Ezabbuli 149 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Mujumirye Musengwa. Mwembere Musengwa olwembo olunyaaha, mwembe etendo lirye mu luhumbaano lwʼabagwalaafu.

² Leha Abayisirayiri basaŋalye olwʼoyo owabatonda. Leha abaatu bomu Sayuuni basaŋalye olwa habaha waawe.

³ Leha bamujumirye nʼohuhina era bamwembere ni bahubba etambulini nʼahatongooli

⁴ olwohuba Musengwa asangaalira abaatu babe, abewombeeha abatihira engule eyʼobuŋangusi.

⁵ Abamwesiga bosibosi basaŋalye olwohuba baŋanguuye, bembe nʼesangaalo ni bali hu buliri waawe.

⁶ Leha bembe enyembo ni bajumirya Hatonda, ni baŋambire nʼepiima enjogi hu njuyi jombi,

⁷ ohwegalula amawanga nʼohuboneresa abaatu

⁸ basidihe abahabaha baawe, baboŋe nʼabatangirisi baawe epingu,

⁹ bahole ebibonerezo ebi babasalira. Eryo njʼeŋono lyʼabagwalaafu babe. Mujumirye Musengwa.