Ezabbuli 17 - Endagaano Epyaha ko n'ebitabo ebindi eby'Endagaano Ekayire mu Lunyole

Ohusaba hwa Dawudi.

¹ O Musengwa, ŋulira ohweŋosyaho hwange ohwʼamazima. Ŋulira ohusaba hwange, sihwabudulingi.

² Ndiiwe osobola ohusala omusango nejeerera, olwohuba omanyire abahola ebiraŋi.

³ Nʼoluwehebeja omwoyo gwange, era owiire wendulirisa ebigulimo, nʼoluwungezesa, sooja husaŋaanamo hibi. Neeyama ohutaloma ehibi.

⁴ Ngondera ebiragiro bibyo era ehyo hindeetera ohweŋala amagira aga batemu.

⁵ Hiisi obuhya ngendera mu ngira yiyo, amagendere gange gahiiri njʼameene.

⁶ O Hatonda, kulomba era oja hungobolamo, tegere ohutwi era oŋulire ohusaba hwange.

⁷ Laga ohwenda huhwo ohubitiirifu. Nunula abo abadulumira eyi oli abo abahwesiga, obaŋonia abalabe baawe.

⁸ Kuume ngʼolu ohuuma emunge yʼemoni yiyo, kwehe mu hisisigo hyʼamabaŋa gago,

⁹ wuponie ababi abandumba, abalabe abaneswanigirihise.

¹⁰ Baŋuma hisa era baba mu hwepaahapaaha.

¹¹ Banjenduririhise era baneswanigirihise, bakeeta babone hiisi aŋanja, banjehoyera bakeneŋo.

¹² Bali hyʼepologoma eyi njala eruma hyʼepologoma eyʼamaani eyiri mu hyehwehere negunjiriiye ehi enalye.

¹³ O Musengwa, yinyoheramo, baŋiriŋanie era obaŋangule tambisa epiima yiyo wununule ohuŋwa mu mihono jʼabahosi bʼebibi.

¹⁴ O Musengwa, mu maani gago nunule ohuŋwa mu baatu abasuubira omuhemba ni bahiiri mu bulamu wa hatyane. Abo aba wenda sobalumya enjala abaana baawe baba nʼebihena, era babiihiraho nʼabejuhulu baawe.

¹⁵ Era ese nja huhubona olwohuba ndi mugwalaafu. Ni nja husisimuha ohuŋwa mu hufa, hiija hukena ohuhubona ngʼolu oli.