Ezabbuli 27 - Endagaano Epyaha ko n'ebitabo ebindi eby'Endagaano Ekayire mu Lunyole

Ya Dawudi.

¹ Musengwa njʼenjase yange era njʼOmunoŋosi wange, njʼani oyu nja hutya? Musengwa njʼahuuma obulamu wange, njʼani aja hutiisa?

² Ababi ni banumba ohwenda ohunjita, era abalabe bange banumba, baja hwegumula, nga bagwa.

³ Wayire eŋe eramba lineswanigirisa, mu mwoyo gwange sinja hutya, omwoyo gwange siguja hutya. Wayire olutalo lugwaŋo hu ese, sigala ni ndi mugumu.

⁴ Hirala ehi sunga Musengwa era ehi nenda obugali era ehiitu ehyo cʼehino ti, nahaba mu nyumba ya Musengwa obulamu wange wosiwosi, ohweboneranga obuŋoono wa Musengwa, nʼohusaba mu Yekaalu yiye.

⁵ Hiri hiityo olwohuba mu biseera ebigosi, aja hukuumira mu weema yiye era aliita ŋamugulu hu lwanda.

⁶ Nja huŋangula abalabe bange abaneswanigirihise. Ndiŋaayo eŋongo mu Weema yiye enjawufu nindi nʼesangaalo. Nja hwemba ni njumirya Musengwa.

⁷ O Musengwa, ŋulira ejanjaasi lyange ni kulanga pambire ehisa, bungobolemo.

⁸ Mula mu mwoyo gwange, pulira ni wundoma oti, “Njumirye.” Olwʼehyo, Musengwa nja huhujumirya.

⁹ Otanjehwehaho, otabbinga muŋeeresa wuwo nʼobusungu. Ndiiwe omuyeedi wange, otandehaŋo oba wakubba omugongo, O Hatonda omunoŋosi wange!

¹⁰ Wayire bbaabba ni maama bandehaŋo aye Musengwa aja hundabiriranga.

¹¹ O Musengwa, somese ebi wenda kole, tangirire mu ngira enduŋamu olwohuba ndi nʼabalabe bangi.

¹² Otapayo eyiri abalabe bange, olwohuba abajulizi abʼobudulingi banjenyoheyeeho nʼobuhambwe.

¹³ Aye nehahasa ti nja hubona ngʼolu Musengwa ali mulaŋi mu bulamu wahatyane.

¹⁴ Wesige Musengwa, galuhamo amaani era guma omwoyo, ohuumirire Musengwa ohuhuyeeda.