Ezabbuli 2 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Lwahiina amawanga gahuluŋira ohwaga aŋo era abaatu bagesyaho ohuhusalira oluhwe oluŋumamo.

² Abahabaha hu hyalo bahwesoomera, nʼabaŋugi bahumbaana ŋalala ohusoosa Musengwa ni nooyo oyu bajuhaho amafuta ni baloma baati,

³ “Muhole hukapule enjegere jaawe era hwetuseho nʼepingu jaawe.”

⁴ Oyo owihaaye mwigulu hu tebe eyʼobuŋugi abajeherera, Musengwa atala etegeha jaawe.

⁵ Era abahayula nʼobusungu, gabahanga nʼehiruŋi ati,

⁶ “Natongosa habaha wange hu lusozi lwange Sayuuni olwawufu.”

⁷ Habaha aloma ati, “Nja hulangirira ehiragiro hya Musengwa ehi gandoma ati, ‘Oli mwana wange, olwa leero kusaaye.

⁸ Sunge era nja huhuŋa amawanga gosigosi ohuba obusika wuwo, ehyalo hyosihyosi hibe ŋaasi wʼobuŋangi wuwo.

⁹ Olibaŋuga nʼesimbo eyʼehyoma era olibatetenula hyʼatetenula esongo.’ ”

¹⁰ Olwʼehyo bahabaha enywe mugobolemo amagesi, enywe abaŋugi bʼehyalo mwege bino.

¹¹ Muŋeeresenga Musengwa nʼohutya. Era musaŋalyenga nʼohutetema.

¹² Hubbira Omusaani amafuha ko obusungu butamuŋamba gabaluŋira era hyabaŋweramo ohusihiiriha. Besiimire abo bosibosi abenda Musengwa abayeede.