Ezabbuli 16 - Endagaano Epyaha ko n'ebitabo ebindi eby'Endagaano Ekayire mu Lunyole

Ezabbuli ya Dawudi.

¹ Kusunga wukuume, O Hatonda, olwohuba ndiiwe oyu nesiga.

² Naloma Musengwa ti, “Ndiiwe Musengwa wange, ebiraŋi byosibyosi ebi ndi ni nabyo ewe ndiiwe obiipa.”

³ Abagwalaafu babo abali mu hyalo hino, njʼabeŋono abanesiimisa ohuba ni nabo.

⁴ Abo abajumirya abahatonda abandi baja hweyongera ohubonaabona bugali. Sinja hwegaata ni nabo mu huŋonga hwawe era sinja hujumirya bahatonda baawe.

⁵ O Musengwa, ewe ndiiwe owange. Ndiiwe owuupa ebi ndi ni nabyo. Obulamu wange, buli mu mihono jijo era ŋaŋuma ehi tya.

⁶ Eroba eri waapa eraŋi bugali, era mu butuufu oweene, omugabo ogwobusika wange mulaŋi.

⁷ Nja hwebasanga Musengwa owutangirira, era owiire omwoyo gwange gundabula.

⁸ Manyire ti Musengwa ali ni neese habuhyabuhya era olwohuba ali ni neese, sinja hweŋendeherera.

⁹ Cʼehigira omwoyo gwange gusaŋalya, nʼolulimi lwange lusangaafu era mbula ehiitiisa mu bulamu wange.

¹⁰ Solireha mwoyo gwange ohusigala e magombe era solireha Omwawufu wuwo ohubolerayo.

¹¹ Wundaga engira eyipira mu bulamu. Ohuba huupi ni neese, hiipa esangaalo. Ohuba hu muhono gugwo omulungi hiipa esangaalo eryʼemirembe nʼemirembe.