Ezabbuli 146 - Endagaano Epyaha ko n'ebitabo ebindi eby'Endagaano Ekayire mu Lunyole

¹ Mujumirye Musengwa, omwoyo gwange gujumirya Musengwa.

² Nja hujumirya Musengwa, obulamu wange wosiwosi nja hwemberanga Hatonda wange ni kiiri mulamu.

³ Simwesiganga batangirisi, abaatu obuutu, abataŋanga hubanoŋola.

⁴ Omuuya gunabaŋwamo nga baagama mwiroba, hu ludaalo olwene olwo etegeha jaawe nga jifa.

⁵ Gesiimire oyo ali ni Hatonda wa Yakobbo ngʼomuyeedi wuwe era asuubirira mu Musengwa Hatonda wuwe,

⁶ owatonda egulu nʼehyalo nʼenyanja ko nʼebiitu byosibyosi ebirimo, oyo Musengwa omwesigwa emirembe nʼemirembe.

⁷ Agonjoola esonga jʼababanyigirisa nʼatehubbira, abayala abaŋa ehyohulya, Musengwa aboŋolola abasibe,

⁸ Musengwa gegula emoni jʼabaŋofu, Musengwa ayeeda abakokomaaye, Musengwa genda abagwalaafu.

⁹ Musengwa ahuuma abalugendwa era ayeeda abanamwandu nʼabafuubbi aye asihiirisa ekola yʼabahosi bʼebibi.

¹⁰ Musengwa aŋuga emirembe nʼemirembe. Ewe Sayuuni, Hatonda wuwo aja huŋuga emirembe nʼemirembe. Mujumirye Musengwa.