Ezabbuli 19 - Endagaano Epyaha ko n'ebitabo ebindi eby'Endagaano Ekayire mu Lunyole

Yʼomutangirisi wʼabembi. Ezabbuli ya Dawudi.

¹ Egulu liroma hu eŋono lya Hatonda, nʼebiri mu bbanga biraga omulimo gugwe.

² Hiisi mu muusi biroma era hiisi wiire biraga amagesi gage.

³ Ŋaŋumaaŋo ndoma oba olulimi aŋa janjaasi lyabyo litaŋulirihana.

⁴ Ejanjaasi lyabyo, lihwana ehyalo hyosihyosi nʼebibono byabyo hiisi muutu gabiŋulira. Mwigulu gemehera eryuba eweema,

⁵ ehiri hyʼohuuja hwʼomugole omusinde, aŋwera mu hisenge hihye, hyʼomuutu asingire embiro.

⁶ Eryuba liŋwera ebuŋwalyuba, nga lyetoloola ohwola olu ligwa mu maaji hu luuyi olundi era ŋaŋuma ehitolaho bubalire waalyo.

⁷ Egambi lya Musengwa lyolana, ligobosamo amaani. Ebiragiro bya Musengwa byesigiha, abatali bagesi, bibafuula bagesi.

⁸ Ohwigirisa hwa Musengwa hutuufu, husangaasa omwoyo. Amagambi ga Musengwa njase, gatuleetera obutangaafu.

⁹ Ohutya Musengwa hyawufu emirembe nʼemirembe. Musengwa asalaaŋo nʼatehubbira era ebi asalaŋo biba biruŋamu.

¹⁰ Byamuŋendo bugali ohuhira ezaabbu, ezaabbu ehira obulaŋi. Biŋomerera ohusinga omudugere, omudugere ogwomu biyali.

¹¹ Birabula omuŋeeresa wuwo, ohubigondera hipeesa omuhemba mubbala.

¹² Aye njʼani omwene asobola ohumanya esobi jije? O Musengwa, soniŋe ebibi byange ebyomu ngiso.

¹³ Huuma omuŋeeresa wuwo tahola bibi mu hugenderera era bitaŋuga mwoyo gagwe. Ehyo hija hufuula aŋumaaho mbalo, hija hutusaho ehibi.

¹⁴ Leha ebibono byange nʼebiŋeego byʼomwoyo gwange, bihwesiimise, O Musengwa, olwanda lwange era omununuzi wange.