Muŋe Musengwa eŋono, muhubbe amafuha mu moni jʼohira Owawufu nʼeŋono.

³ Ejanjaasi lya Musengwa liŋulirihana hu nyanja, Hatonda owʼeŋono abbwabbwanuha hu nyanja josijosi.

⁴ Ejanjaasi lya Musengwa lyʼamaani, ejanjaasi lya Musengwa lyengunjisa bugali!

⁵ Ejanjaasi lya Musengwa libbwaga emisaala eʼjamaani, Musengwa abbwaga emisaala ejʼe Lebbanooni ejʼamaani.

⁶ Agira esozi jʼe Lebbanooni nʼolusozi Hamoni byatuumatuuma hyʼenyana yʼeŋombe.

⁷ Ejanjaasi lya Musengwa liŋwamo endimi ejʼomuliro.

⁸ Ejanjaasi lya Musengwa litengesya olulafu, Musengwa atengesya olulafu lwʼe Kadesi.

⁹ Ejanjaasi lya Musengwa litengesya emitumba, ligira amahoose gʼemisaala mu madeŋo gakukumuha. Era hiisi muutu mu Yekaalu yiye alomera ŋamugulu ati, “Oŋeewe eŋono!”

¹⁰ Musengwa aŋuga amataba Musengwa aŋuga nga Habaha emirembe nʼemirembe.

¹¹ Musengwa aŋa abaatu babe amaani, Musengwa aŋa abaatu babe emiyaaya.